Fesili & Tali
O nisi o a’u uo e le o ni faatosinaga lelei. E mafai pea ona avea i matou o ni uo?
Ata mai le Getty Images, faatinoina e tagata e faataitaia
Faasoa Atu ni Mea Lelei
Afai o i latou o a’u uo, o lo’u tiute o le fesoasoani ia i latou ia lelei atili, ia faasoa atu le talalelei ma faamanuiaga uma ua ou maua e ala i le ola ai. Afai latou te le faaalia le fiafia i na mea lelei, atonu o le a amata ona gasolosolo ese tai tasi atu i latou. E ui lava e faigata, o nisi taimi o le mea sili lea ona lelei e tatau ona fai.
Matheus T., 16 tausaga, Minas Gerais, Pasila
Tautala Atu e Aunoa ma le Fefe
Ua iloa e a’u uo ou te auai i le Ekalesia. Sa matou talanoa e uiga i mea sa’o e fai ma mea e le sa’o. O le taimi nei, pe a ma faatasi ma la’u uo, na te faaalia ni amioga lelei, ma ou te fiafia i ai. O lenei mea ua aoaoina ai a’u e tatau ona ou tautala atu e aunoa ma le fefe.
Diego R., 16 tausaga, Aai o Mekisiko, Mekisiko
Ia Avea ma se Faatosinaga Sili Atu
E i ai a’u uo e le o ni faatosinaga lelei, ae e le faapea ai la ou te le tautala atu ia i latou. Ou te taulimaina i latou ma le faaaloalo ma le agalelei. Ou te le faamasino atu pe faitioina i latou. Ou te iloa e mafai e uo ona faatosinaina auala tatou te mafaufau ai ma amio ai, ma e mafai foi ona iloa ai le ituaiga tagata o le a avea ai i tatou. Soo se taimi ou te mafai ai, ou te faasoaina atu le talalelei ia i latou ma valaaulia i latou i gaoioiga a le Ekalesia.
Saireth V., 18 tausaga, Morelos, Mekisiko
Ia Faamuamua le Atua
Aua nei lotovaivai pe afai e le talia e au uo au faataitaiga lelei. O loo i ai se laina maaleale i le va o le manatu faapito ma le tausiga o le tagata lava ia. E le tatau ona e tuua i lalo ou tulaga faatonuina pe tuu ese ou talitonuga mo isi; ua tatou ola e faamalie le Tama Faalelagi, ae le o se isi lava tagata. Tatalo ma sailiili i tusitusiga paia mo le taitaiga, faalogo i uunaiga a le Agaga Paia, ma le mea sili ona taua, aua le avea mea o le lalolagi ma mafuaaga o lou se ese mai le ala sa’o ma le vaapiapi.
Riley E., 15 tausaga, Manila, Filipaina
Tutu i Nofoaga Paia
Sa ou aoaoina mai i o’u Taitai Faalelotu e tatau ona tatou tutu i nofoaga paia e tusa lava pe na o oe. Faaauau pea ona e ola i faatulagana ua uma ona e setiina i lou olaga ma lou loto. Taumafai e valaaulia i se lesona poo le sauniga faamanatuga. E mafai ona e tauavea le malamalama o le talalelei i soo se mea e te alu iai! Ma ina mea uma, faaali atu le alofa o le Faaola mo i latou uma
Allanis O., 18 tausaga, Setubal, Potukale