O le Pogai Tatou te Manaomia ai Iesu Keriso
Saunia e Elder D. Todd Christofferson
O Le Korama a Aposetolo e Toasefululua
Mai se saunoaga i se faigalotu, “A Message at Christmas,” na tuuina atu i le Iunivesite o Polika Iaga i le aso 12 Tesema, 2017.
Tuutuu i lalo le malomaloā i lenei vaitau o le Kerisimasi ae manatunatu i le ofoofogia ma le mamalu o le Alo o le Atua.
Faamemeloga o le au Leoleo Mamoe, saunia e Michelangelo Merisi da Caravaggio, Bridgeman Art Images
E faaopoopo atu i le Kerisimasi e aumaia ai se avanoa e toe manatunatu ai i le soifuaga ma saofaga a le Perofeta o Iosefa Samita, o lona aso soifua o le aso 23 o Tesema. E faigata ona talisapaia atoatoa le mea na ia ausia i le avea ai o se meafaigaluega i aao o le Alii i se siosiomaga o le tetee, sauaga ma I se taimi o le a oo mai, o le a tatou vaai ai i le faamamaluina o le Perofeta o Iosefa o le taitai agavaa o lenei tisipenisione mulimuli ma le silisili—le tisipenisione e tasi sa faamoemoeina e manuia e ui lava o tisipenisione uma ua mavae na iu i le liliuese.
Ailoga e i ai se tasi i lenei tisipenisione ua iloa lelei le mata’u i le Atua ae le o tagata nai lo o le Perofeta (tagai Mataupu Faavae ma Feagaiga 3:7–8). Sa manaomia e le Alii ni mea faigata tele mai ia Iosefa. Na ia faia, ma ua ‘ae’ae ai i tatou uma.
O le faaliliuga ma le lolomiga o le Tusi a Mamona sa o se ausiga lauiloa ma o le faavae lea o le manuia o le galuega a le Alii i le tisipenisione mulimuli lenei. Iesu Keriso i lenei vaitau fou i Lona tagata moni o le Alo e Toatasi na Fanaua o le Atua ma le Togiola o tagata uma.
Ae maise lava i le vaitau lenei, tatou te manatua ai le sootaga patino a le Perofeta ma le Faaola ma o le “molimau, mulimuli lenei, i molimau uma, [na ia tuuina mai] e uiga ia [Keriso]: O loo soifua o ia!” (Mataupu Faavae ma Feagaiga 76:22). O le molimau a Iosefa e uiga i le Keriso soifua, ou te manatua ai le saunoaga a Peresitene Gordon B. Hinckley (1910–2008): “O le a leai se Kerisimasi pe ana faapea e leai se Eseta. O le pepe o Iesu o Peteleema o le a pei o se isi lava pepe e aunoa ma le Keriso togiola o Ketesemane ma Kalevaria, ma le manumalo moni o le Toetu.”1
Aisea Tatou te Manaomia ai Iesu Keriso?
I se taimi e lei mamao atu, sa fesili mai ai ia te a’u se tagata sa auai i le Ekalesia mo le tele o tausaga, “Aisea ou te manaomia ai Iesu Keriso? Ou te tausia poloaiga; O a’u o se tagata lelei. Aisea ou te manaomia ai le Faaola?” E ao ona ou faapea atu, o le le malamalama o lenei tagata o le ekalesia i lenei vaega aupito taua o la tatou aoaoga faavae, lenei elemene faavae o le ata o le faaolataga, sa matuai o’u te’i ai lava.
“Ia, o le mea muamua” sa ou tali atu, “e i ai le mataupu itiiti lenei o le oti. Ou te manatu e te le manao e avea lou oti ma ou tulaga mulimuli, ma a aunoa ma Iesu Keriso o le a leai se toetu.”
Sa ou talanoa e uiga i isi mea, e pei o le alagatatau ona i ai i tagata sili ona lelei o le faamagaloga ma le faamamaina lea e na o le alofa tunoa togiola o le Faaola e mafai ai.
