O Faataitaiga Lototele
O Se Meaalofa o le Faauooga
O lenei tala sa tupu i Egelani ina ua faatoa mae’a le Taua Lona II a le Lalolagi.
Sa popole Hermann Mössner a o savali atu o ia i totonu o le falesa. O ia ma ana uo mai le tolauapiga sa ofuina pea o latou toniga, na faailogaina i mataitusi “P.O.T.” Na iloa uma e tagata o na mataitusi na faauigaina “pagota o taua.” Pe o a ni manatu o tagata o le paranesi? Mata o le a latou vaai ia te ia o so latou fili?
Sa latalata le falesa i Leeds, Egelani. Ae o Hermann e le sau mai Egelani. Na sau o ia mai Siamani. Ina ua uma ona faamalosia o ia e tau i le Taua Lona II a le Lalolagi, sa pueina Hermann e fitafita Peretania ma auina atu i se tolauapiga falepuipui faa-Peretania. O lona taimi muamua lea mai se vaitaimi umi ua toe alu ai le lotu.
Sa manavanava loloa Hermann ao ia nofo ifo i lalo i se tasi o nofoa umi. Sa mafai ona ia iloa atu le peresitene o le paranesi, o George Camm, o loo saofai mai i le pito i luma. O Peresitene Camm o se uo a Hermann. O le vaaia o ia o ataata mai na maua ai faalogona lelei o Hermann.
I nai masina ua mavae, na oo atu ai Peresitene Camm e asiasi ia Hermann i le tolauapiga ina ua ia faalogo na o ia lava le tagata o le Ekalesia iina. Sa fai si popole o Hermann i le taimi muamua. Pe o le a ita ea Peresitene Camm ia te ia? Aua foi, sa vatau o la atunuu i le taua.
Ae ina ua feiloai Hermann ma Peresitene Camm, sa la faaalia ni foliga ataata ma lululima. Ona la tatalo faatasi ai lea. Sa laua usuina ni pese ma talanoa e uiga i le talalelei. Sa la aai faatasi foi i le faamanatuga.
“Ou te alofa ia te oe, lo’u uso,” o le tala lea a Hermann ina o le a alu ese Peresitene Camm. Sa ia vaaia loimata i fofoga o Peresitene Camm a o ia talotalo faatofā mai.
Ina ua mavae lena, sa asiasi atu Peresitene Camm ia Hermann i Aso Toonai taitasi. I aso na totoe o le vaiaso, sa faia ai e Hermann le mea sili na ia mafaia e ola ai i le talalelei. Sa ia faasoa atu lana molimau i isi pagota a o latou galulue i le fanua. Sa ia taliina a latou fesili a o latou vaneina ni laau i le mae’a ai o se aso umi o galuega. O nisi taimi sa ia tatalo faatasi ma i latou.
“Sole, Hermann,” sa fai mai ai se tasi o pagota i se tasi po. “E mafai ona ou auai faatasi ma oulua ma Mr. Camm i le Aso Toonai?”
Sa ea a’e Hermann mai le poloka laau sa ia vaneina. Sa ataata o ia. “Ioe!”
“E mafai foi ona ou auai?” o le fesili lea a se isi pagota.
Sa fiafia tele Hermann ma Peresitene Camm e aoao atu le tele o pagota. E lei umi ae mananao nisi o i latou e papatiso!
Ma o lenei, a o tilotilo solo Hermann i le falesa i aiga o loo faatalitali mo le amataina o le lotu, sa ia lagona le filemu. O nisi tagata na popole i le i ai o Hermann i le taimi muamua. Ae e lei umi ae o latou fatuatuaina o ia. O isi pagota sa mananao e aoao e uiga i le talalelei na mauaina se faatagaga e tuua ai le tolauapiga ae o atu ma Hermann i le lotu i Aso Sa. Mulimuli ane, sa valaauina ai foi Hermann e avea ma peresitene o le Aoga Sa a le paranesi.
Ua mavae atu aso, ma ua latalata mai le Kerisimasi. Sa manao Hermann e faia se mea e faafetai ai i tagata o le ekalesia o e sa matua agalelei atu ia te ia. Ona oso a’e lea o sona manatu! Sa toeitiiti oo i le taimi o le pati o le Kerisimasi a le paranesi. Sa ao mai e Hermann ni poloka fafie se tele ma amata ona vaneina. Sa taitasi ona ia liliuina ia poloka i taavale laiti, elefane, vaalele, nofoaafi, ma solofanua.
Na iu ina oo mai le aso o le pati. Sa aai tagata uma ma usu faatasi pese o le Kerisimasi. Sa usuina e Hermann ma ana uo mai le tolauapiga ni pese o le Kerisimasi i le faa-Siamani.
Ona toso ane lea i fafo e Hermann se ato lapoa. I totonu sa i ai ni meataalo laupapa e 40! Na tuu e Hermann i tamaiti taitasi o le Peraimeri se meataalo. Sa o se Kerisimasi o le a le mafai ona galo ia i latou.