Sū Tenisi ʻi he Temipalé
ʻE fakamaauʻi nai au ʻe he niʻihi kehé ʻo hangē ko ʻeku fakamaauʻi taʻetotonu ha taha kehé?
Laʻitā mei he Getty Images
Lolotonga ha fakataha lakanga fakataulaʻeiki, ne u fakatokangaʻi ha mēmipa ʻo e kōlomú ʻoku tui talausese tangakalī mo e sū tenisi. Naʻá ku fifili, “Ko e hā ʻokú ne tui valasiʻi mai ai ki he lotú? ʻOku fakafepaki nai? ʻOku loto-fefeka nai? ʻOku ʻikai nai ke ne ongoʻi ʻe ia e Laumālié ʻi heʻene moʻuí?”
Kapau naʻá ne maʻu ha fakamoʻoni mālohi, pea ʻe mahino te ne fakahā ha fakaʻapaʻapa lahi ange ki he ngaahi fakatahaʻanga mo e ngaahi feituʻu ʻoku toputapú.
Hili ha uike ʻe taha mei ai ne u ʻaʻahi mo hoku uaifí ki homa ʻofefiné, pea naʻá ma loto ke mau ʻalu mo ia ki he temipalé. ʻI heʻeku fakaava hake ʻeku katoletá, ne u fuʻu ʻohovale ʻi hono ʻiloʻi ne ngalo ke faʻo mai hoku sū vala maʻá! Koeʻuhí he naʻe vave e kamata ʻemau sēsini he temipalé, ne ʻikai ke maʻu ha taimi ia ke kumi ha sū foʻou. Ko ia ai naʻá ku loto leva ke tui pē hoku sū tenisí.
ʻI heʻeku tui hoku suú, ne u manatuʻi he taimi pē ko iá ʻa e fakataha lakanga fakataulaʻeikí. Ko e ʻai ʻeni ke u teuteu ke ʻalu ki he taha ʻo e ngaahi feituʻu toputapu taha ʻi he māmaní mo ha sū tenisi. Ne u fifili pe ko e hā nai e fakakaukau mai ʻa e niʻihi kehé. Te nau fakamaauʻi au ko ha taha fakafepaki mo loto-fefeka pe ʻikai ke maʻu e Laumālié pe ʻikai ke maʻu ha fakamoʻoni mālohi?
Naʻá ku ongoʻi mā ʻi he fuʻu vave ʻeku fakamaau taʻetotonu ne fai kimuʻá. Ko hai au ke u fehuʻia ha fakamoʻoni ʻa ha taha koeʻuhí ko hono valá? Naʻe ʻikai ke u ʻilo ha meʻa ʻe taha ki hono ngaahi tūkungá.
Naʻe tukutaha e tokanga ʻa e Fakamoʻuí ʻi he tupulaki fakalaumālie ʻa e fānau kotoa ʻEne Tamaí. Pea hangē ko ʻEne fakamanatu kia Samuelá, “ʻOku ʻikai mamata ʻa [e ʻEikí] ʻo hangē ko e mamata ʻa e tangatá, he ʻoku sio ʻa e tangatá ki he anga ʻoku hā ʻi tuʻá, ka ʻoku ʻafioʻi ʻe [he ʻEikí] ʻa e lotó” (1 Samuela 16:7).
ʻOku ʻikai totonu ke hanga ʻe he valá, fōtungá, matakalí, pe tuʻunga tangatá pe fefiné ʻo ʻai ha faikehekehe. Ko e fānau kotoa pē kitautolu ʻe taha. Ko e meʻa ne totonu ke tuku ki ai ʻeku tokangá ko e haʻu ʻa e tangata ko ʻení ki he lotú.
ʻOku totonu ke tau feinga ke tau tui maʻu pē hotau vala lelei tahá ʻi he taimi ʻoku tau ʻalu ai ki he lotú pe temipalé.1 Neongo ia, ʻoku ʻikai totonu ke tau fakamaauʻi e niʻihi kehé mei he meʻa ʻoku nau tuí, koeʻuhí he ʻoku ʻikai ke tau teitei ʻiloʻi honau tūkungá.
Ko e kakai kotoa pē ʻoku tau feohí ʻoku nau maʻu moʻoni ha ivi malava fakalangi. ʻOku totonu ke tau foaki ha ʻofa faka-Kalaisi ki hono kotoa hotau kāingá ʻo tatau ai pē pe ko e hā honau fōtungá, ʻo aʻu ki haʻanau tui mai ha sū tenisi ki he temipalé!