Faalatalata Atu: Alofa e pei ona sa Faia e le Faaola
E alala ia tusitala i Iuta, ISA.
E tele ni mea e mafai ona tatou aoaoina mai le faataitaiga a le Faaola o le fegalegaleai ma isi.
I le Vaieli, saunia e Crystal Close
I le avea ai ma tagata faatauatane/faatauafafine o Le Ekalesia a Iesu Keriso o le Au Paia o Aso e Gata Ai, e tele lava ina tatou liliu atu i le faataitaiga a le Faaola mo se fesoasoani e malamalama ai i le auala sili ona lelei e faatautaia ai mafutaga ma tagata o le Ekalesia faapea isi. I se tasi aso sa ma mafaufau ai i le ala na fetalai mai ai le Faaola ia i tatou ina ia “outou fealofani; faapei ona ou alofa atu ia te outou” (Ioane 13:34). Sa ma iloa le manaia ona sa lei fetalai mai o Ia “ona ua Ou alofa ia te outou” ae nai lo lena “faapei ona Ou alofa atu ia te outou.” O lenei mea na afua ai ona ma mafaufau i auala na alofa ai le Faaola i tagata. O a ni auala na Ia faaalia ai le alofa?
Sa ma filifili e faaalu se taimi e suesue ai le Feagaiga Fou, ma faafitoitonu le vaai mo ni tala e uiga i auala na fegalegaleai ai le Faaola ma isi tagata i le taimi o Lana galuega i le tino. I le avea ai o se tane ma se ava e feagai uma ma aafiaga o le tosina atu i itupa tutusa, ma aafiaga o le tosina atu i itupa tutusa, sa faapitoa ai lava ona ma mananao ia malamalama atili i le ala na taulimaina ai e Iesu i latou o e na foliga mai ua pa’u’ū i fafo atu o faauigaga a le lalolagi o uiga masani. O ni nai mamanu nei sa ma matauina.
Na Taulimaina e Iesu i le Agalelei ni Eseesega Faaleaganuu
Ua tatou ola i se vaitaimi o le tele o fevaevaeaiga faaagafesootai ma faaupufai, e pei lava ona sa i ai le Faaola i Lona soifuaga. O nisi o faafitauli o Ona aso sa i ai lava mo se taimi umi ma na matuai mauaa i le talafaasolopito ma talitonuga faaleaganuu.
Mo se faataitaiga, na fuafuaina lava e le Alii e malaga e ui atu i Samaria, o se nofoaga sa alofia e tagata Iutaia ona o ni masesei na tutupu i le fia selau tausaga ua tuanai. Ina ua fetaui Iesu i se mafine ma fai atu ia te ia e asu mai se vai, na foliga mai sa ia tali atu o se “isi” tagata faaupufai ma faalelotu—e taulai atu ai i le eseesega i le va o Ia o se Iutaia ma ia [mafine] o se Samaria. (Tagai Ioane 4.) O Iesu, i le tali atu, na taulimaina lenei mafine o se afafine o le Atua. O Lana tali atu i le talanoa ma ia i le agaalofa ma le faamaoni o se faataitaiga sili lea mo i tatou taitoatasi. O se togafiti masani a le fili o le taumafai lea e tavavae ese i tatou i ni vaega eseese, ma ia faasagatau le tasi ma le isi i se taua. “A e vaai Ieova i le loto” (1 Samuelu 16:7).
E faigofie lava ona faatatau le lesona i le tala lenei i o tatou tagata i le taimi nei. A o tatou agai atu i o tatou olaga i aso taitasi, e aofia ai sauniga ma gaoioiga a le Ekalesia, tatou te feiloai atu i tagata mai le tele o tulaga eseese. O nisi atonu ua faaigoaina e le lalolagi o ni fili faaupufai pe faaleaganuu. Nai lo le taulai atu i mea e ono tavavae ese ai i tatou, e mafai ona tatou filifili e taulai atu i mea tatou te tutusa ai o ni fanau a ni matua faalelagi ma aoao e talanoa atu i isi ma le alofa, e pei ona sa faia e le Faaola.
