Fakaʻilekitulōnika Pē: Ngaahi ʻAta ʻo e Tuí
Ne Fakamoʻui Au ʻe he ʻEikí.
Talu ʻema maʻu e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, mo ʻema maʻu e ngaahi tāpuaki.
Faitaaʻi ʻe Leslie Nilsson
Naʻá ku puke ʻi ha ngaahi taʻu lahi. Naʻe faitoʻo au, ka naʻe ʻikai pē ke fakalakalaka hoku tūkungá. Naʻe ʻikai ke u mei lava ʻo lue ʻi ha poloka taʻe te u mālōlō tuʻo tolu pe tuʻo fā. Ne u fakakaukau mahalo naʻe siviʻi au ʻi he ʻikai ke u ʻalu ki ha lotú.
ʻOku ou houngaʻia mo hoku uaifi ko Siliviá ʻi he ngaahi tokoua mo e tuofāfine ne nau tokoni ke ʻomi kimaua ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe pehē ʻe ha tangata ʻe taha, “He ʻikai ke u talaatu kuo pau ke ke ʻalu ki he lotú. Ko e ʻEikí ʻokú Ne kole atu ke ke ʻalú.”
Ko e meʻa ia naʻá ma ongoʻí.
Naʻá ma fakatomala mei heʻema ngaahi angahalá ʻi he taimi naʻe fakafeʻiloaki ai kiate kimaua ʻa e Siasí. ʻOku mātuʻaki mahuʻinga ʻa e fakatomalá. Naʻá ma tukuange ʻema ngaahi angakoví kae tautapa ki he ʻEikí ke fakamolemoleʻi kimaua koeʻuhí ko ʻema ngaahi angahalá pea ʻoua naʻa tukuange kimaua ʻo aʻu ki haʻama mate.
Hili ʻema maʻu ʻa e ongoongoleleí pea kamata ke ma ō ki he ngaahi houalotú, naʻe kamata ke u ongoʻi fiemālie ange. Hili ʻema kamata ʻalu ki he temipalé, naʻe toe fakalakalaka ange ʻeku moʻui leleí. Naʻe aʻu ʻou toe lava ʻo vaʻinga fútbol . Ne fakamoʻui au ʻe he ʻEikí mei hoku fokoutuá. ʻOku kei ʻi ai pē hoku ngaahi faingataʻaʻia fakaesino mo hoku uaifí ʻi he ʻahó ni, ka koeʻuhí ko ʻema tuí, ʻoku tāpuekina ai mo fakamālohia kimaua ʻe he ʻEikí.
Talu ʻema ʻilo ʻa e Siasí mo ʻema maʻu e ngaahi tāpuaki lahi. ʻOkú ma totongi ʻema vahehongofulú pea ʻoku foaki mai ʻe he ʻEikí ʻo lahi ange ʻi he meʻa ʻokú ma foaki kiate Iá. ʻOkú ma fakamālō ko e ʻapi kuó Ne foaki mai maʻa kimauá. ʻOkú ma fakamālō ʻokú ma maʻu ha meʻa feʻunga ke ma lava ai ʻo foaki ki he masivá. ʻOkú ma fakamālō ko e moʻui lelei ʻokú ma fiefia aí. ʻOkú ma fuʻu fiefia ʻaupito. ʻOkú ma ʻofa mo houngaʻia ʻi he Siasí. ʻOkú ma ʻiloʻi ʻoku moʻoni ia!
ʼOkú ma ʻiloʻi ʻoku ʻi he toʻukupu ʻo e Tamai Hēvaní mo Sīsū Kalaisi ʻa ʻema moʻuí, ko ia ai ʻokú ma lotu tuʻolahi ʻi he ʻaho ki he Tamai Hēvaní. ʻOku ʻikai ke ma ʻiloʻi ʻa e taimi ʻe hoko mai ai ʻa e maté kiate kimauá mo e taimi ʻe fie maʻu ai kimaua ʻe he ʻEikí, ka ʻokú ma houngaʻia kuó Ne fakahā mai e hala ke foki ange ai kiate Iá.