Maʻá e Ngaahi Mātuʻá
Akoʻi fekauʻaki mo e Lakanga Fakataulaʻeikí mo e Mateuteú
Siʻi Ngaahi Mātuʻa,
ʻOku kau ʻi he ngaahi tefito ki he māhina ní ʻa e lakanga fakataulaʻeikí, moʻui lelei fakaeʻatamaí, mo e mateuteu fakalaumālie mo fakatuʻasinó. Fakaʻaongaʻi ʻa e konga ko ʻení ke maʻu ha ngaahi fakakaukau ki he founga te ke fakaʻaongaʻi ai e makasini ko ʻení, ke tokoniʻi koe ke ke fakatokangaʻi e ngaahi faingataʻa pau ʻoku fehangahangai mo hoʻo fānaú, mo tokoniʻi koe ke ke akoʻi e ongoongolelei ʻo Sīsū Kalaisí ʻi homou ʻapí.
Fealēleaʻaki ʻi he Ongoongoleleí
Lakanga Fakataulaʻeikí
ʻI hoʻo akoʻi hoʻo fānaú kau ki he lakanga fakataulaʻeikí mo e ngaahi ouau ʻo e lakanga fakataulaʻeikí, fakaʻaongaʻi e “Ngaahi Tefitoʻi Meʻa Mahuʻinga ʻo e Ongoongoleleí” ʻi he peesi 10 ʻo tānaki atu ki he fakamatala ʻa Palesiteni Tāleni H. ʻOakesi ʻi he peesi 6. Aleaʻi mo hoʻo fānaú e mahuʻinga ʻo e lakanga fakataulaʻeikí mo e founga ʻoku tāpuekina ai ʻe he ʻEikí ʻetau moʻuí ʻo fakafou ʻi he lakanga fakataulaʻeikí.
Moʻui Lelei Fakaeʻatamaí
Ko e lea ko ia “Te u Tokoniʻi Fēfē ha Fānau ʻOku Ongoʻi Loto-Mafasiá?” ʻi he peesi 16 ʻokú ne fakamatalaʻi ha ngaahi founga ʻe niʻihi te ke lava ʻo fakatokangaʻi ai ha ngaahi fakaʻilonga ʻo e loto-mafasiá ʻi hoʻo fānaú mo fokotuʻu atu ha ngaahi founga ke ngāueʻi ai e moʻui leleí. Ngāue ʻaki e fakamatala ko ʻení fakataha mo e ngaahi fakamatala ʻi he peesi 12 mo e 18 ke tokoniʻi hoʻo fānaú ʻi heʻenau fekuki mo e ngaahi faingataʻaʻia ʻi he moʻui lelei fakaeʻatamaí.
Hūfangaʻanga Fakalaumālié mo e Fakatuʻasinó
ʻE lava ke tokoni e fakamatala ʻi he peesi 20 ki ho fāmilí ki hano faʻu ha palani ke mateuteu ki ha meʻa fakatuʻupakē kapau naʻe teʻeki ai ke ke fai ia. Ka ko e meʻa mahuʻinga angé, ko ʻene toe akoʻi ha niʻihi ʻo e ngaahi meʻa ʻoku faitatau mo ʻetau mateuteu fakalaumālié.
Tokoni ki hono ako ʻo e Haʻu, ʻo Muimui ʻIate Aú
Vakai ki he peesi 26 ki ha ngaahi fakamatala te ne tokoniʻi ho fāmilí ʻi heʻenau ako ki he Tokāteline mo e Ngaahi Fuakava ʻo e māhina ní.
Fiefia Fakafāmili ʻi he Haʻu, ʻo Muimui ʻIate Aú
ʻI ʻolungá: laʻitā mei he Getty Images
Fokotuʻutuʻu ʻa Kimoutolu
Tokāteline mo e Ngaahi Fuakava 88
ʻE lava ke muimui hotau ngaahi ʻapí ʻi he sīpinga ko ʻení: “Fokotuʻutuʻu ʻa kimoutolu; teuteu ʻa e meʻa ʻaonga kotoa pē; pea fokotuʻu ha fale, ʻio ko ha fale ʻo e lotu, ko ha fale ʻo e ʻaukai, ko ha fale ʻo e tui, ko ha fale ʻo e ako, ko ha fale ʻo e nāunau, ko ha fale ʻo e maau, ko ha fale ʻo e ʻOtua” (Tokāteline mo e Ngaahi Fuakava 88:119).
ʻOku ʻuhinga ʻa e fokotuʻutuʻú ki hono fokotuʻutuʻu ha ngaahi meʻa ke maau pe ko e teuteu ki ha ʻekitivitī pe ko ha meʻa ʻe hoko.
Fokotuʻutuʻu ho fāmilí ʻi ha ngaahi faʻunga kehekehe:
-
ʻAi ke nau tuʻu laine ʻo fakahokohoko mei he lahi tahá ki he siʻisiʻi tahá.
-
ʻAi ke nau tuʻu fakahokohoko fakamataʻitohi, ʻo fakatatau ki honau hingoa ʻuluakí.
-
ʻAi ke nau tuʻu laine ʻo fakatatau ki he māhina naʻe fāʻeleʻi ai kinautolú.
Fealēleaʻaki: Ko e hā e founga ʻoku finangalo e Fakamoʻuí ke fokotuʻutuʻu ai kitautolú (1) ʻi heʻetau ngaahi ngāue fakaʻapí, (2) ʻi heʻetau ako fakalaumālié, (3) ʻi heʻetau moihū ʻi falelotú mo e temipalé?
Ko e hā ha ngaahi taumuʻa ʻe lava ke fokotuʻu ʻe hoʻo fāmilí ke fokotuʻu ai ha “fale ʻo e ʻOtuá”?
Lele Kae ʻIkai Ongosia
Tokāteline mo e Ngaahi Fuakava 89
Naʻe foaki mai ʻe he ʻEikí ʻi he Tokāteline mo e Ngaahi Fuakava 89, ha fakahā naʻe ʻiloa ko e Lea ʻo e Potó.
-
Hili hono lau e vahe 89, ʻai ke tuʻu e taha kotoa ʻi he lotomālie ʻo ha loki.
-
Vahe e konga ʻe taha ʻo e lokí ke hoko ia ko e tafaʻaki “leleí” pea ko e konga ʻe taha ʻo e lokí ke hoko ia ko e tafaʻaki “ʻoku ʻikai ke leleí.”
-
Tuku ki ha mēmipa ʻo e fāmilí ke ne lau ʻa e veesi 5–17.
-
ʻE ʻunu e kau mēmipa kehe ʻo e familí ki he tafaʻaki “leleí” pe tafaʻaki “ʻikai ke leleí” ʻo e lokí, ʻo fakatatau ki he fakamatala ʻa e vēsí. ʻOku lelei ʻa e meʻa ko iá ki hotau sinó pe ʻikai?
Fealēleaʻaki: Ko e hā ha ngaahi talaʻofa ʻoku ʻi he Tokāteline mo e Ngaahi Fuakava 89:18–21? ʻE fakatupulaki fēfē hotau vā fakalaumālie mo e ʻEikí ʻi hono tokangaʻi lelei hotau sinó?