Peitai, i se isi tulaga, atonu e faapea ai le fesili, “Pe le mafai ea e le Atua ona faia soo se mea e finagalo ai o Ia ma laveai i tatou ona e alofa o Ia ia i tatou, e aunoa ma le manaomia o se Faaola?” O le faaupuina faapenei, e i ai ni tagata i le lalolagi i aso nei o loo i ai foi lena fesili. Latou te talitonu i le Atua ma se olaga pe a mavae le oti ae ua manatu e faapea, ona e alofa le Atua ia i tatou, e le afaina tele ai po o a mea tatou te faia pe le faia foi; Na te taulimaina lava ia mea.
O loo i ai ni aa mai anamua o le filosofia lenei. O Neoa, mo se faataitaiga, “sa molimau atu foi o ia i le nuu o le a faaolaina tagata uma i le aso mulimuli; ma e lē tatau ona latou fefefe pe tetete, ae ia ea i luga o latou ulu ma olioli; ona na foafoa e le Alii tagata uma, ma ua togiola foi e ia tagata uma; ma, i le iuga, o le a maua e tagata uma le ola e faavavau” (Alema 1:4).
E te maitauina i le aoaoga faavae a Neoa le talitutusa o le ala e maua ai le faaolataga ma lea na tuu mai e Lusifelo, o se “atalii o le taeao,” o le mea moni o le tagata sili ona faatupu faanoanoa o faanoanoa uma lava (Isaia 14:12; tagai foi Mataupu Faavae ma Feagaiga 76:25–27). E pei ona sa fofogaina mai e le Atua, o Lusifelo “o ia lava lea sa i ai mai le amataga, ma sa sau o ia i o’u luma, ma fai mai—Faauta, o aʼu lenei, auina atu aʼu, o le a avea aʼu mo ou atalii, ma o le a ou laveaiina tagata uma, ina ia [leai] se agaga e toatasi e se ese, ma e moni lava o le a ou faia lena mea; o le mea lea, ia tuu mai ia te aʼu lou mamalu.
“Ae, faauta, o loʼu Atalii Pele, o lē o laʼu Pele ma laʼu Filifilia mai le amataga, na fai mai ia te aʼu—Le Tamā e, ia faia lou finagalo, ma e a oe pea le mamalu e faavavau” (Mose 4:1–2).
Sa le na o se tulaga lea e lagolagoina ai e Iesu le fuafuaga a le Tama ma talosagaina ai e Lusifelo sina fetuutuunaiga laitiiti. O le talosaga a Lusifelo na semanu e faaumatia ai le fuafuaga e ala i le aveesea o o tatou avanoa e galulue taitoatasi ai. O le fuafuaga a Lusifelo na faavaeina i le fai faamalosi, e faia ai isi atalii ma afafine uma o le Atua—o i tatou uma lava—o ana papeti. E pei ona aotele mai e le Tama:
“O le mea lea, ona sa fouvale Satani ia te au, ma saili e faaumatia le faitalia a le tagata, lea na tuu atu e A’u, o le Alii le Atua ia te ia, ma le tasi foi, ia Ou avatu ia te ia lo’u lava mana; i le mana o la’u Toatasi na Fanaua, na Ou faia ai ia lafoina o ia i lalo;
“Ma sa avea o ia ma Satani, ioe, o le tiapolo lava lea, o le tamā o pepelo uma, e faasese ma faatauaso tagata, ma ta’ita’i faatagataotaua i lona loto, le toatele lava lea o i latou o e e le faalogo mai i lo’u leo” (Mose 4:3–4; ua faamamafa le faaopoopo).
