Fakaʻilekitulōnika Pē
Ko e ʻUhinga ʻOku Ou Kei Tauhi ai e Lea ʻo e Potó ʻi he Taimi ʻOku Ou Toutou Fehangahangai Ai mo e ʻAhiʻahí
ʻOku nofo ʻa e tokotaha naʻá ne faʻú ʻi ʻIutā, USA.
Ko e inu kava mālohí mo e kofí ko ha meʻa angamaheni pē ia ʻa hoku kaungā ngāué, ko ia ne u faʻa ongoʻi hangē ha taha mei tuʻá. Ka ʻi heʻeku manatuʻi ʻa e ʻuhinga ki he Lea ʻo e Potó, naʻá ne tokoniʻi au ke u maʻu ha mālohi.
ʻI heʻeku tupu haké, naʻá ku faʻa sio ki hono maʻu ʻo e ʻolokaholó, tií, mo e kofí, pea ko e lahi tahá ko e taimi naʻá ku feohi ai mo hoku kāinga ofi tahá. Ko au pē mo hoku fāmilí ʻa e mēmipa ʻo e Siasí ʻi he lotolotonga ʻo hoku kāingá, pea ʻoku ʻi ai ha taimi ʻe niʻihi, ne hangē ʻoku fakalotosiʻí pea fakataʻelata ʻi he taimi ne siolalo mai ai ha niʻihi ki heʻeku tuí. Ka naʻá ku ʻiloʻi naʻe moʻoni ʻa e ʻOtuá, naʻá ku maʻu ʻa e tui ki Heʻene ongoongolelei kuo fakafoki maí pea mo ʻeku ngaahi fuakava ʻi he papitaisó, pea naʻá ku ʻiloʻi naʻá Ne finangalo ke u fai ha ngaahi fili lelei.
ʻI heʻeku hiki ki Lonitoni, ʻIngilani, ʻi hoku taʻu uofulu tupu siʻí, naʻá ku kamata ngāue ʻi ha pangikē fakavahaʻapuleʻanga. Naʻe moʻui ʻa e tokotaha kotoa pē mei he tií mo e kofí ke nau lava ʻo ngāue vave ʻi homau feituʻu fefakatauʻaki vavé. ʻI he ʻaho hono ua ʻo ʻeku ngāué, naʻe ngaohi mai ʻe heʻeku pulé ha ipu tī. Naʻá ku fakamālō ange ka naʻá ku talaange ʻoku ʻikai ke u inu tī—naʻá ne ʻomi fakavavevave pē ha kofi kiate au.
Naʻá ku ʻiloʻi naʻá ne angaʻofa pē, ka naʻá ku fakapapau ke tauhi ʻeku ngaahi tuʻunga moʻuí. Neongo naʻá ku kiʻi ongoʻi faikeheʻia, ka naʻá ku fakamatalaʻi fakaikiiki ange ʻa e ʻuhinga ʻoku ʻikai ke u inu tī pe kofi aí, pea naʻe lava ke u vahevahe kiate ia ha niʻihi ʻo ʻeku ngaahi tuí, kau ai ʻa e Lea ʻo e Potó.
Ko ha aʻusia maʻongoʻonga ia, ka naʻe ʻikai ke faʻa hoko lelei maʻu pē ʻa e ngaahi tūkunga tatau.
Fehangahangai mo e ʻAhiʻahí
ʻI he fakalau atu ʻa e taimí, naʻe faingataʻa ke u tauhi ʻeku ngaahi tuʻunga moʻuí ʻi hono ʻākilotoa au ʻe he inu kava mālohi ʻa e niʻihi kehé. Naʻe hoko ʻeku ʻalu mo e kau kasitomaá mo e kaungā ngāué ki he ngaahi feituʻu inu kavamālohí ko ha meʻa angamaheni. Naʻe fakaʻau ke u helaʻia ʻi hono fakamatalaʻi ʻa e ʻuhinga ne ʻikai ke u inu aí pea ʻi ai mo ha ngaahi taimi ʻe niʻihi naʻá ku fie maʻu pē ke tali lelei au.
Kae hiliō ʻi heʻeku fiemaʻu ke u hoko ko ha faʻifaʻitakiʻanga ʻo ha ākonga ʻa Sīsū Kalaisí, ko ia naʻá ku ako ai ha ngaahi founga ʻe niʻihi ke tokoniʻi au ke matuʻuaki ʻa e ʻahiʻahí:
-
Naʻá ku lotua ha mālohi ʻi he pongipongi kotoa pē ke fai ha ngaahi fili ʻoku leleí.
-
Naʻá ku faʻa fanongo ki he ngaahi lea ʻo e konifelenisí pe ngaahi himí ʻi heʻeku fononga ki he ngāué.
-
Naʻá ku fakapipiki ʻeku folofola manakó ki heʻeku sioʻata ʻi falekaukaú ke lau ʻi he ʻaho kotoa pē: “ʻOku ou ʻiloʻi ko e meʻa noa pē au; pea ko e meʻa ki hoku mālohí ʻoku ou vaivai; ko ia ʻe ʻikai te u pōlepole ʻiate au, ka te u pōlepole pē ʻi hoku ʻOtuá, he te u lava ke fai ʻa e meʻa kotoa pē ʻi hono māfimafí” (ʻAlamā 26:12
-
Naʻá ku kole tokoni ki hoku kaungā ngāue ofi tahá, ʻo kole ange ke nau poupouʻi au ʻi he taimi ʻe foaki mai ai ʻe he niʻihi kehé ha “inu pē ʻe taha.” Naʻe lava ke nau tala ʻa e taimi naʻá ku ongoʻi taʻefiemālie aí pea ʻi he angaʻofa, naʻa nau fakatau mai haʻaku “vai ne ʻi ai mo ha fanga kiʻi poloka” ke tokoni mai ke ʻoua te u ongoʻi taʻeoliʻia lolotonga e ngaahi fakatahaʻanga ko ʻení.