Ina ua asiasi atu le Faaola i tagata i Amerika ina ua mavae Lona Toetu, sa Ia aoao atu o “le tiapolo … o le tamā o le finauga, ma ua faaoso e ia loto o tagata ia fefinauai ma le ita, o le tasi i le isi” (3 Nifae 11:29). Sa faalogo tagata ia te Ia, ma i le isi augatupulaga na sosoo ai, na latou fatuina ai se nuu lea “sa leai se mauoa ma se matitiva, pologa ma se saoloto, ae sa tuusaoloto i latou uma, ma tofusia i le meaalofa mai le lagi” (4 Nifae 1:3).
Sa Faalatalata Atu Iesu Nai Lo le Taumamao
Sa taumafai malosi Iesu e faalatalata atu i isi, i le faalelagona ma e oo lava i le faaletino i nisi taimi, nai lo le faaaogaina o alofaga e faataumamao ai o Ia lava mai ia i latou o e sa masani ona inosia ma faate’aeseina.
Mo se faataitaiga, sa i ai se taimi na feiloai ai Iesu ma se tagata na gase lona lima. Ona o le Sapati lea, sa i ai tapu faalelotu e faatapulaa ai ituaiga galuega e tatau ona faia i lena aso. Nai lo le aloese mai se tasi sa manaomia se fesoasoani seia oo ina maua se isi avanoa na sili atu ona taliaina e tagata lautele, sa filifili Iesu e “agalelei” i le taimi lava lena (Mataio 12:12). Sa ia valaaulia le tagata e faaloaloa lona lima. “Ona faaloaloa ai lea e ia, ona toe lelei ai lea, ua pei o le tasi” (Mataio 12:13).
E talitutusa tala o loo faamatalaina pea lava pea i totonu o tusitusiga paia. Sa faailoa atu e Iesu ma le agaalofa i se fafine o lē sa manatulia ua le mamā (tagai Luka 8), taliaina ma faamaloloina se tagata na faalogoina leo ma selei o ia lava (tagai Mareko 5), ma faamalolo se tagata na faamasinoseseina e isi (tagai Ioane 9:1–7). O se tasi o mamanu ua tatou vaai i ai i tusitusiga paia o le, “ona aapa atu lea e Iesu o lona aao” (Mataio 8:3), sa masani lava ina ia uunaia ma alofa i isi ma tuuina atu le faamalologa ma le toafilemu.
Atonu o se tasi o valaaulia mai nei tala o le, e mafai ona tatou faalatalata atili atu ia i latou o e foliga e ese mai ia i tatou. Mo se faataitaiga, o tatou nonofo i autafa o se tasi o loo asiasi atu i le lotu, e tusa lava pe le o tutusa o latou la’ei ma isi tagata uma? Pe tatou te faia se avanoa mo i latou e auai ai i se talanoaga i le faapaologa? O tatou ataata ea ma faatalofa atu ma fai atu ni fesili agalelei i se taumafaiga ia iloa lelei atili ai i latou ma fesoasoani ia i latou ia lagonaina le faaaofiaina?
Ma atonu o le mea e sili atu ona taua, e mafai faapefea ona tatou atiina ae se sootaga vavalalata faalelagona ma faaleagaga ma isi, ma faasoa atu le filemu ma le alofa e pei ona sa faia e le Faaola? Ua tatou iloa e faamanuiaina i tatou e le Atua pe a tatou faia se taumafaiga e fesootai—aemaise lava ma i latou o e foliga mai e ese mai ia i tatou.
Sa Valaaulia e Iesu ia Tagata Ina ia Latou Talisua Faatasi
I le taimi o la ma suesuega o le Feagaiga Fou, sa ma ootia i le tele o taimi na faasoa atu ai e le Faaola se taumafataga i isi. I le tele o tulaga, sa faitioina o Ia ona o tagata sa Ia filifilia e faaalu ai Lona taimi.
I se tasi o faataitaiga, na valaauina ai e Iesu e avea ma se tasi o Ona soo se tagata e igoa ia Mataio, o se “telona,” po o se tasi na fai ma sui o le faigamalo na taitai i lena vaitaimi (tagai Luka 5:27; Taiala i Tusitusiga Paia, “Telona”). O telona sa masani lava ona itagia e tagata Iutaia. Ina ua talimalo la Mataio i se talisuaga tele mo Iesu ma Ona soo, sa faapea ona faitio le au tusiupu ma le au Faresaio—o i latou o e sa faapea ua mulimuli i poloaiga a le Atua. “Se a le mea tou te aai ai ma feinu ai faatasi ma le au telona ma e ua agasala?” na latou fesili ai. Na tali atu Iesu, “O e malolo e le aoga i ai le fomai, na o e mama’i” (Luka 5:30–31).
