O Le Laau Atoatoa
“Sa fanau maulalo Iesu, ua afio nei i le mamalu” (Viiga, nu. 110).
“Mama, vaai foi i lea!” Sa tusi atu Iosua i le laau Kerisimasi. Sa umi ma mimiti, ma ni nila lanumeamata atoatoa.
Sa tu Mama ma tilotilo atu i le faailoga o le tau. Na lūlū lona ulu. “Leai, ailoga.”
Sa mapuea Iosua ma savali pea. Sa tumu le maketi i poloka o meaai ma laau Kerisimasi. Sa tumu i aiga o loo faatauina laau ma mea e manaomia e fai ai ni meaai suamalie, e pei o bûche de Noel. Sa aumai e Mama ia Iosua e faatau ni meaai, ae sa le mafai ona aveesea ona mata mai laau Kerisimasi. O nisi o laau sa uumi ma mimiti. O isi sa pupuu ma lapotopoto. Sa vaai foi Iosua i se tasi laau na tutusa lelei ma lona umī!
Na fai mai Mama e le tele ni a latou tupe i lenei tausaga. Atonu o le a le mafai ona latou faatauina se laau. O le mea lena na faanoanoa teisi ai Iosua. Soo se taimi lava e o ai i le maketi ma Mama, e autilo solo lava o ia mo le laau Kerisimasi atoatoa. Atonu, atonu lava, o le a la maua se laau e ave i le fale.
Sa u’u e Iosua le lima o Mama a o la savavali atu i le isi laina o laau. Na tau mole Iosua. O le la tonu a—le laau atoatoa!
Sa tamoe o ia i luma ma tuu le lima i luga o le laau. E le lanumeamata tele. Sa misi ni faaputuga o nila. Sa le umī tele. O le mea moni, sa pi’o tele, e pei o se toeaina o loo faalagolago i se tootoo.
“Mama, e atoatoa!” Na fai mai ai Iosua. “E mafai ona ta aveina i le fale? Faamolemole?”
Sa tilotilo Mama i le faailoga o le tau. “Ia, e le taugata tele. Ma ou te manatu e mafai ona ofi i totonu o le taavale.”
Sa tau le mafai ona faatali Iosua. Sa ta’alo’alo pea o ia i lima o lona peleue a o faatalitali mo Mama e totogi le laau. Ona fesoasoani lea o se alii lelei ia i la’ua e tuu le laau i totonu o le taavale. Ina ua la taunuu i le fale, sa fesoasoani lona uso laaia, o Matiu, ma Papa e aveese le laau mai le taavale. Sa latou aveina le laau i totonu ma tuu i le tulimanu o le latou potu pito i luma.
“Muamua, e tatau ona tatou faia moli,” o le tala lea a Matiu.
Sa faigata ona faatautau moli ona sa matuai pi’o lava le laau. Sa tuu e Matiu moli i le pito i luga. Sa tuu e Iosua nisi i le pito i lalo. Na sosoo ai ma le latou tautauina o teuga. Ona faaiu ai lea i le fesoasoani o Papa ia Iosua e tuu le fetu i luga o le tumutumu.
Sa palaka e Papa moli ma tuu atu ona lima e opo ia Mama. Sa ataata atu Iosua i le laau. O moli o le laau na mafanafana ma maua ai lagona lelei i le potu atoa. Sa nofo o ia i lalo o le laau ma tilotilo a’e i teuga lanu susulu ma le feilafi. Sa lei foliga pi’o ma faanoanoa i le taimi nei. Sa matagofie. Na atoatoa.
“O se laau atoatoa pei o Iesu,” o le tala lea a Iosua.
“O le a le uiga o lau tala?” O le fesili lea a Mama.
“O le tatou laau e pei lava o Iesu,” o le tala lea a Iosua. “Na soifua mai Iesu i se faatanoa vao palapalā. Sa palapalā ma faanoanoa le tatou laau i le maketi. Ae o lenei ua matagofie ma maoae le laau, e pei lava ona sa avea Iesu ma tupu lalelei.”
“O le tatou laau Iesu atoatoa,” o le tala lea a Papa. Ou te fiafia i lena.”
Sa ataata Iosua. O le a avea lenei Kerisimasi ma se Kerisimasi faapitoa.