Faivelenga ʻi he Fakaʻau ke Motuʻa Angé
Ngaahi Taumuʻa maʻá e Kau Matuʻotuʻa Loto kei Talavoú
ʻOku nofo ʻa e tokotaha naʻá ne faʻú ʻi ʻIutā, USA.
ʻI heʻeku ako ki he polokalama foʻou ʻa e Fānaú mo e Toʻu Tupú, ne u loto ke u kau ki ai.
Tā fakatātaaʻi ʻo e ʻatá mo e ngaahi ʻata ʻo e sonar wave mei he Getty Images
ʻI he taimi naʻe kamataʻi ai ʻe he Siasí e polokalama foʻou ʻa e Fānaú mo e Toʻu Tupú, ne u fanongo ki hono talanoaʻi heʻeku fānaú mo hoku makapuná ʻenau ngaahi palani ki he ngaahi taumuʻá mo e ʻū lēsoní. ʻOku ou meimei taʻu 80, ka naʻá ku loto ke u kau ki he faingamālie ki hono langaki e fakamoʻoni maʻongoʻonga ko ʻení.
ʻOku nofo ʻeku fānaú mo e ngaahi makapuná ʻi he feituʻu kehekehe ʻi he fonuá, pea ko ia ai ʻoku ʻikai ke mau lava ʻo fetaulaki tonu. Neongo ia, naʻa mau loto ke fai ha fakataha fakamāhina ʻi he ʻinitanetí. ʻE hanga ʻe ha taha ʻo hoku makapuná ʻo fakahoko ha lēsoni mo tataki ha fealeaʻaki ʻi he ongoongoleleí. Hili iá, pea toki vahevahe ʻe he taha kotoa ʻenau ngaahi taumuʻá mo ʻenau tupulaki ʻi hono aʻusia kinautolú. Ko hono moʻoní, ne ʻi ai e ngaahi taumuʻa ne fakataautaha, pea naʻa mau fakaʻapaʻapaʻi pē ʻa e totonu fakafoʻituitui ʻa e taha kotoa.
ʻI heʻeku talanoa mo hoku makapuná ki heʻenau ngaahi taumuʻá, ne u kamata fakakaukau leva ki heʻeku ngaahi taumuʻá. Ko e hā naʻá ku loto ke fakahokó?
Ko ha lisi ʻeni ʻo e ngaahi taumuʻa ne u fokotuʻú, ʻo muimui ʻi he ngaahi tefito mo e sīpinga naʻe ngāue ʻaki ʻi he polokalama ʻa e Fānaú mo e Toʻu Tupú. ʻOku ou loto ke ui kinautolu ko ʻeku ngaahi taumuʻa maʻá e kau loto kei talavoú.
Fakaʻatamaí. Naʻe kole ʻe heʻemau kau palesitenisī ʻo e Fineʻofá ki he houʻeiki fafiné ke nau ako maʻuloto ʻa e “Ko e Kalaisi Moʻuí.”1 ʻOku lōloa, ka ne u ʻiloʻi te u kei lava pē ʻo ako maʻuloto ha naunau lahi pehē, pea naʻe hangē ia ko ha taumuʻa ʻaongá.
Fakalaumālié. Ne ʻi ai ha ngaahi taimi ʻi heʻeku ngāue ʻi he temipalé, ne u tuʻu ʻi ha houa ʻe taha pe lahi ange ʻi he sitepú ke fakahinohinoʻi e kau pataloní ki he loki fetongí. ʻOku ou saiʻia hono fakafemoʻuekinaʻi hoku ʻatamaí, peá u loto ke ako maʻuloto e ngaahi veesi motuʻa mei he Fakataukei Folofola ʻa e seminelí ʻi he Tohi ʻa Molomoná. ʻI he taimi naʻe tāpuni ai e ʻū temipalé ʻi he lolotonga e mahaki fakaʻauha ko e COVID-19, naʻe kei hokohoko atu pē ʻeku taumuʻa ko ʻení. ʻOku hanga ʻe he ako maʻulotó ʻo ʻomai ha meʻa ke fai ʻe hoku ʻatamaí mo fakafonu ʻaki au e Laumālié.