I se faatusatusaga, o le faia i le ala a le Tama ua ofo mai ai ia i tatou se aafiaga taua i le olaga nei. E ala i “aafiaga i le olaga nei,” o lona uiga o le filifiliina o lo tatou ala, o le “[tofo] i le oona, ina ia [mafai ona tatou] iloa ai e faataua le lelei” (Mose 6:55); o le aoaoina, salamo, ma le tuputupu ae, ma avea ma tagata e mafai ona fai mo i tatou lava nai lo le na o le “faagaoioi” (2 Nifae 2:13); ma mulimuli ane faatoilaloina le leaga ma faatinoina o tatou manao ma tomai e ola ai i se tulafono faaselesitila.
O lenei mea e manaomia ai se malamalama i le lelei ma le leaga i la tatou vaega, faatasi ai ma le gafatia ma se avanoa e filifili ai i le va o mea nei e lua. Ma e manaomia ai le tali atu mo filifiliga na faia—ana le o lea pe ua le o ni filifiliga moni. O le filifiliga, i le isi itu, e manaomia ai le tulafono, po o taunuuga muai iloaina. E tatau ona mafai ona tatou faia se gaoioiga po o se filifiliga faapitoa e mafua ai se taunuuga po o se iuga faapitoa—ma e ala i le filifiliga faafeagai e fatu ai le taunuuga faafeagai. Afai e leai ni taunuuga tumau o amioga, ona le puleaina lea e se tasi o taunuuga, ma e leai foi se uiga o le filifiliga.
Tai toa tasi, saunia e Whitaker Rane
Tulafono ma le Faamasinoga Tonu
O le faaaogaina o le faamasinoga tonu e avea o se faauigaga tutusa mo le tulafono, na saunoa ai Alema, “O lenei e le mafai ona faaumatiaina le galuega a le faamasinotonu [o le faagaoioiga o le tulafono]; a faapea, po ua le toe avea le Atua ma Atua” (Alema 42:13). O Lona malamalama atoatoa ma le faaaogaina o le tulafono—pe i se isi faaupuga, o Lana faamasinoga tonu—lea e tuuina atu ai i le Atua lona mana. Tatou te manaomia le faamasinoga tonu a le Atua, se faatulagaga o tulafono lemasuia ma le mausali lea o loo soifua ma faaaoga e Ia lava, ina ia mafai ona tatou maua ai ma faatino le faitalia.2 O lenei faamasinoga tonu o le faavae lea o lo tatou saolotoga e gaoioi ai ma ua na o le pau lea o le tatou ala i le fiafia sili.
Ua fetalai mai le Alii ia i tatou, “O le mea ua pulea i le tulafono ua faasaoina foi i le tulafono ma ua faaatoatoa ma faapaiaina i lea lava tulafono e tasi” (Mataupu Faavae ma Feagaiga 88:34). Ae e tatau ona tatou faailoa atu e leai se tasi o i tatou ua “pulea i le tulafono” e le aunoa ma i taimi uma. Ma e le mafai moni ona tatou tilotilo i le tulafono po o le faamasinoga tonu e faasao ma faaatoatoa i tatou pe a tatou solia le tulafono (tagai 2 Nifae 2:5). O lea la, o le amiotonu faapea foi ma le faaosofiaina e le alofa, na foafoaina ai e lo tatou Tama Faalelagi le alofa mutimutivale. Na Ia faia lenei mea e ala i le ofoina mai o Lona Alo e Toatasi na Fanaua e avea ma togiola e totogi ai a tatou agasala, o se Tagata e mafaia, i Lana Togiola, ona faamalie ai le faamasinoga tonu mo i tatou, e tauamiotonu ai i tatou i le tulafono ina ia mafai ai ona toe lagolagoina ma faasaoina i tatou, ae le o le tausalaina o i tatou. Na faamalamalama mai e Alema:
“Ma o lenei, e le mafai ona faataunuuina le fuafuaga o le alofa mutimutivale vagana ai ua faia se togiola; o lea ua togiola ai e le Atua lava ia mo agasala a le lalolagi, e faataunuu ai le fuafuaga o le alofa mutimutivale, e faamalie ai manaoga o le faamasinotonu, ina ia mafai ona avea le Atua ma Atua ua atoatoa, faamasinotonu, ma se Atua alofa mutimutivale foi. …
Peitai e i ai se tulafono ua tuuina mai, ma se faasalaga [ma taunuuga] ua faapipiiina, ma se salamo ua tuuina mai; le salamo lea, ua aia ai le alofa mutimutivale; a leai, e maua e le faamasinotonu le tagata ma faataunuu le tulafono, ma o le tulafono na te faaooina le faasalaga; afai e le faapea, o le a faaumatia galuega a le faamasinotonu, ma o le a le toe avea le Atua ma Atua.