-
Naʻá ku ngāue mo ha niʻihi tui fakalotu tokolahi ne nau tauhi e ngaahi ʻulungaanga fakamolale ne faitatau. Naʻe ʻi ai ha niʻihi tokosiʻi ʻo e kau Mosilemi naʻá ku feohi mo iá, pea naʻa mau faʻa tangutu fakataha lolotonga e ngaahi polokalama fakangāué he naʻe ʻi ai e mālohi ʻi he tokolahí. ʻI heʻeku feohi mo e kakai fakakaukau tataú naʻa nau fakaʻapaʻapaʻi ʻeku ngaahi tuʻunga moʻuí (vakai, Tangata Malanga 4:9–10).
-
Naʻá ku feinga ke tokanga taha ki heʻeku fuakava ʻi he papitaisó ke “manatu maʻu ai pē kiate Ia” (vakai, Tokāteline mo e Ngaahi Fuakava 20:77, 79), ʻa ia naʻá ne tokoniʻi au ke u ongoʻi lahi ange ʻa e Laumālié. Kuó u palōmesi ke muimui ki he ʻOtuá pea hoko ko ha ākonga ʻa Kalaisi, pea ʻi heʻeku feinga ke manatu maʻu pē ki he Fakamoʻuí, naʻá ne tokoniʻi au ke u maʻu ha fakakaukau ʻoku taʻengata mo taʻefakangatangata ʻi he ngaahi momeniti fakangatangata taha ʻo e ʻahiʻahí.
Manatuʻi ha Taumuʻa Māʻolunga Ange
Ka ko e meʻa kuó ne tokoniʻi lahi taha au ʻi hono tekeʻi ʻo e ʻahiʻahí ko hono ʻiloʻi ʻoku ʻi ai ha taumuʻa māʻolunga ange ʻa e ʻEikí ki hono tauhi kotoa ʻEne ngaahi fekaú, kau ai ʻa e Lea ʻo e Potó. Pea ʻoku ou ʻilo kuo tāpuekina maʻu pē ʻeku moʻuí ʻi ha ngaahi founga lahi ʻi heʻeku tuʻu maʻu ʻi he ngaahi fekaú. (Vakai, Tokāteline mo e Ngaahi Fuakava 82:10.)
Kuó u fakatokangaʻi ko e Lea ʻo e Potó ʻoku mahulu hake ia ʻi he taʻe-maʻu pē ʻo e kava mālohí mo e ngaahi meʻa mālohi kehé. Naʻe foaki mai ʻe he Tamai Hēvaní ʻa e fekau ko ʻení ke tokoniʻi kitautolu ke tau tauhi ʻa e moʻui leleí mo akoako ke mapuleʻi kitautolu, ke maluʻi kitautolu mei he ngaahi maʻunimā mo e ngaahi nunuʻa kehé, pea fakaʻatā ke tau maʻu ha poto mo ha ʻilo lahi ange (vakai, Tokāteline mo e Ngaahi Fuakava 89).
Kuó u mamata ko e taimi ʻoku tau fakahaaʻi ai ʻetau talangofua ki he fanga kiʻi meʻa faingofua ʻoku kole mai ʻe he ʻEikí, ʻoku tupulaki ʻetau malava mo e holi ke tauhi kotoa ʻEne ngaahi fekaú, pea te tau lava ʻo ako ke ikunaʻi ha ngaahi ʻahiʻahi mo ha ngaahi faingataʻa lahi ange (vakai, 2 Nīfai 28:30).
ʻOku ou ʻilo ʻoku ʻofa ʻa e Tamai Hēvaní ʻiate au pea te u lava ʻo ikunaʻi ʻa e mālohi fakatoʻú mo e ʻahiʻahí ʻo fakafou ʻi Hono mālohí mo e mālohi ʻo e Fakamoʻuí. ʻOku ou manatuʻi maʻu pē ʻa e ʻAlamā 7:11–12, ʻa ia ʻokú ne fakamatalaʻi ʻa e founga ʻoku ʻafioʻi ai ʻe he Fakamoʻuí ʻa e meʻa kotoa pē ʻoku tau fehangahangai mo iá—ʻa e ngaahi mamahí, faingataʻá, pea naʻa mo e ngaahi ʻahiʻahí. ʻOkú Ne ʻafioʻi e founga ke “tokoniʻi ai ʻa hono kakaí ʻo fakatatau ki honau ngaahi vaivaí.”
ʻI heʻeku fakafalala kia Sīsū Kalaisi ke tokoniʻi au ʻi hoku ngaahi vaivaí, kuó u ongoʻi e hū mai Hono mālohí ki heʻeku moʻuí, pea ʻoku ou ʻiloʻi kakato ange ʻokú Ne ʻiloʻi moʻoni kitautolu. Pea ʻi he taimi ʻoku tau fehangahangai ai mo e ʻahiʻahí, ʻokú Ne mateuteu ke tokoniʻi kitautolu ke tau vakai ki he ʻata lahi angé pea fili fakapotopoto. Ko e meʻa pē ʻoku fie maʻu ke tau fakahokó ko e hanga kiate Ia.