Tatalo mo Max
Ina ua ono ou tausaga, na mananao se ulugalii matutua o la matou uarota e saili se aiga lelei mo le la taifau, o Max. Sa laua iloa o le a alolofa lo matou aiga ia Max. O lea na matou vaetamaina ai o ia!
I ni nai vaiaso mulimuli ane, na o mai ai nisi o a matou uo ma matou nonofo mo ni nai aso. Sa tumu lo matou fale i tamaiti taaalo sa tamomoe solo.
Ae sa masani Max i se fale manaia ma le filemu. O le i ai i se fale sa faatumulia i ni tamaiti pisapisao na matua fefe ai o ia. I se tasi aso a o matou taaalo ma talie, sa faafuasei ona matou iloa ua leai Max!
Na matou autilo solo mo Max. Na toetoe a ou tagi a o matou tietie solo ma lo’u tina i le pitonuu atoa. Sa oo lava ina matou siakiina i e na onaina muamua Max. Ae sa lei maua lava o ia.
Ina ua matou taunuu i le fale, sa fai mai se tasi, “Tatou tatalo mo Max!” Sa ma tootutuli i se lio ma fai se tatalo faatauvaa. Sa matou ole atu i le Tama Faalelagi mo ni manatu i le mea e su’e i ai Max.
O le taimi lava na matou fai atu ai “amene” na faalogoina se ou mai i le kapoti! O Max!
E silafia e le Tama Faalelagi i tatou taitoatasi ma e alofa ia i tatou. Atonu e le o taimi uma e vave oo mai ai tali i a tatou tatalo. Ma atonu o le a le tali mai le Tama Faalelagi i taimi uma i a tatou tatalo i le ala tonu tatou te mananao ai. Ae o le ala lena tatou te tuputupu ae ai i le faatuatua ma le onosai.
Afai e i ai ni ou faafitauli pe na o le fia talanoa lava, o le a faafofoga mai le Tama Faalelagi ia te oe i taimi uma!