Maua le Meaalofa
O le suesueina o le afioga a le Atua, auauna atu, salamo, ma le alu i le malumalu o le a fesoasoani ia i tatou e lagona ai le alofa o le Atua i lenei Kerisimasi.
I se tasi afiafi o Novema, na ou taunuu atu i le fale ma iloa ai ua sui e la’u fanau lo latou potumoe i se fanuamatagofie o le Kerisimasi. O laau Kerisimasi, o fatu feilafi, manoa o moli, ma kiona pepa na teuteuina ai tulimanu, auivi o moega, puipui, ma le fa’alo. O se magālafu na faia i le fale na i ai uma ma ogalaau, molī, ma totini na faaatoatoaina le faaaliga. O lena vaaiga matagofie o le Kerisimasi na faamafanafanaina ai lo matou fale ma loto.
O le isi o vaaiga o le Kerisimasi ou te fiafia i ai lea sa faamatalaina e le perofeta o Nifae. O le tamā o Nifae, o Liae, na faasoaina se miti lea na ia vaai i ai i se laau matagofie, o ona fua na faatumulia ai lona agaga i le olioli (tagai i le 1 Nifae 8:12). Na manao Nifae ina ia vaai foi o ia i le laau lea na faamatalaina e lona tamā. O le tali i le tatalo, na faaali mai ai ia Nifae se faaaliga. Mo a’u, o le tala a Nifae i lena aafiaga, o se tala matagofie o le Kerisimasi. Na ia tusia:
“Ma sa oo ina ua uma ona ou vaai i le laau, sa ou fai atu i le Agaga: Ua ou vaai ua e faaali mai ia te aʼu le laau ua pele i mea uma.
“Ma sa fetalai mai o ia ia te aʼu: O le a le mea ua e manao i ai?
“Ma sa ou fai atu ia te ia: Ia ou iloa lona uiga …
“… Ma sa ou vaai i le aai o Nasareta; ma i totonu o le aai o Nasareta sa ou vaaia ai se taupou. …
“… Ma sa fetalai mai o ia ia te aʼu: Faauta, o le taupou ua e vaai atu i ai o le tinā lea o le Alo o le Atua, e tusa ma la le tino.
“… Ma sa ou vaai ma toe iloa atu le taupou, ua sapasapaia e ia se tamameamea i ona lima.
“Ma sa fetalai mai le agelu ia te aʼu: Faauta i le Tamai Mamoe a le Atua, ioe, o le Alo lava o le Tama Faavavau!” (1 Nifae 11:9–11, 13, 18, 20–21).
Ou te manatu e taua lena mea ina ua talosaga Nifae ia iloa le uiga o le laau, sa faaali atu ia te ia le uluai Kerisimasi. Ona fesili atu lea o le Agaga pe ua malamalama Nifae i le uiga o le laau. Na tuuina atu e Nifae lenei tali musuia:
“Ioe, o le alofa lea o le Atua, ua faamaligi ifo lautele o ia lava i loto o le fanauga a tagata; o lea, o le mea lea ua silisili atu ona manaomia i mea uma.”
Sa toe faaopoopo mai le Agaga, “Ioe, ma le silisili ona olioli i le agaga” (1 Nifae 11:22–23).
E ala mai i lenei aafiaga, na aoaoina ai e Nifae o le mea e sili ona manaomia ma olioli ai i o tatou agaga o le lagonaina lea o le alofa o le Atua e ala i Lona Alo, o Iesu Keriso. O le meaalofa moni lena o le Kerisimasi. Peitai, o le toatele o i tatou o loo tauivi e lagona le alofa o le Atua i o tatou olaga—e oo lava i lenei vaitau o aso fiafia. O fautuaga nei e fa o mea e mafai ona tatou faia e maua ai le meaalofa o le alofa o le Atua i lenei vaitau o le Kerisimasi.
1. Suesue Afioga a le Atua
Amata pe toe faafou se suesuega masani o tusitusiga paia ma upu a perofeta soifua. I le faaaliga vaaia a Liae, na ia vaai ai i “le ai uamea” (1 Nifae 8:19) e tau atu i le laau. O e na mauaina le alofa o le Atua na fepi’iti i le pito o le ai uamea, ma piimau pea i ai, ma fetaomi atu i luma seia oo ina latou aai i le fua o le laau (tagai i le 1 Nifae 8:30). Na aoaoina e Nifae o lenei ai uamea ua faatusa i le afioga a le Atua (tagai i le 1 Nifae 11:25).
