Faatinoga o le Fanau Mai o le Faaola a le Tuaoi
E alaala le tusitala i Texas, ISA.
“Ona ua fanau mai mo i tatou se tama” (2 Nifae 19:6).
Sa tu tetee Rosa i ona tamaivae a o ia fālō atu i fafo o le faamalama. Toe o ni nai minute ona taunuu mai lea o a latou uo!
O tausaga uma lava i le vaitaimi o le Kerisimasi, e fai ai e Rosa ma lona aiga tala faatino o le Fanau Mai o le Faaola. Latou te valaaulia i taimi uma tagata ina ia o mai ma auai faatasi ma i latou. O le taimi lenei sa latou valaaulia ai o latou tuaoi ma faifeautalai! Sa fiafia Rosa ona sa i ai se pepe a lona tuaoi e avea ma le pepe o Iesu.
Sa toeitiiti lava saunia mea uma. Sa aveese e Tina ia meaai māmā mai le ogaumu. Sa tapena ese e tuagane laiti o Rosa a latou meataalo uma. Sa tapena mai e Eleni ia teuga. Ma sa faapipii foi e Rosa i luga o le puipui se fetu tele lanu samasama mo le teuteuga.
“Rosa,” o le valaau mai lea a Tina i le umukuka. “E mafai ona e fesoasoani ia Eleni i le tapenaina o toniga?”
“Ua lelei, Tina!” Sa liliu atu Rosa e fesoasoani i lona uso, o lē sa sau ma se luuga o palanikeke i ona lima.
“Ua i ai a tatou palanikeke, solo, ma lavalava e sui ai mai le kapoti,” o le tala lea a Eleni. “E mafai foi ona tatou faaaogaina lenei ato e avea o se faatanoa vao faafoliga.” Sa ia tuu atu ia Rosa se ato lapoa lava. Sa tuu e Rosa se palanikeke vaivai i totonu mo le pepe.
“Ua atoatoa,” na fai mai ai Rosa.
Na toso e le tuagane laitiiti o Rosa se palanikeke efuefu i luga o lona ulu ma fai ai se foliga malie. “E mafai ona fai au ma se asini?”
Sa ata Rosa. “E leai, lou vale! Sa e manao e avea oe ma se Makoi, manatua?”
“Oi ioe!” o le tala lea a Jack. Sa ia uu mai le pale meataalo ma tuu i luga o lona ulu.
Ae tu’itu’i mai loa le faitotoa.
“Ua o mai!” Na fai mai ai Rosa. “O le a ou alu i ai.”
E lei leva ae tumu le fale i tagata fiafia. Sa fesoasoani Rosa i tagata uma e faamaulu o latou toniga. O tamaitai faifeautalai o leoleo mamoe. O ona tuagane ma lona uso sa fai ma Makoi. O le pepe aulelei sa fai ma le pepe o Iesu, ma o ona matua o Maria ma Iosefa.
Sa tui e Rosa se pulou vaivai, paepae. O ia o se mamoe.
Mulimuli ane, sa mae’a tapena uma tagata ma sauni e o. Sa susue e Elder ma Sister Yancey, o se ulugalii faamisiona mai le latou uarota, le Feagaiga Fou i le tala o le Fanau Mai o le Faaola. Sa latou faitauina leotele ia fuaiupu. Sa faatino e tagata uma a latou vaega.
I le faaiuga o le tala, sa usuina e tagata uma le “Po Filemu.” Sa lagonaina e Rosa le mafanafana ma le fiafia. Na ia iloa sa ia lagonaina le Agaga Paia. Sa pei na latalata Iesu i lona loto.
Ina ua uma le pese, sa ki e Tina le vitio “Samuelu ma le Fetu.” Sa fai e Eleni se tatalo. Ona latou aumaia lea o meaai mamā. Sa fiafia tagata uma i le faatasitasi ai.
“O le a la se vaega sa e fiafia i ai?” O le fesili atu lea a Sister Yancey.
“Sa ou fiafia i le usuina o le pese,” o le tala lea a Eleni. “Ma taaalo ma le pepe o Iesu.” Sa faaluelue e Eleni le pepe i luga o ona vae. Na la taaalo talu mai lava ona uma le pese.
“Sa ou fiafia i le aumaia o meaalofa ia Iesu,” o le tala lea a Siaki. Sa ia paleina lava le pale faafoliga.
“Ae a oe, Rosa?”
Na faaloloa faalautetele lima o Rosa. “Sa ou fiafia i mea uma!” sa ia fai atu ai ma le leo tele. “Ae o le mea sili lava, sa ou fiafia i le i ai o tagata uma iinei e faamanatu Iesu. Aua o le mea lena e faatatau i ai le Kerisimasi.”