Haʻu, ʻo Muimui ʻIate Au
ʻIloʻi e Founga mo e Meʻa ʻoku Tau Lotu ki Aí
ʻOku fakahā ʻe he ʻOtuá ʻi he Tokāteline mo e Ngaahi Fuakavá vahe 93, ha ngaahi moʻoni pau fekauʻaki mo Sīsū Kalaisi koeʻuhi ke lava ke tau “ʻiloʻi ʻa e founga ke hū aí, pea ʻiloʻi ʻa ia ʻoku [tau] hū ki aí” (veesi 19). ʻOku lahi ha ngaahi meʻa ʻi he moʻuí ni ʻokú ne tohoakiʻi ʻetau tokangá mei heʻetau hū moʻoni ki heʻetau Tamai Hēvaní mo Sīsū Kalaisí.
Naʻe tohi ʻe Palesiteni Sipenisā W. Kimipolo (1895–1985) ki he kāingalotu ʻo e Siasí i he 1976 ʻo pehē: “Ko e hā pē ha meʻa ‘oku ʻofa mo falala lahi ki ai ʻa e tangatá, ko hono ‘otuá ia; pea kapau ‘oku ‘ikai ko hono ʻotuá ʻa e ‘Otua moʻui ‘o ‘Isilelí,ʻoku moʻua ʻa e tangata ko iá ʻi he tauhi tamapuá.”
Ko ha kiʻi fakamatala nounou ʻeni naʻe toʻo mei he pōpoaki ʻa Palesiteni Kimipolo ʻoku kei ʻaonga pē ki he ʻahó ni:
Tā fakatātaaʻi ʻe Katie Payne
“Naʻe tali ʻa ha talavou ‘e taha ʻi hono ui ia ke ‘alu ‘o ngāue fakafaifekaú ʻoku ʻikai te ne fuʻu talēniti ʻaki ʻa e faʻahinga meʻa ko iá. Ko e meʻa naʻe lava ke ne fai leleí ko hono tokangaʻi fakalelei ʻo ʻene fuʻu meʻalele foʻoú. …
“Naʻe fiemālie pē ʻene tamaí ki he meʻa hono fohá naʻe faí, ʻo ne pehē, ‘ʻOkú ne manako he ngāue ʻaki hono ongo nimá. Pea ʻoku feʻunga pē ia.’
“ʻOku feʻunga nai ia mo ha foha ʻo e ʻOtuá? Naʻe ʻikai mahino ki he talavoú ni ʻoku fuʻu siʻisiʻi ʻaupito ʻa e mālohi ia ʻo e mīsini ʻo ʻene meʻalelé ʻi hono fakahoa atu ki he mālohi ʻo e tahí, pe ʻo e laʻaá; pea ʻoku lahi ʻa e ngaahi laʻaá, pea ʻoku puleʻi kinautolu ʻaki ʻa e lao pea ʻaki ʻa e lakanga fakataulaʻeikí—ʻa ia ko ha mālohi ʻo e lakanga fakataulaʻeikí naʻá ne mei fakatupulaki ʻi heʻene ʻi he ngāue ʻa e ʻEikí. Naʻe fiemālie pē ia ʻi ha ʻotua fakaʻofa, ʻa ia ko e fakatahatahaʻi pē ia ʻo ha sitila mo ha ulapa pea mo ha ukamea ngingila. …
“ʻOku ʻosi pau pē ʻa ʻetau ngāue ke faí: ke tau siʻaki ʻa e ngaahi meʻa ʻo e māmaní he ʻe ngata ia; ke tuku ʻa e tauhi tamapuá pea tau vilitaki ʻi he tuí. …
“… Ko ʻene kamata pē ke maʻu ʻe ha taha ha vīsone ʻo e ngāue moʻoní, ko e taimi ko ē ʻoku kamata ke ne mamata ai ki ha konga ʻo ʻitāniti ʻi hono anga totonú, ʻoku kamata leva ke mahuʻinga ange ʻa e ngaahi tāpuakí ʻi he faingataʻa ʻo e mavahe mei “māmaní.”1