E mafai ona tatou valaaulia le Alii i o tatou olaga e ala i le suesueina o Ana upu. O la tatou tautinoga e le tatau ona lofituina. Pe a fesili mai ni uo po o le a le umi e tatau ona latou suesue ai tusitusiga paia, e masani ona ou tali atu i ai, “Faitau seia e lagonaina le Agaga; ona e lagona lea e faaauau pea.” E le o le aofaiga o minute, fuaiupu, po o mataupu tatou te faitauina e taua. O le mea e sili ona taua o le aafiaga tatou te sailia ia maua ma le Agaga a o tatou suesue. O le a faamanuiaina i tatou e le Alii mo taumafaiga laiti uma tatou te faia.
O suesuega o le Sau, Mulimuli Mai ia te A’u mo Tesema e aofia ai le Tusi a Moronae ma se mataupu faapitoa ua faaulutalaina o le “Kerisimasi.” O le a se avanoa sili atu e faatofu ai i tatou lava i tusitusiga paia nai lo le suesue i tatalo o le faamanatuga ma upu a perofeta e pei o Moronae a o latou tuuina mai molimau mamana ma patino e uiga ia Iesu Keriso?
E mafai foi ona tatou suesue i upu a perofeta soifua e ala i le faitauina o le Liahona o konafesi aoao i Liahona po o le faalogologo foi i a latou lauga i le Potutusi o le Talalelei. E pei o le ai uamea i le miti a Liae, o a tatou suesuega faafouina o afioga a Keriso e mafai ona taitai atu ai i tatou ia iloa le alofa o le Atua i lenei Kerisimasi.
2. Auauna atu
Atonu o le Kerisimasi aupito sili ona faapelepele o lo’u talavou, o le tausaga na auai faatasi ai le matou aiga ma tamaitai ma alii o le matou aiga, ma tausoga e foai atu ni lavalava, meaai, meataalo, matatioata, ma masini e faaaoga i le fale i se aiga i le lotoifale na manaomia le fesoasoani. O le a le galo lava ia te au le avea ai ma se vaega toatele na aumaia le Kerisimasi i lo latou aiga. O lena lagona sa faaauau pea ina ua mavae le Kerisimasi ma foliga o le lotofaafetai o le tina ma lana fanau e toafa o loo tumau pea i lou mafaufau. O le auauna atu i lena aiga, na faatagaina ai le alofa o le Atua e “[faamaligi] ifo lautele o ia lava” (1 Nifae 11:22) i lo’u loto.
O a tatou auaunaga i isi e le manaomia ona maoae pe faigata. A o ou auauna ai o se epikopo, sa ou iloaina ai e toatele tagata i totonu o o tatou uarota ma alalafaga o e, i soo se aso lava, e lagona le tuuatoatasi, atuatuvale, po o le lofituina. O se valaau i le telefoni, feau tusitusia loloto, faamatalaga agalelei, kuka e fai i le fale, savaliga ma se tuaoi, po o se ofo e fesoasoani i fanau a se tasi, e mafai ona avea ma se vavega e auina mai le lagi ma se tali i se tatalo.
Afai o le a tatou ole atu i lo tatou Tama Faalelagi, “Pe i ai se tasi e mafai ona ou fesoasoani i ai i le asō?” atonu o le a oo mai se igoa po o ni foliga i o tatou mafaufau, ma o le a fesoasoani uunaiga mai le Agaga Paia tatou te malamalama ai pe faapefea ona tatou faamanuiaina lena tagata. A tatou galulue i na uunaiga, o le a tatou lagonaina le alofa o le Atua mo i latou ma i tatou foi.
O le taumafaiga taulamua a le Ekalesia o le “Faamalamalama le Lalolagi” ua fautuaina mai ai ni faatinoga faigofie o auaunaga e fesoasoani ai i isi ia lagonaina le alofa o le Atua. Afai e uunaia oe e le Agaga ina ia maua le meaalofa o le alofa o le Atua i lou olaga e ala i le auauna atu i lenei Kerisimasi, e mafai ona fesoasoani le Faamalamalama le Lalolagi e te amata ai (asiasi i le ComeuntoChrist.org).