Iesu ma le Au Soo i le Vanu o Ketarono, saunia e Balage Balogh, Punaoa o Faatufugaga
O se faataitaiga mamana lenei o le ala na filifilia e le Faaola e ‘aua nei taa’iina e foliga e faaali mai i fafo po o manatu o le lalolagi. Nai lo lena, sa Ia taulai atu i manaoga, taua, ma gafatia o tagata taitoatasi. Na ma malamalama i se faataunuuga manaia a o ma faitau e uiga i talisuaga faatasi a Iesu ma Mataio ma isi. O le a le mafai lava ona tatou faatosinaina se tagata pe afai tatou te le maua le avanoa e faatasi ai ma i latou. Sei vagana ua tatou faaaluina le taimi e faamasani ai ia i latou, ma alolofa ma talia i latou i le mea o loo latou i ai i la latou malaga, atonu o le a itiiti ni o tatou aafiaga i o latou olaga.
Atonu ua outou faalogo i le faaupuga “Alofa i lē ua agasala; ita i le agasala.” Pe o lava ea se taimi tatou te faaaluina i le afa muamua o lena valaaulia? Ua fofoga mai e Iesu ia “outou fealofani” (tagai i le Ioane 13:34) ma faamagalo atu ia “fitugafulu ni fitu” (tagai Mataio 18:22). Nai lo le faaaluina o le taimi e taumafai ai e faailoa ma ita i le agasala a se isi tagata, e mafai ona tatou faaaogaina lena malosi e tapu’e ai sootaga ma o tatou uso ma tuafafine.
Ma te fiafia e faaaoga le faaupuga “Alofa i lē ua agasala; valaaulia i latou i le ’aiga i le afiafi!” Auā ua agasala tagata uma lava “ma ua le oo i le viiga mai le Atua” (Roma 3:23), o lenei mea e tatau ona tatou maua ai le tele o ni avanoa e auauna atu ai i isi e ala i ni taumafa e saunia ma le alofa, e laulauina i se nofoaga o loo i ai le Agaga o le Atua. Sei o tatou siomia a tatou laulau i talanoaga o le agalelei faamaoni, faauooga faamaoni, ma taumafaiga faamoemoeina e vaai atu i le tasi i le isi i le ala o loo silasila mai ai Iesu ia i tatou.
Fausiaina o Siona
Ua tatou faamanatuina i lenei tausaga le lua selau tausaga o le Uluai Faaaliga, ina ua fofoga mai e Iesu Keriso o le a toefuataiina mai ai Lana talalelei. O le tausaga a sau, o le a tatou aoao ai mai i faataitaiga a le Au Paia anamua o e na fesoasoani e fausia le malo ma i lenei tisipenisione. Sa tatau i le Au Paia anamua ona saili se auala e galulue faatasi ai ma ia lotogatasi, e ui lava ina sa latou o mai mai atunuu eseese, talitonuga faalelotu na i ai muamua, ma tulaga faaletamaoaiga.
Ua tatou feagai ma se avanoa tutusa i aso nei. E tatau ona tatou fuafua pe faapefea ona tatou lotogatasi i lo tatou faatuatua, e ui lava i eseesega faaleaganuu ma faaupufai ia e taumafai e vavaeeseina i tatou. E faato’a tupu lava lenei mea pe a tatou avea le Faaola e fai ma o tatou taiala. E malamalama lelei o Ia i o tatou vaivaiga ma e mafai ona [Ia] faia mea vaivai e avea ma mea malolosi (tagai Eteru 12:27). E malamalama lelei o Ia i o tatou tiga ma e mafai ona fesoasoani ia tatou malōlō (tagai i le Alema 7:11–12). E malamalama atoatoa o Ia i o tatou eseesega ma folafola mai pea e mafai ona tatou—e pei ona faamatalaina i le Mataupu Faavae ma Feagaiga 49:25 —tupuolaola ma olioli i Siona. Faatasi.