Ko e Lakanga Fakataulaʻeikí ko e Mālohi ia ʻo e ʻOtuá

ʻOku tāpuekina kitautolu ʻe he ʻOtuá ʻo fakafou ʻi he mālohi ʻo e lakanga fakataulaʻeikí. ʻOku malava ke maʻu ʻe he tokotaha kotoa pē e ngaahi tāpuaki ʻo e lakanga fakataulaʻeikí.

ʻĪmisi

people partaking of the sacrament at church

Ko e lakanga fakataulaʻeikí ko e mālohi ia ʻo e ʻOtuá. ʻOkú Ne fakaʻaongaʻi ʻa e mālohi ko ʻení ke tāpuekina kotoa ʻEne fānaú pea tokoniʻi kinautolu ke nau toe foki hake ʻo nofo fakataha mo Ia. Kuo foaki ʻe he ʻOtuá ʻa e mālohi ʻo e lakanga fakataulaʻeikí ki Heʻene fānaú ʻi he māmaní. ʻI he mālohi ko ʻení, ʻe lava ke tataki ʻe he kau taki lakanga fakataulaʻeikí e Siasí, pea lava ʻa e kau maʻu lakanga fakataulaʻeikí ʻo fakahoko e ngaahi ouau toputapu, hangē ko e papitaisó, ʻa ia ʻoku tokoniʻi ai kitautolu ke tau ofi ange ki he ʻOtuá. ʻOku ʻatā ke maʻu ʻe he tangata mo e fefine kotoa pē ʻoku nau taau ke maʻu e ngaahi ouau ʻo e lakanga fakataulaʻeikí mo tauhi e ngaahi fuakavá (ngaahi fakapapau toputapú), ʻa e mālohi ʻo e ʻOtuá.

Naʻe Foaki e Mālohi ʻo e Lakanga Fakataulaʻeikí kia Siosefa Sāmita

ʻI he taimi naʻe ʻi māmani ai ʻa Sīsū Kalaisí, naʻá Ne tataki Hono Siasí ʻaki e mālohi ʻo e lakanga fakataulaʻeikí. Naʻá Ne foaki foki e mālohi ko ʻení ki Heʻene Kau ʻAposetoló. Hili ha ngaahi senituli mei heʻenau pekiá, naʻe tokolahi ha kāingalotu ne nau mavahe mei he Siasí. Naʻa nau liliu halaʻi e ongoongoleleí mo e founga ngāue ʻa e Siasí. Naʻe ʻikai ke toe maʻu e lakanga fakataulaʻeiki ʻo e ʻOtuá ʻi he māmaní. ʻI he 1829, naʻe fekauʻi mai ʻe Sīsū ʻa Sione Papitaiso mo e kau ʻAposetolo ko Pita, Sēmisi mo Sioné, ke nau foaki kia Siosefa Sāmita ʻa e lakanga fakataulaʻeikí. Ko e kautaha lotu pē ʻe taha ʻi he māmaní ʻoku maʻu ai ʻa e mafai ko ʻeni mei he ʻOtuá, ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Ngaahi Kī ʻo e Lakanga Fakataulaʻeikí

ʻĪmisi

President Russell M. Nelson speaking at general conference

Ko e ngaahi kī ʻo e lakanga fakataulaʻeikí ʻa e mafai ke tataki hono fakaʻaongaʻi ʻo e lakanga fakataulaʻeikí, ʻo hangē ko e ʻoatu ha ngofua ke fakahoko ʻaki ʻo e ngaahi ouaú. ʻOku maʻu ʻe Sīsū Kalaisi ʻa e ngaahi kī kotoa ʻo e lakanga fakataulaʻeikí. Ko e Palesiteni pē ʻo e Siasí ʻa e tokotaha ʻi he māmaní te ne lava ʻo fakaʻaongaʻi ʻa e ngaahi kī ko ʻení ki hono tataki kotoa ʻo e Siasí. ʻI he malumalu ʻo ʻene fakahinohinó, ʻe lava ʻe ha niʻihi kehe ke fakaʻaongaʻi ha ngaahi kī pau ke fakahoko ʻaki e ngāue ʻa e ʻOtuá. ʻOku fakaʻaongaʻi ʻe he kau taki hangē ko e kau pīsopé mo e kau palesiteni fakasiteikí ʻa e ngaahi kī ʻo e lakanga fakataulaʻeikí, ki hono tataki honau ngaahi uōtí mo e siteikí. Koeʻuhí ʻoku maʻu ʻa e ngaahi uiuiʻi ke fua fatongiá mei he kau taki ʻoku nau maʻu e ngaahi kī ʻo e lakanga fakataulaʻeikí, ko e kakai tangata mo fafine ʻoku nau fua ha ngaahi fatongiá, ʻoku nau ngāue ʻaki ʻa e mafai ʻo e lakanga fakataulaʻeikí ʻi heʻenau fua honau ngaahi fatongiá.