3. Salamo
O le valaaulia lona tolu o le maua lea o le meaalofa a le Faaola o le salamo. Na aaoao mai Elder Lynn G. Robbins o le Fitugafulu: “O le salamo o le meaalofa maua gofie a le Atua e faatagaina ma mafai ai ona tatou o mai mai lea toilalo i lea toilalo e aunoa ma le ma’umauina o le naunautaiga. O le salamo e le o Sana fuafuaga faaleoleo lea pe a te’i ua tatou toilalo. O le salamo o Lana fuafuaga lea, ma le silafiaina o le a tatou toilalo lava.”1
E faigata lenei olaga. A o tatou taumafai e agai atu i la tatou sini o le ola e faavavau, e i ai o tatou faaletonu ma e manaomia ai le mana Togiola a le Faaola. O se tasi o mafuaaga na filifili ma le loto i ai le Faaola ia oo i le faasalaga o a tatou agasala, o le, ina ia mafai ona Ia ofoina mai ia i tatou le meaalofa o le salamo. Ua uma ona Ia totogiina le tau. O le mea o loo totoe e mo i tatou e filifili pe tatou te talia Lana valaaulia:
“O lea, soo se tasi e salamo ma sau ia te au e pei o se tamaitiiti, o ia lea o le a ou talia, ona ua faapea i latou o le malo o le Atua. Faauta, e mo i latou ia na ou tuuina ai i lalo lou ola, ma ou toe avea ai i luga; o lea ia outou salamo ai, ma o mai ia te au outou tuluiga o le lalolagi, ma faaolaina ai” (3 Nifae 9:22).
Ou te manatu o loo tatou tauaveina uma se avega o le agasala, telē pe itiiti, ua faapea ona uunaia ai i tatou e le Agaga e tuuese. E mafai ona fesoasoani o tatou epikopo ma peresitene o siteki. E i ai i le Faaola se uiga agalelei ma le loto faamagalo, ma ua Ia faaee mai foi ni lagona faapena i Ana auauna. Latou te alolofa ia i tatou ma e mafai ona fesoasoani ia i tatou ia faamaloloina e ala i le Togiola a le Faaola. E mafai e i tatou taitoatasi ona talia le ofo a le Faaola e o mai ia te Ia ma ia faaatoatoaina i lenei Kerisimasi.
4. Asiasi i le Maota o le Alii
O nisi o taimi na matuai sili ona ou lagonaina ai le alofa o le Atua, o totonu lea o Ona malumalu paia. O iina, sa faamauina ai i maua ma lou toalua faapelepele mo le olaga nei ma le faavavau. Ou te alu iina e saili ai le taitaiga mo faaiuga ma maua le filemu i taimi o le atuatuvale. I totonu o le malumalu, e foliga mai ai e sili atu ona mauagofie ai le lagi, ma o faaaliga e foliga mai e faigofie ma vave ona solo mai.
E tusa ai ma sauniga o le Perisitua Mekisateko, lea e aofia ai sauniga o le malumalu, na fetalai mai ai le Alii, “O ona sauniga, ua faaalia ai le mana o le faale-atua” (Mataupu Faavae ma Feagaiga 84:20).
A o tatou auai i sauniga o le malumalu, o le a tatou iloa le Atua, ma o le filemu ma le mana o se olaga faaleatua ua faaalia i o tatou olaga.
Na folafola mai e Peresitene Thomas S. Monson (1927–2018), “A tatou auai atu i le malumalu, e mafai ona oo mai ia te i tatou se maualuga o le faaleagaga ma se lagona o le filemu lea e sili mamao atu nai lo se isi lava lagona e mafai ona oo mai i le loto o le tagata.”2
Afai ua umi se taimi talu ona e lagonaina le filemu, aisea e le avea ai lenei vaitau o le Kerisimasi e faailoga ai le amataga o le auai soo atu i le malumalu pe a toe tatala? Afai e lei mauaina ou lava faaeega paia i le taimi nei, e mafai ona fesoasoani atu lou taitai i le uarota ma le paranesi ina ia e saunia. E mafai foi ona tatou lagonaina le alofa o le Atua a o tatou saili ma auina atu igoa o o tatou tuaa ina ia maua faamanuiaga o le malumalu.
O Le Meaalofa Moni
O le upu a le Atua, auaunaga faamaoni, salamo, ma le auai i sauniga o le malumalu o avanoa uma ia e maua ai le meaalofa moni o le Kerisimasi. Na tusia e le Aposetolo o Ioane: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi” (Ioane 3:16). O lenei Kerisimasi, ou te tatalo ia taialaina i tatou taitoatasi e le Agaga e filifili na mea o le a fesoasoani tatou te maua ai le meaalofa matagofie a le Atua o le alofa e ala mai i lona Alo, o Iesu Keriso.