Savali Faaleautaitai i le Eria
Faalagolago ma Faatuatua ia Iesu Keriso ma Lana Togiola
Mai i uluai upu i le Mataupu Faavae ma Feagaiga, o le apoapoaiga e faalogo i le siufofoga o le Alii ma fa’alogo fa’atasi ua tuuina mai ina “mafai ai ona fa’ateleina le Fa’atuatua i le lalolagi.1”
E ogatusa foi i o tatou taimi, na fa’asoa mai ai e le Perofeta a le Alii, o Peresitene Nelson e faapea “O le fa’amoemoega ua loa o le Ekalesia o le fesoasoani lea i tagata uma o le ekalesia ia fa’ateleina lo latou fa’atuatua i lo tatou Alii o Iesu Keriso ma Lana Togiola.2” O le a se mea e mafai ona tatou faia e atina’e ai se fa’alagolago sili atu ma le fa’atuatua i lo tatou Faaola o Iesu Keriso ma Lana Togiola ina ia faateleina ai i le lalolagi?
I le Faataoto e 3:5–6, o le faamalosi’auga a Solomona ia i tatou o loo aumai ai ni apoapoaiga se lua, o se lapataiga, ma se folafolaga e tumu-i le faatuatua. O apoapoaiga o: “Ia e faatuatua ia Ieova ma lou loto atoa” ma “ia e manatua o Ia i ou ala uma”; o le lapataiga ua faatonuina ai i tatou ia “Aua le faalagolago i lou lava atamai”, ma le folafolaga mamalu e faapea “E faatonuina e Ia lava ou ala.3”
O aso nei ua feagai i tatou uma ma le mau lu’itau ma mea e le fiafia ai. Pe tatou te o i le initoneti po o isi punāvai mo le malamalama e ui o le faatuatua ma le faalagolago i le Alii o le mea lea ua poloai mai le Alii ia i tatou? Pe tatou te filifili ni mea faalelalolagi e faalagolago i ai, nai lo le fausiaina o le faatuatua ma le faalagolago ia te Ia e fai mo tatou punāvai o le malosi’aga?
‘Faalagolago’ e ta’u mai ai le ulufalega faaletino po o le lolo atu i se itu e tasi. Na saunoa Sister Bonny H. Cordon e faapea “Pe a tatou faalagolago faaletino i se itu e tasi po o se isi, ua tatou o ese mai le ogatotonu, ua tatou le paleni, ma ua tatou sipa.”4 O la tatou valaaulia mai le Alii o le tausisia lea o o tatou olaga ia faa’ōgatotonu ia te Ia ‘ae le o lo tatou lava atamai. E mafai faapefea ona tatou faia lena mea a o agai mai ia i tatou lu’itau ma tulaga e le fiafia ai?
Ou te fautuaina atu ni auala se fa e faateleina ai lo tatou faatuatua ma le faalagolago i le Faaola. Atonu e foliga mai o mea tuai sa fiafia i ai, ae ou te valaaulia outou e vaai atu i ai faapea o mea ia e te fiafia i ai, ma tuu atu i ai se gauai faateleina i lou olaga.
Faalagolago i Tusitusiga Paia
Ua saunia e tusitusiga paia se ala mo i tatou e faateleina ai lo tatou faatuatua ma le faalagolago i le Faaola. Na a’oa’o mai e le Tupu o Peniamina i tatou ia tuu e le aunoa tusitusiga paia i luma o o tatou mata ina ia mafai ai ona tatou faitau ma malamalama i le finagalo o le Atua mo i tatou, ina ia tatou le pā’u’ū i le le talitonu.5 Ou te manatua taumafaiga a lo matou ‘āiga e atina’e le su’esu’eina o tusitusiga paia i aso taitasi. Matou te fesili, “O fea tusitusiga paia?” E le pine ae fesili mai le ma fanau, “O fea tusitusiga paia Tamā?” E “ao ina tatou manatua e sailiili i ai ma le mā’elegā ina ia tatou manuia ai”.6 O le a faateleina le faatuatua o o tatou ‘āiga i aso taitasi, pe a tatou faitau faatasi ma le mā’elegā i tusitusiga paia.
Faalagolago ma le mana o le tatalo
O le faaalu o se taimi ‘ānoa i le tatalo o le a faateleina ai lo tatou faatuatua e lelei atili ai le faatinoga o galuega o le aso. Tatou te mana’omia atili nai lo le na o si tatalo faatauvaa i na o ni nai taimi; e mana’omia ona tatou tagi atu ia te Ia e le aunoa. Pe a tatou tatalo, e oo ina tatou iloa e maualuluga atu Ona ala nai lo o tatou ala.7 E mafai ona faasoa atu a tatou avega ia te Ia, ma e mafai ona māmā ai.8
E i ai ni o’u manatuaga ou te faamamai i ai e uiga i le mana ma faamanuiaga o le tatalo i le misiona. E tele na’uā taimi ma te tatalo ai—i le amataga o aso uma ma i mea uma sa ma faia. Ou te manatua lo’u fesili atu i la’u soa muamua, “E fia ni taimi e mafai ai ona ta tatalo?” E tele na’uā mea na a’oa’o ai a’u i lana tali: “Ta te matuai mana’omia lava Lana fesoasoani, o lea ta te ‘tatalo ai i le Tama ma le malosi atoa o o tatou Loto.”9 Sa ma tatalo ma tatalo ma tatalo ma sa faamanuiaina i ma’ua.
Salamo ma sui
Pe ua tatou naunau e faatumu o tatou olaga i otaota e faalavelavea ai le faateleina o lo tatou faatuatua i le Faaola? Pe ua tatou naunau e iloilo i tatou lava pe o tatou faatalitali seia oo ina tuusaunoa a tatou amioga? Atonu e mafai ona tatou fesili ifo ia i tatou lava i aso taitasi pe faapefea ona avea atili e faapei o Keriso. O le taumamafa i le faamanatuga i le lotu i Aso Sa taitasi o se tasi o auala e mafai ona tatou liliu atu o tatou mafaufauga i le Faaola, toe iloilo i le tuanai ma iloa ai pe ua tatau ona tatou salamo.10
Faamuamua le Atua
O le faamuamua o le Atua o lona uiga e mafai ona tatou faalagolago ia te Ia ia tele atu mea e faia i o tatou olaga nai lo le mea e mafaia e i tatou lava. Na maua e le atalii o lo’u atalii se uila tuai e elea ia ‘au. Ina ia fesoasoani ia sagisagi atu o ia i lea uila, o lea sa faasino atu ai e lona tamā ia te ia le ala e sanipepa ai ‘au ona folafola atu lea i ai, na te aumaia lana vali e fiafia i ai e vali ai i lenā afiafi. Ina ua mavae le 15 minute o sanipepa, sa foliga mai ua sili atu ona faigatā le galuega mo lenei alii laitiiti nai lo le mea sa ia faamoemoeina, ma sa ia faitio i le faigatā, ma o lea na fai atu ai e lona tamā ni upu e mafai ona faamafanafanaina ai i tatou uma: “Fai le mea sili e te mafaia, o le a ou faia mea o totoe’.”
Ou te faasoa atu la’u molimau e faapea a tatou atiina a’e lo tatou faalagolago i le Faaola, ma faatuatua ia te Ia, ma ia le faalagolago lava i lo tatou lava atamai, o le a sili atu lo tatou faalogo atu i le si’ufofoga o le Alii i o tatou olaga, ma o le a faatonutonu e Ia o tatou ala.