E Faapefea Ona Ou Talanoa i La’u Fanau e uiga i le Talalelei i Auala o Aso Uma?

I le avea ai ma matua, o la tatou galuega le aoao o a tatou fanau e uiga i le talalelei. Peitai, o se talanoaga o le talalelei e le faapea e tatau ona faamamalu ma aloaia! O nisi nei o manatu mo le lalagaina o talanoaga o le talalelei i aso uma o le olaga.

O Auala e 7 e Amata ai se Talanoaga

Pe na fesili atu ni au uo e uiga i mea tau lotu?
O a ni mea na e faitauina i tusitusiga paia talu ai nei? O i ai ni au fesili?
O faapefea mai mea i lou valaauga (po o se isi tofiga o le Ekalesia)? O le a se mea o le a fesoasoani ia te oe?
Sa ou mafaufau lava talu ai nei i le mau lea. O a ni ou manatu e uiga i ai?
Pe sa i ai se mea i le lotu i le asō na e fia fesili ai?
Pe o i ai se mea na tatou faitauina talu ai nei i le Sau, Mulimuli Mai ia te A’u, o loo e mafaufau pea i ai?
O le a sou manatu e uiga i na lauga o le konafesi aoao sa tatou matamata i ai?

Taimi e 7 o Talanoaga Faasamasamanoa

A o aai faatasi po o le taimi e momoe ai
Pe a feagai lau tama ma se taimi faigata
I le taimi o se galuega fesoasoani po o fesoasoani atu i isi
A o lei amataina ma le mae’a ai o sauniga po o gaoioiga a le Ekalesia
A o faamatalaina tala faaleaiga pe talanoa e uiga i tuaa
Soo se taimi lava e te matauina ai se mea e faatatau i se savali faaleagaga
Soo se taimi—pe afai e te talanoa atu ma le manatu tatala, le alofa i lou loto, ma se naunautaiga e faalogo ma malamalama

O Manatu ma Motugaafa

Aoao lau tama e le afaina le i ai o ni fesili e uiga i le talalelei. Aua foi, o se fesili na uunaia Iosefa Samita e tatalo mo se fesoasoani, lea na taitai atu ai i le Uluai Faaaliga! Fesoasoani ia latou iloa e mafai lava ona latou faafaileleina se molimau e aunoa ma tali uma lava.
Faaali atu pe a e lagonaina le Agaga, pe i le taimi o le afiafi faaleaiga, lotu, po o se lagoto matagofie. O lenei mea e mafai ona fesoasoani ia i latou e amata ai ona iloa pe faapefea ona talanoa mai le Agaga ia i tatou. Faamalamalama atu, o le Agaga e mafai ona fesootai mai ia i tatou, i le tele o auala eseese, e pei o lagona mafanafana po o le malamalama, mafaufauga manino, o se lagona o le filemu, ma isi.
Faafaigofie le mauaina o savali o le talalelei. Atonu e le sueina e lau tama talavou tusiga o mekasini a le Ekalesia i luga o a latou telefoni, ae atonu latou te susueina se Liahona o loo i luga o le laulau. Atonu latou te le faalogo i lauga o konafesi aoao i o latou taimi avanoa, ae atonu o le a latou pueina ni nai upu mai se lauga o loo e faalogologo i ai a o e kukaina le meaai o le afiafi.
O le mea e sili ona taua, ia taumafai pea, e tusa lava pe le foliga mai e aoga! Ua tumu tusitusiga paia i tala e uiga i tamaiti e lei faalogo i le taimi muamua, e pei o Alema le Itiiti. Ia faatuatua e i ai se aso o le a goto ifo ai upumoni faaleagaga i o latou loto.