O le Mana o le Tatalo i le Falepuipui
O le a ou manatua pea lenei Aso e sosoo ma le Kerisimasi.
Ata na tusia e Phil, Art
Sa ou i ai i le falepuipui mo le fa ma le afa tausaga ona o le taufaasese i le faatauina o fale ma fanua. O le toatele o tamaitai iina sa filemu ma faaaloalo. Ona siitia atu lea o ni tamaitai e toa 10 i le sela na faafesaga’i ma a’u.
Latou te feala i le leva o le po e taliē ma faalogologo i musika leo tetele. Na foliga mai sa latou le popole pe na faapefea ona aafia isi i a latou amioga. Sa fai mai i latou o loo matou potu faatasi ina ia ou talanoa atu ia i latou, ae o talanoaga faapenei e masani lava ona le iu lelei i le falepuipui. Nai lo o lena, sa ou tatalo mo nei tamaitai ina ia suia a latou amio ma ina ia toe foi mai le filemu, ae sa atili ai ona leaga mea uma.
A o tatalo i se tasi po, sa ou iloaina ai ou te lei faia lava se taumafaiga e faamasani i ou tuaoi. Sa ou alu atu loa i le latou sela i le aso na sosoo ai ma talanoa ma i latou. Sa latou faaali mai ia te au ni ata o o latou aiga ma e pele ia i latou. Sa latou faatoese mai mo le leotetele tele. Mai lava i lena taimi, sa latou talotalo mai ma sa foliga fiafia pe a latou vaai mai ia te au.
I ni nai vaiaso a o lumanai le Kerisimasi, sa latou valaauliaina a’u e fai aiga faatasi ma i latou i le Po o le vaeluaga o le Kerisimasi. Sa matou fuafua foi e fefaasoaai le tasi ma le isi i a matou aafiaga faaleagaga sa i ai. I le Aso na sosoo ma le Kerisimasi, sa matou faapotopoto faatasi ma faatautau ni nai teuga pepa. Sa lei i ai se matou laau Kerisimasi, ae sa matou lagonaina uma se agaga toafilemu. Ina ua mae’a la matou taumafataga faatauvaa o le ia o le tuna ma pateta, sa fefaasoaai o matou aafiaga. E eseese uma a matou talitonuga faalelotu ma o a matou tala taitasi sa tulaga ese, ae sa fesootai o matou loto ma sa i ai le Agaga iina.
Sa faamatala mai e April na maliu lona tinā mai le ova faaaogaina o fualaau faasaina a o 14 tausaga o April. Sa nofo April i magaala ma sa maua sana pepe lea sa ia tuuina atu mo le vaetamaina ina ua 15 ona tausaga. Sa tauivi o ia ma ona lava vaisū o fualaau faasaina, amata ona faia fefaatauaiga o fualaau faasaina, ma iu ai ina auina atu i le falepuipui.
“I se tasi aso sa ou mafaufau ai pe aisea ua ou ola ai,” o le tala lea a April. “E leai lava se eseesega pe ana ou oti. E leai se isi na iloa sa ou i ai i le falepuipui. O le a leai foi se tasi e iloa ua ou leai.” Ona ia tatalo lea ma fesili atu i le Atua pe Na te silafia lona tagata.
O le vaiaso na sosoo ai, sa tuu atu ai e se faufautua i le falepuipui ia te ia se tusi mai le teineitiiti lea na ia tuuina atu mo le vaetamaina.
“Masalo o loo silasila mai le Atua ia te oe,” o le tala lea a le faufautua.
“O lea ua ou tusi atu i la’u tama teine, ma ua faatasi ona ia asiasi mai ia te au,” o le tala lea a April. “E le tele sou iloa e uiga i mea tau lotu, ae ou te iloa e popole le Atua ia te au aua sa Ia tali mai i la’u tatalo.”
Ina ua uma ona faasoa mai e April lana tala, sa matou saofafai filemu uma ma maligiligi o matou loimata.
I lo’u taimi i le falepuipui, sa sasaa atu lo’u loto i le tatalo ma ole atu i lo tatou Tama oi le Lagi e leoleo ma puipui lo’u aiga. Ae ina ua ou tatalo mo o’u tuaoi i le falepuipui, sa amata ona ou iloa o latou gafatia paia ma lagonaina le alofa atoatoa ma le alofa mutimutivale o lo tatou Faaola.
Sa matagofie lena Po o le vaeluaga o le Kerisimasi i le falepuipui.