Ko ha Ongo Tautehina Kimoua?
Naʻá ku ʻohovale ʻi he fehuʻi ʻa ha kiʻi tamasiʻi ka naʻá ku ako ai ha lēsoni mahuʻinga.
Laʻitā ne maʻu ʻi he angalelei ʻa e tokotaha faʻu tohí
Ko hoku kaungāmeʻa ko Lōlie Falemate Kiungí ko ha Mauli. ʻOku ou tupu mei he hakoʻi Pilitāniá. ʻOkú ma faikehekehe ʻi he lanu ʻo e kilí, lanu ʻo e matá, lanu ʻo e ʻulú, mo e māʻolungá. ʻOku fuʻu mahino pē ʻema kehekehé. Ka ʻi ha ʻaho ʻe taha lolotonga haʻaku ngāue mo Lōlie ki he fānau ʻi ha kiʻi ʻapiako masivesiva, naʻe fakaʻohovale kiate kimaua e fehuʻi mai ha kiʻi tamasiʻi Mauli.
Naʻá ne fehuʻi mai, “Ko ha ongo tautehina kimoua?”.
Naʻá ku mamali pē mo fakakaukau ko haʻane fehuʻi fakakata pē. Neongo ia, ka naʻe toe fai mai pē e fehuʻi ʻa e kiʻi tamasiʻí, “Ko ha ongo tautehina kimoua?”
ʻI heʻeku ʻiloʻi naʻe fakamātoato ʻene fehuʻí, ne u kiʻi tatali ʻo fakakaukau, “Meʻa ní ʻoku ʻikai ke lava e kiʻi tamasiʻi ko ʻení ʻo sio ki homa faikehekehe ʻi he fōtungá mo e matakalí?” Mahalo pē naʻá ne ʻiloʻi ka naʻe loto pē ia ke ʻiloʻi moʻoni. Naʻá ne tatali fiefia ki heʻeku talí.
Naʻá ku talaange ʻoku ʻikai ko ha ongo tautehina kimaua, pea naʻá ne loto-mamahi ai. Ka naʻá ku toe talaange ʻokú ma faʻa ongoʻi pe ko ha ongo tautehina kimaua ʻi heʻema ngāue fakatahá. Naʻá ne ngali loto-fiemālie ki he tali ko iá pea lele leva ia ki heʻene tēpilé.
Naʻe ongo moʻoni kiate au e fehuʻi fakamātoato ʻa e kiʻi tamasiʻí ni. Ko e hā hono ʻuhingá? Koeʻuhí he naʻe ʻomi ʻe heʻene fehuʻí ha foʻi moʻoni kiate au—ʻoku ʻikai ke fakangatangata pē e fāmilí ki he faʻunga fakatotó pē fōtungá. Kuo tāpuekina au mo hoku husepānití ke pusiaki mai ha fānau ʻe toko ua. ʻOkú ma ʻofeina kinaua, pea ko e ʻofá mo e ngāue tokoní ko ha konga mahuʻinga ia ʻo e fāmilí.
He ko hono fakakātoá, ko kitautolu kotoa pē ko e fānau ʻa hotau “ʻOtua pē taha mo e Tamaí” (ʻEfesō 4:6).
ʻOku ou aofangatuku ʻaki ʻeku pehē mahalo naʻe siofi pē ʻe he kiʻi tamasiʻí ʻeku fengāueʻaki mo Lōlié. Mahalo pē ʻi heʻene sio ki heʻema fetokoniʻaki pe fefāʻofuaʻakí, naʻá ne fakakaukau leva ko e ongo tautehina kimaua. ʻOku fakamanatu mai heʻene fehuʻí kiate au ʻa hono siofi maʻu pē ʻe he fānaú e kakai lalahí pea fokotuʻu ai pē ʻenau fakakaukaú mei he meʻa ʻoku tau lea ʻakí mo fakahokó mo e anga ʻetau fetauhiʻakí. Kapau naʻe fakakaukau e kiʻi tamasiʻi ko ʻení ko e ongo tautehina kimaua, pea ʻe pau pē ʻoku fakakaukau e fānau ʻi he māmaní ko kitautolu kotoa pē ko e kāinga kapau pē te tau feʻofaʻaki mo fetokoniʻaki.
ʻOku hoko ʻema faikehekehé ke lava ai ʻa Lōlie mo au ʻo ʻomi ha mālohi mo ha ngaahi fakakaukau kehekehe ki heʻema ngāue tokoni ʻofá, pea maʻu ai e ola lelei ange. ʻOku ʻikai ke hoko ʻema kehekehé ke ne vaetuʻua kimaua, ka ʻokú ma ngāue ʻaki lelei ia ʻo hoko ai ko ha kaungāmeʻa vāofi. ʻOku lava ke hoko e fehuʻi ʻa e kiʻi tamasiʻí ko ha lēsoni maʻá e fānau kotoa ʻa e ʻOtuá.