Peitai ua le taofia le avea o le Atua ma Atua, ma e maua e le alofa mutimutivale le aia i le tagata ua salamo, ma e oo mai le alofa mutimutivale ona o le togiola” (Alema 42:15, 22–23).
Poo, seisi faaupuga, o le salamo o se mea tatou te faia e maua ai le meaalofa mutimutivale o le faamagaloga mai se Tama Oi le Lagi Faamasinotonu ua tuuina mai Ona O le Togiola a Lona Atalii Pele mo a tatou agasala.3
O Keriso o loo tatalo i le faatoaga i Ketesemane, saunia e Hermann Clemenitz
O Le Togiola a Iesu Keriso
Ona o le Togiola a Iesu Keriso, ua mafai ai ona toe faaleleia i tatou mai filifiliga leaga. Ona o le Togiola a Iesu Keriso, ua toe faaleleia ai le aafiaga i o tatou luga o i agasala ma mea sese a isi, ma isi faiga le tonu uma. Ina ia faaatoatoaina, ma ia avea ma e paia, tatou te manaomia ai se Faaola. O lea, o le tali i la tatou fesili o le, “Leai, e le mafai e le Atua ona faia soo se auala e finagalo ai o Ia e laveai ai se tagata. E le mafai ona tafilisaunoa o Ia ma avea foi ma se e amiotonu. Ma afai e le amiotonu o Ia, ua le o Ia o le Atua.” O le mea lea, e tatau ai ona faataunuuina le faaolataga ma le faaeaga i se ala e tausisia ai ma ogatasi ai ma le tulafono e le masuia, i le faamasinoga tonu. Ma e faafetaia ai le Atua, mai o se Faaola.”
Ia manatua i le fono tele i le muai olaga, sa lei ofo mai Lusifelo e avea ma o tatou faaola. Sa lei manao o ia e mafatia pe oti, pe faamaligiina sona toto mo i tatou. Sa lei saili o ia e avea ma faatusa o le faamasinoga tonu ae ia avea ma tulafono ia te ia lava.4 O lo’u manatu, i le fai atu ai i le Tama, “Tuu mai ia te au lou mamalu” (Mose 4:1), sa fai mai Lusifelo, “Aumai ia te au le aia tatau e pule ai,” ma le faamoemoe e faaaoga lena mana e tafilisaunoa ai. O le tulafono o soo se mea lava o le a fai mai ai o ia. I lena auala, e leai se tasi le gafatia e avea ai ma se tagata iloga tutoatasi. O le a maoae le tulaga o Lusifelo, ma e leai se isi o le a mafai ona alualu i luma.
I le isi itu, na malamalama Iesu o le a manaomia le le suia o le faamasinoga tonu ma le alofa mutimutivale ina ia agai ai i luma Ona uso ma tuafafine. Faatasi ai ma le Tama, sa Ia saili atu ia aua nei faamalosia ma pulea faamalosi i tatou, ae ia saoloto ma siitia i tatou ina ia mafai ai ona tatou i ai “i luga o mea uma” ma “[maua] le mana uma” faatasi ma le Tama (Mataupu Faavae ma Feagaiga 132:20).
