Na Fesoasoani ni Tamaiti Aoga Toga i nisi o Tamaiti o le Latou Vasega

Potu o Talafou

Na faaleagaina e se afi se fale o se aiga ae na maua ai e tamaiti aoga se avanoa e faaali atu ai po’o ai tonu lava i latou.

Afai e tupu se faalavelave matuiā i se nu’u o le atu Polenisia, e lē mafai ona mamao ese le fesoasoani. O le mea lava lena e tupu i nofoaga vavalalata i atunu’u o le Pasefika.

Ae faapitoa lava ona moni lena mea ia Tevita Lei, o se tamaitiiti aoga i le aoga maualuga a Saineha i Vava’u, Toga.

Ina ua faatamaia atoa lo latou fale e le afi, na leai ma se mea na faasaoina. I le aso na soso’o ai, na faatasitasi ai ana uo mai lana vasega ma talatalanoa poo a ni mea e mana’omia e le aiga e toe amata ona toe faatulaga ai lo latou aiga.

E faiaoga komepiuta ia Mele’ana Mafi i le aoga, e faatautaia e Le Ekalesia a Iesu Keriso o le Au Paia o Aso e Gata Ai. Na ia manatua le aso na va’ava’ai solo ai i lona potu ma ia iloa ai e i ai se isi o lo’o misi. Sa faamautinoa atu e tamaiti aoga o Tevita e lē o i ai.

Na fesili le faiaoga, “Aisea e le o i ai o ia inei?”

Na faapea mai se leo malū mai tua, “Na mu lona fale i le vaiaso na te’a nei.”

“Na avea lā matou talanoaga na ta’ita’ia atu ai tagata uma e mafaufau ai i tua atu o le mea e masani ai,” O le toe tomanatu lena a Mele’ana.

“Na amata ona ofofua atu ni mea e tamaiti aoga mo mea e sili ona mana’omia vave, e pei o toniga, mea aoga, ma ni ato aoga fou. O le toatele o isi tamaiti aoga na ofoina atu isi mea e pei o meaai, lavalava ma ie mafanafana.”

Na alu atu Mele’ana i le pulea’oga o Motuliki Fakatava, ma faailoa atu i ai le mea ua tupu ma fesili i ai pe maua se taavale mo le vasega e momoli atu ai mea na aoina. Sa talia lelei.

“O le taimi lava na ta’u mai ai e Mele’ana lenei tala,” o le lipoti mai lea a Motuliki, “na o’o mai ai ia te a’u se lagona lofituina o le faafetai. I nai masina ua tuana’i atu, sa u’una’ia ai a’u e amata ona faatulaga se mea e teu ai ni meaai ma ni lavalava, ae ou te leiloa pe aisea po’o ai fo’i e fai aga’i i ai. Ae o le taimi lava na ta’u mai ai e Mele’ana le tala lea, na ou iloa ai o le taimi lelei lenei ma se mafuaaga lelei.”

O le aso na soso’o ai, o tamaiti uma lava o le vasega komepiuta a Tevita na i luga o le pasi i le taimi o le periota muamua ma o atu ai e vaai po’o a mea o totoe o le fale. I le faaopoopo i mea na aumai e Motuliki, na aumai fo’i e tamaiti aoga mea uma lava na mafai ona latou aoina e aofia ai mea e mana’omia e pei o araisa, falaoamata, suka, pi ma masi.

Na latou maua atu Tevita ma lona tama na o laua faatasi ai ma malala o totoe o lo latou fale.

“Na ou ta’u atu i lona tama le mafua’aga o la matou asiasiga ma talosaga i se faatagana ina ia faia se faiga lotu pu’upu’u ma i la’ua,” o le tala lea a Mele’ana.

“Ina ua amata ona matou usuina le pese ‘Ia Vi’ia Oe le Atua,’ na matou lagona lava ma le faamaoni le i ai o le agaga ma matou mautinoa ai le alofa o le Atua i Ana fanau. O le agaga faamaoni o le tatalo na faia na pa’i mai i o matou loto ma maligi ai loimata o tagata uma.”

