Sau, Mulimuli Mai ia te A’u
O le A Se Mea o i Lau Lisi?
Taofi le lisiina o mea e te moomia, ae amata ona aumai mea e te manaomia.
O le a se mea e te manao moni i ai mo le Kerisimasi i lenei tausaga? O lea tatou talanoa i ni mea e sili atu na i lo nao meaalofa—o le a le mea e te manaomia moni?
O se mea e manaomia o se mea lea e tatau ona ia te oe ina ia e ola ai. I le vaitaimi o le Kerisimasi, e mafai ona faigofie ona taulai atu i na o o tatou manaoga faaletino, ae faapefea o tatou manaoga faaleagaga?
Meaalofa e Manaomia
Ua tatou iloa o o tatou agaga e i ai ni manaoga faifaipea, o meaalofa e pei o le suesue i tusitusiga paia ma le tatalo e fesoasoani e faataunuu ai, ae e i ai foi isi manaoga o o tatou agaga, e faalagolago lea i o tatou tulaga. Ua matou aoina mai ni nai tala mai talavou i le lalolagi atoa o e na mauaina isi “meaalofa” na manaomia e o latou agaga. A o e faitau, mafaufau po o a ni meaalofa e ono manaomia e lou lava agaga.
O Le Meaalofa o Uo
Na iloa e Rhoeta M., e 15 tausaga, mai Idaho, ISA, sa ia manaomia ni uo lelei a o ia sailiili i le Ekalesia. “Ina ua amata ona ou auai i sauniga faamanatuga, vasega, ma Tamaitai Talavou, sa vave lava ona faafeiloai au e le tele o foliga faauo ma se faapotopotoga agalelei. Sa ou aofia ai i gaoioiga uma, ma o uo fou sa ou maua sa uunaia au e mulimuli i le fuafuaga a le Atua. Sa latou fesoasoani ia te au e faatutu ma ausia au sini faaleagaga.” Ina ua uma ona aoao ai e faifeautalai ni mea se tele ma fesootai atu i ana uo i le lotu, sa faia loa e Rhoeta le faaiuga ina ia papatisoina. “Ou te matua faafetai ua ou mauaina ni tagata e ese le lelei,” o lana tala lea, “ma ua faamanuiaina au i le i ai i se suiga sili ona matagofie i totonu o le Ekalesia!”
O Le Meaalofa o le Seminare
Sa iloa e Juan R., e 16 tausaga, mai Chile o le seminare o se mea lea sa ia manaomia. “I le seminare ou te aoao ai i le upumoni, ma e tuuina mai e le Agaga ia te au le poto. Soo se taimi ou te lagona ai le Agaga, ou te iloa o loo ou i ai i le mea e finagalo le Atua ou te i ai i lena taimi. O ou lagona na pe a ou i ai i le seminare, o lea ou te iloa ai e taua lo’u i ai iina. Ou te iloa i taimi uma o le alu i le seminare o le a aumaia ai ia te au ni tali i fesili ma ni masalosaloga e ia te au.”
O Le Meaalofa o le Auauna Atu
Na iloa e Julie S., 16 tausaga, mai Texas, ISA, lona manaomia o se valaauga. “Talu ai nei lava na valaauina ai au o se taitai pese a le matou uarota, ma o lona uiga e tatau lava ona ou taunuu i le taimi tonu o le lotu! O se tauiviga lenei i taimi uma mo lou aiga, ma o lenei valaauga e le gata ina aumaia ai ia te au le olioli tele ona ou te fiafia i musika, ae ua tuuitiitia ai foi le vevesi vale o lou aiga i Aso Sa ae ia faatulaga lelei.”
O Le Meaalofa o le Talalelei
Na iloa e Sam D., 19 tausaga, mai Turkey o le mea na ia misia i lona olaga o le Ekalesia. “Sa papatisoina au i le 16 o ou tausaga, ma ina ua mavae lena, sa amata ona ou ola moni i lou olaga. Sa sili atu ona manino mea uma. Sa i ai se faamoemoega ou te ola ai.”
O A Ni Meaalofa E Te Manaomia?
Na mafai e nei talavou ona maua mea na latou manaomia e faatuputupu a’e ai a latou molimau, fiafia atili ai, ma faalatalata atili atu ai i le Atua. Ina ua uma ona faitauina o latou aafiaga, o a ni mea ua e matauina o nisi o manaoga o lou agaga? Fai se lisi e fesoasoani ia te oe e mata’itu ai.
Tuuina Atu ma le Taliaina
O lea la ua e faailoaina manaoga o lou agaga, e mafai faapefea ona e faataunuuina?
Amata i le faatutuina o sini ina ia ausia ai mea e te manaomia. O le faatutuina o sini o se auala sili lea e ausia ai ni mea fou, ma o le polokalama a Tamaiti ma le Autalavou e mafai ona fesoasoani ia te oe e amata ai.
E mafai ona avea lou aiga ma se isi nofoaga sili e maua ai le fesoasoani i le faataunuuina o ou manaoga—o lou aiga patino ma lou aiga o le uarota po o le paranesi. E oo lava i aso o Moronae, o se mafuaaga autu mo le faia o sauniga a le Ekalesia ina ia “talatalanoa o le tasi i le isi e uiga i le uelefea o o latou agaga” (Moronae 6:5).
Ma e moni lava, e finagalo le Tama Faalelagi e fesoasoani ia te oe e faataunuu ou manaoga faaleagaga ma faateleina lou faatuatua ia te Ia. Afai e te tatalo ia te Ia, e mafai ona Ia fesoasoani ia te oe e faailoa mea e te manaomia ma po o a foi sini e mafai ona e faatutuina.
I lenei Kerisimasi, aua le faatali mo se isi tagata e taumateina le mea o loo i luga o lau lisi o manaoga-faaleagaga—ia faatutu ni sini ma tuu atu na meaalofa e manaomia ia te oe lava! Ae, aua foi le faatali e fesili atu mo se fesoasoani ia ausia ai au sini. Ma, talu ai o le vaitau lenei o le tuuina atu, ia vaavaai mo ni auala e mafai ona e fesoasoani ai i isi e faataunuu ai foi o latou manaoga faaleagaga.
Aua nei galo le au Rhoeta ma le au Sam i le lalolagi. Atonu e le iloa lava e tagata o loo siomia outou le mea o loo latou misia—o mea latou te manaomia ina ia fiafia ai ma maua ai o latou faamoemoega—sei vagana ua outou faasoa atu le savali o le talalelei ia i latou. O le meaalofa sili lena e mafai ona maua e se tagata mo le Kerisimasi!