Lakanga Taulaʻeiki Faka-Melekisētekí mo e Lakanga Taulaʻeiki Faka-ʻĒloné

ʻOku konga ʻe ua ʻa e lakanga fakataulaʻeikí: ko e Lakanga Taulaʻeiki Faka-Melekisētekí mo e Lakanga Taulaʻeiki Faka-ʻĒloné. ʻOku tataki ʻe he kau taki ʻo e Siasí ʻa e ngāue fakalaumālie kotoa pē ʻo e Siasí, hangē ko e ngāue fakafaifekaú mo e ngāue fakatemipalé, ʻo fakafou ʻi he Lakanga Taulaʻeiki Faka-Melekisētekí. ʻOku ngāue ʻa e Lakanga Taulaʻeiki Faka-ʻĒloné ʻi he malumalu ʻo e mafai ʻo e Lakanga Taulaʻeiki Faka-Melekisētekí. ʻOku fakaʻaongaʻi ia ki hono fakahoko e ngaahi ouau hangē ko e papitaisó pea mo e sākalamēnití.

Ngaahi Tāpuaki ʻo e Lakanga Fakataulaʻeikí

ʻĪmisi

bridge and groom standing outside a temple

ʻOku fakaʻatā ʻe he ʻOtuá ʻa e ngaahi tāpuaki ʻo e lakanga fakataulaʻeikí ki hono kotoa ʻEne fānaú, ʻo fakafou ʻi he ngaahi fuakavá mo e ngaahi ouaú. ʻOku kau ʻi he ngaahi tāpuaki ko ʻení ʻa e papitaisó, meʻa-foaki ʻo e Laumālie Māʻoniʻoní, sākalamēnití, mo e ngaahi ouau fakatemipalé. ʻOku maʻu ʻe he houʻeiki tangata mo fafine kuo maʻu ʻenitaumeni ʻi he temipalé, ha meʻa-foaki ʻo e mālohi ʻo e lakanga fakataulaʻeikí ʻo fakafou ʻi heʻenau ngaahi fuakavá. Te tau toe lava foki ʻo maʻu e ngaahi tāpuaki lakanga fakataulaʻeiki ʻo e fakamoʻui mahakí, fakafiemālié, mo e fai fakahinohinó.

Ko e Hā e Lau ʻa e Ngaahi Folofolá fekauʻaki mo e Lakanga Fakataulaʻeikí?

Ko e lakanga fakataulaʻeiki tatau pē ko ia naʻe maʻu ʻi he ngaahi ʻaho ʻo e kuonga muʻá ʻoku maʻu ʻi he ʻaho ní (vakai, Mōsese 6:7).

ʻOku tokoni e ngaahi kī ʻo e lakanga fakataulaʻeikí ke fakapapauʻi ʻoku tau fakahoko e ngāue ʻa e ʻEikí ʻi ha founga maau (vakai, Tokāteline mo e Ngaahi Fuakavá 42:11).

ʻE lava ke fakaʻaongaʻi ia ʻe he houʻeiki tangata ʻoku nau maʻu e lakanga fakataulaʻeikí “ʻi he ngaahi founga [pē] ʻo e māʻoniʻoní” (Tokāteline mo e Ngaahi Fuakavá 121:36).

ʻOku fakamatalaʻi atu ha niʻihi ʻo e ngaahi fatongia ʻo kinautolu ʻoku nau maʻu ʻa e lakanga fakataulaʻeikí ʻi he Tokāteline mo e Ngaahi Fuakavá 20:38–67.