E tatau ona tatou olioli ona sa naunau lenei Alo Ulumatua i le agaga e avea ma Alo e Toatasi na Fanaua i la le tino, e puapuagatia le mafaamatalaina ma maliu matagā e togiola i tatou. Na Ia tuufaatasia atoatoa le faamasinoga tonu ma le alofa mutimutivale. Ua Ia laveai i tatou mai—e le o le i a, ae mai i a—tatou agasala (tagai i le Helamana 5:10–11; tagai foi i le Mataio 1:21).
Ma ua Ia togiolaina foi i tatou mai le Pa’ū, mai le oti faaleagaga ma le faaletino. Ua Ia tatalaina le faitotoa i le tino ola pea ma le ola e faavavau. O le a le mafai ona fuaina le loloto o Lona alofa. “E moni, ua na tauave o tatou tiga, ma na tauave o tatou faanoanoa: …
“… A ua manuʼa o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea; o ona faalavalava foi ua malolo ai tatou” (Isaia 53:4–5).
Faamemeloga o le Tamameamea o Iesu, saunia e Matthias Stomer, Bridgeman Images
O le Viiga i le Atua
I le tulalata ai i le Kerisimasi, ou te iloa o nisi o loo i ai ni atugaluga ma atonu foi ma ni atuatuvalega e uiga i le lumanai. Atonu o tele ni “mea faalavefau” i lou olaga, o taimi e tele e faaaluina i luga o le initoneti e aunoa ma se malolo, e aunoa ma se taimi e filemu ma manatunatu loloto ai ma mafaufau, e aunoa ma se taimi e tilotilo atu ai i totonu ma iloatino po o fea o e i ai ma po o fea e tatau ona e agai i ai. Atonu e faatosinaina oe i faamoemoega le moni, e pei o le “faaatoatoaina e tatau ona vave oo mai” po o le “o le le faalavelaveina o le fiafia ma le manuia e tatau ona avea ma mea masani i le olaga.”
Ou te faamoemoe o le a outou faataatitia ese nei uiga sese, tuutuu i lalo le “malomaloā,” ma faaalu sina taimi i lenei vaitau o le Kerisimasi, ia le itiiti ifo ma se itula, po o le tele atu foi—e tomanatu ai i “le ofoofogia ma le mamalu o … le Alo o le Atua.”5 Ia avea o se itula o le faamautinoaga ma le toefaafouina mo oe.
I le lumanai ai o se vaitau o le Kerisimasi, sa ou tusia ai le savali lenei:
“Pe a tatou talanoa e uiga i le soifua mai o Iesu Keriso, tatou te tomanatu faalelei ai i mea na mulimuli mai ai. O Lona soifua mai sa matuai taua lava ona o mea o le a Ia oo i ai ma puapuagatia ai ina ia mafai ona Ia fesoasoani ia i tatou—na faatumutumuina uma i Lona Faasatauroga ma le Toetu (tagai i le Alema 7:11–12). …
“[Ae ou te] manatu foi e talafeagai lelei i lenei taimi o le tausaga e tau lava o le mafaufau e uiga i lena pepe i le faatanoa vao. Aua le lofituina pe faavevesiina i mea o le a oo mai. … Faaalu sina taimi filemu, ma le toafilemu e mafaufau loloto ai i le amataga o Lona soifuaga—le faatumutumuga lea o valoaga faalelagi ae o le amataga faalelalolagi mo Ia.
“Faaalu se taimi e malolo ai, ia maua le filemu, ma vaai faalemafaufau i lenei tamaitiiti laitiiti. Aua e te popole tele i mea e oo mai i Lona soifuaga po o lou olaga. Nai lo lena, faaalu sina taimi filemu e mafaufau loloto ai i le taimi atonu na sili ona to’amalie i le talafaasolopito o le lalolagi—ina ua olioli le lagi uma i le savali ‘O le Viiga i le Atua i mea aupitoaluga, ma le manuia i le lalolagi, o le finagalo alofa i tagata’ (Luka 2:14).”6