O le a Misi se Tasi i le Tausaga a Sau
I le Po o le vaeluaga o le Kerisimasi, sa ou mafaufau i lo’u alofa tele i lo matou aiga. Ona ou lagonaina lea o se uunaiga manino.
Ata na tusia e Kendra Binney
O le Po o le vaeluaga o le Kerisimasi. Sa faato’ā matou mauaina lava o matou ofu moe fou, o se tu masani i lo matou aiga. Sa tāina e tamaiti musika o le Kerisimasi ma sa sisiva solo tagata uma. Sa leai se tasi na itaitagofie; sa fiafia tagata uma, ataata, ma sagisagi uma. I le iloaina o loo o’u tau’aveina se isi tamaitiiti, sa ou mafaufau ai i le tele o lo’u alofa i lo matou aiga, i lo’u fiafia tele i le toe maua ai o se isi tamaititi.
Ona ou lagonaina lea o se uunaiga manino. Sa musumusu mai le Agaga ia te au, o se tasi o lo matou aiga o le a le faatasi ma i matou i le tausaga e sosoo ai.
Mulimuli ane i lena po, a o ma tuuina ma lou toalua o Timi ia meaalofa i lalo o le laau, sa ia fai mai ia te au sa ia lagonaina se uunaiga i lena tauafiafi e faapea, o le a le faatasi ai se tasi o lo matou aiga ma i matou i le isi a matou Po o le vaeluaga o le Kerisimasi e sosoo ai. Sa ou ta’u atu ia Timi sa ou mauaina foi lea lava lagona e tasi.
Ae matou te lei malaga i se malaga i le uma ai o le Kerisimasi e asi aiga i fafo atu o le Setete, sa talanoa atu Timi i le ma fanau e uiga i le saogalemu a o matou malaga. Sa ma popole i le manatu o le toesea o se tagata o le aiga i la matou malaga, ae na ma lagonaina le faamautinoaga o le a lelei mea uma. Sa matou malaga, na matagofie le asiasi atu i tagata o le aiga, ma toe foi ma le saogalemu i le fale.
Sa lei umi ae oo i le taimi mo le siaki masani o lo’u maitaga. Na ta’u mai e le fomai se tala faanoanoa. O se fā’ata na faamaoniaina ai na maliu le pepe i le lua vaiaso a o lei o ese atu mo le matou malaga asiasi.
A o ma tietie atu ma Timi i le fale, ma le faanoanoa tele, na ma iloaina ai o le lua vaiaso talu ai o le Po lea o le vaeluaga o le Kerisimasi. Tatou te le iloa tonu le taimi e ulufale ai le agaga i le tino, ae na ma lagonaina ma Timi sa faatasi le ma pepe ma lo matou aiga, pe na o sina taimi, i lena Po o le vaeluaga o le Kerisimasi faatasi ai ma tagata uma sa sisiva solo ma fiafia. Sa matou lagonaina le olioli tele, ma sa ma lagonaina na avea le pepe ma se vaega o lena mea. Ina ua ia tuua i matou, matou te talitonu sa avea o ia ma tagata o lo matou aiga lea o le a le faatasi ma i matou i le isi Po o le vaeluaga o le Kerisimasi e sosoo ai. Ou te talitonu e i ai se aso o le a ma toe vaai ai i la ma pepe. Ou te faafetai mo le filemu ua aumaia ia te au.