Sa ia faaauau ma faapea mai: “Na matua momomo lo’u loto ina ua matou taunu’u ma vaaia Tevita ma lona tamā i fafo o lo’o taumafai e faamama lefulefu ma mea na totoe o lo latou fale. Sa ou iloa i lo’u loto o le mea sa’o lenei mo matou e fai.”

O nisi o tamaiti aoga na faasoa o latou lagona e uiga i le latou asiasiga ia Tevita ma lona tamā:

“O anapo sa ou le mautonu po’o le a le mea e ave mo le aiga. Na o’o mai i lo’u mafaufau e le afaina pe na o se mea laitiiti, lapo’a, taugofie pe taugata, ae o le mea taua o le taumafai i le mea e gata ai e fesoasoani. E faaali atu ai i le aiga o Tevita e lē o le muta’aga lea ma e alofa le Atua agalelei ia i latou. Na ou vaaia le ata’ata i o latou foliga, ma sa faamanatu mai ai ia te a’u lo’u lava aiga.”
“Ou te faamoemoe o mea na matou tu’uina atu mo i latou o se fesoasoani tele lea mo lo latou aiga. O le fesoasoani atu i isi, tatou te aoao ai e alolofa atu ia i latou e pei o i tatou lava. Ou te faafetai, ma ia faamanuia le Atua i lo latou aiga.”
“Ina ua matou taunu’u, sa ou vaai faalemafaufau ia te a’u i le tulaga lea ua tupu ia te ia, i le faigata ma le tauiviga ina ia ola. Na matuā o’otia lo’u loto ina ua fai mai lona tamā e faafetai i le i ai o se aiga o Tevita e ese mai lona lava aiga moni, o lona uiga o matou, o lana vasega komepiuta.”
“O le vaai atu i a’u uo i le vasega ma lo latou naunau e fesoasoani ia te ia na matuā pa’i mai i lo’u loto. Na faaalia ai le alofa o se aiga o lo’o i ai i la matou vasega. E le taua po’o le a le telē o le matou fesoasoani ia Tevita Lei, e lē o le tāua lenā, ae o le mea taua o le loto fia fesoasoani o la matou vasega e tu’uina atu o matou lima fesoasoani i lō matou uso pele. O le a matou le tu’uesea lava se isi.”
“Na ou iloa lava le fiafia tele o le tama o Tevita ma faafetai i se mea ua mafai ona matou faia. Na ia faapea mai o lea ua ia lagonaina ‘o lo’o i ai se aiga mo lona atali’i e vaaia faalelei o ia.’ O tagata uma i le olaga lenei e aiga.”
“O le taimi na ou vaai atu ai i le uso lenei, na faatumuina ai lo’u agaga i le agaga o le alofa. Ou te faafetaia lo’u faiaoga ona o le agaga na musuia ai i matou o se vasega komepiuta e asiasi atu i lō matou uso pele o Tevita Lei. Na ou lagonaina le alofa o Iesu na ia te Ia mo Lana fanau.”

Na aotele e Mele’ana ona lagona e uiga i lenei a’afiaga: “Ou te faafetai tele mo le avanoa e aapa atu ai la matou vasega ia Tevita. O le mea lea na tupu i lenei taeao o se amataga maoa’e lea mo matou i lenei aso. O gaoioiga o le alofa, galulue faatasi, alofa, lagona malamalama ma le auaunaga, e atagia ai o latou tagata moni lava. O i latou o atali’i ma afafine o le Tama Faalelagi.”

“Ina ua ou toe fo’i atu i le potuaoga ma ou toe mafaufau i la’u vasega ma le lelei ma le alofa tunoa o le Atua mo Lana fanau, na o’o mai ai i lo’u mafaufau le mau o lo’o i le Alema 26:37 (O le Tusi a Mamona: O Se Tasi Molimau Ia Iesu Keriso):

“O lenei o’u uso e, ua o tatou vaai e manatu mai le Atua i tagata uma, i so’o se laueleele atonu ua latou i ai; ioe, ua Ia faitauina Ona tagata, ma Lona alofa mutimutivale ua i luga o le lalolagi uma. O lenei o lo’u olioli lea, ma la’u faafetai tele; ioe, ma o le ou avatu le faafetai i lo’u Atua e faavavau.”