O Meaalofa o le Kerisimasi po o le Sefuluai?
Sa ou talitonu e moni le talalelei, ae e mafai ona ou totogia le sefuluai?
Ata na tusia e Allen Garns
Sa ou saili mo se lotu seia oo ina faailoa mai a’u e tamaitai faifeautalai i Le Ekalesia a Iesu Keriso o le Au Paia o Aso e Gata Ai. Sa papatisoina au ma faamauina i le masina ma le afa mulimuli ane. O se tasi o mea na aoao mai e faifeautalai ia te au o le mataupu faavae o le sefuluai.
“O le a e maua faamanuiaga pe afai e te totogi le sefuluai,” sa la fai mai ai ia te au.
O au sa o se tinā nofofua. Sa tau le lava ni au tupe e faatau ai ni meaai ma totogi a’u pili. Sa masani lava o se mataupu o le totogiina o le sefuluai po o le faatauina o meaai, totogiina o mea e manaomia, po o le faia o se peimeni o le taavale.
Mo le tele o tausaga, sa ou feagai ma ni laasaga o le taumafai e totogi le sefuluai. Mulimuli ane, sa ou faapea ifo, “Afai e te talitonu e moni le talalelei, ona tatau lea ona ou laa e fai se mea. O le taimi lava e te laa ai e fai se mea, e mafai e le Atua ona faamanuia oe.”
E $500 la’u aitalafu i le sefuluai, ae sa ou manaomia foi se $503 e totogi ai ni pili. Ou te lei iloa pe o le a faapefea ona tupu, ae sa ou faapea ifo, “o le a na o lo’u taumafai lava.” Sa ou totogiina la’u sefuluai. Sa leai se tasi na iloaina sa ou manaomia se $503, ae na auina mai i le meli ia te au e se tagata na lē faailoaina mai lona igoa ni ta’i $100 pepa se lima.
Sa o se suiga tele lea mo a’u. Na suia ai au faaleagaga. Sa ou iloaina e alofa le Atua ia te au, e popole o Ia mo au, ma e finagalo o Ia ia ou manuia. Talu mai lena taimi, ua ou totogia la’u sefuluai. Ae e le’i faigofie i taimi uma.
I se tasi Kerisimasi i le tele o tausaga ua mavae, na manatua e la’u tama teine matua lona faalogo mai o o’u fai atu ua ou le gafatia ona totogi le sefuluai ma faatau ni meaalofa o le Kerisimasi mo ia ma nai ona tei.
“Sa matou iloa o le a matou le maua ni meaalofa, ae sa le afaina lea,” sa mulimuli ane fai mai ai la’u tama teine ia te au. “Sa matou filifili matou te mananao ia te oe e totogi lau sefuluai.”
E pei lava ona masani ai, na saunia e le Alii, ma sa lei tatau ona aunoa i latou ma ni meaalofa o le Kerisimasi.
Mo se tina nofofua ina ia mafai ona tausi lana fanau ma totogi le sefuluai o se mea telē tele. Talu ona ou faia le faaiuga e totogi le sefuluai, ua faamanuiaina lava au. Ou te le mauoa, ae e faia lava e le Alii se auala mo au.
Ua faamanuiaina foi au i isi auala. O faataitaiga lelei a tagata o le Ekalesia ma aiga ua fesoasoani lea ia te a’u ma la’u fanau ia toaaga ai pea i le Ekalesia. Na ou ta’u atu ia i latou o vaega uma na o faamanuiaga ua folafola mai e le Alii—o le a tatala mai pupuni o le lagi mo i tatou.