Fakatuʻasinó. Naʻe makatuʻunga e ngaahi taumuʻa fakatuʻasino homau fanga makapuná ʻi he hulohulá, volipoló, mo e fānifó, mo ha ngaahi meʻa kehe. Naʻe ʻikai ke ola lelei e ngaahi taumuʻa ko iá kiate au, ko ia ai ne u fakakaukau ke u lue ʻi ha ngaahi kilomita siʻisiʻi he ʻaho kotoa pē. ʻOku ou ʻilo ʻoku ou toe tokanga ange ʻi heʻeku fakamālohisinó. ʻOku kau lelei ia ki hoku ʻatamaí mo hoku sinó.
Fakasōsialé. ʻOku ou saiʻia ʻaupito he fetuʻutaki maʻu pē mo ʻeku fānaú mo hoku makapuná. Ne mau faʻa talanoa he telefoní (pea ʻoku kei pehē pē), ka ko e founga foʻou ʻo e fetuʻutakí he taimi ní ko e text. Naʻe akoʻi au ʻe he fānaú fekauʻaki mo e emojis mo e fanga kiʻi vitiō nounoú.
Naʻe fakakau ʻe ha niʻihi ʻo hoku makapuná ʻa e ako ke feimeʻatokoní, ko ha taumuʻa. ʻI heʻenau haʻu ki homau feituʻú, naʻa mau feimeʻatokoni fakataha. Ko kinautolu ko ia naʻe nofo mamaʻo atú, naʻa mau fetāʻaki vitiō pē mo kinautolu ʻo aleaʻi e ngaahi founga feimeʻatokoní mo feimeʻatokoni ʻi he taimi tatau pē.
ʻOku ou toe manako foki ke tā telefoni ki he kau fafine ʻoku ou ngāue fakaetauhi ki aí. ʻI he taimi ko ia ʻo e tauhi e vāmamaʻo fakasōsiale koeʻuhi ko e mahaki fakaʻauhá, naʻe hoko e talanoa he telefoní ko ha founga fakaʻofoʻofa ia ʻo e fetuʻutakí. ʻOku ʻi ai e taimi ʻe niʻihi ʻoku ou ʻalu ki honau ngaahi ʻapí ʻo tuku atu he veʻe matapaá ha kofukofu lole mo ha kiʻi tohi ʻo fakahaaʻi atu ai ʻeku ʻofa ʻiate kinautolu.
Tupulaki ʻi he Ongoongoleleí
Ko ha tāpuaki mahuʻinga moʻoni kiate au mo hoku fāmilí e polokalama ʻa e Fānaú mo e Toʻu Tupú lolotonga e mahaki fakaʻauhá. Neongo ʻoku ou nofo tokotaha pē ʻi ʻapi he ʻaho kotoa, ka ʻoku ʻi ai ʻeku ngaahi taumuʻa. ʻOku hokohoko atu hono fakatupulaki ʻe hoku makapuná honau talēnití mo tupulaki ʻi he ongoongoleleí, pea ʻoku ou lava ʻo poupouʻi kinautolu. ʻOku mau vēkeveke ki heʻemau ngaahi fakataha fakafāmili ʻi he ʻinitanetí mo e ngaahi taimi ʻo e feʻinasiʻakí.
Pea mālō mo e ueʻi fakalaumālie ko ia naʻe maʻu lolotonga ʻeku tokoniʻi hoku makapuná ʻi heʻenau ngāue ki heʻenau ngaahi taumuʻá, pea ʻoku lahi ange e tukutaha ʻeku tokangá ʻi he taimí ni ki hono fokotuʻu ʻeku ngaahi taumuʻa taimi nounoú mo taʻengatá fakatouʻosi. ʻOku ou ngāue mo lotua he ʻaho kotoa pē ke “tuku ke lāngilangiʻia ʻa e ʻOtuá” ʻi heʻeku moʻuí mo e moʻui e kau mēmipa hoku fāmilí.2