Itulau i le lotoifale
Mulimuli i le Taitaiga a Lo’u Tama
E i ai se agaifanua masani a lo matou ‘āiga lautele. O aso mālōlō, toetuufaatasiga, po o isi faamoemoega, matou te fiafia e ave le vaa o lo’u uncle mai Tongatapu, motu autu o Toga, i se isi motu e igoa o Pangaimotu. O iina, matou te faaalu ai le aso atoa e taaalo volipolo ai, po o le vai, ti’eti’e vaa, ma ioe, aai ma fe’ausi.
Ina ua taunuu i Pangaimotu, e taula lo matou vaa i tua teisi o le mea loloto, ona la’ula’u lea e se vaa laitiiti le aumātutua i le apitagalu. O tamaiti—o’u tausoga ma nai o’u tei—e le taitai manana’o e la’u i se vaa. E sili ia latou le fe’ausi mai lo matou vaa tele i le apitagalu, ona toe fe’ausi foi lea i tai pe a uma la matou tafaoga i le aso atoa.
A o o’u laitiiti, ou te fia mana’o lava e auai faatasi ma i latou, ae e faigata ona ou aau aua e loloto le vai i autafa o lo matou vaa. E taufaafefe ia te a’u le le mafai ona papa’i o o’u vae i lalo—sa ou talitonu e i ai se mea na te pu’eina a’u ma toso a’u i lalo. E le gata i lea, o le va o le apitagalu ma le vaa sa foliga e mamao tele. O le a le mea e tupu pe afai ou te le lavā ae ou te le’i taunuu i ‘ō?
Sa iloa e lo’u tamā le taua o lo’u mafaia ona ‘aau.
A o amata ona gagaifo le la i se tasi o aso i Pangaimotu day, sa ia valaau mai ia te a’u ou te alu atu ia te ia. O le a fesoasoani o ia ia te a’u ou te alu atu mai le apitagalu i le vaa.
Sa ma savavali ma lo’u tama ma pasia mea papa’u ma oo atu ai i le vaega loloto o le sami. O le taimi lava na le mafai ai ona ou tu i le alititai, sa ou fefe ma sa taumafai e tāupe ia te ia, ae sa ia le faatagaina. I le le fiafia, sa maligi o’u loimata, ae sa na ona tu lava o lo’u tama i o’u autafa ma faamālosi’au mai ia te a’u ou te ‘aau pea.
I se tasi taimi, po o le a le tele o le apatā solo o o’u lima ma fea’a o’u vae, sa ou lagona lava le leai o se mea o tupu. Sa ou matua le lavā lava! Sa fautua lemu mai lo’u tamā e sui le tulaga ou te ‘aau ai.
Sa ou matuai ua’i atu i lona leo, i la’u mānava ma na o le gaoioi, ma sa ou tau le iloa ai ua mā taunuu i le vaa—sa matuā vave tele nai lo le mea sa ou faamoemoeina.
Sa oo mai ia te a’u se lagona mafanafana ua ou ausia ina ua ou i totonu o le vaa, ma sa ou iloaina ai o se vaimea o lena malaga—a o ou taulai atu i la’u ‘aau ma i lo’u tama—sa uma ai lo’u fefe i le sami.
I le āluga o tausaga, sa tele taimi na ou ‘aau ai i tai ma uta e aunoa ma le fefe. O le mea sa foliga faigatā na’uā ua faigofie nei.
Ou te mafaufau i le ala na taiala ai a’u e lo’u tama i la’u uluai ‘aau na faamanuiaina i le vaa. Sa agalelei o ia, ae sa tu mausalī. Sa ia tuuina a’u ia ou oo i faigatā mo a’u lava ia, ae sa ia tu faalatalata mai ia te a’u i le malaga atoa. Sa i ai taimi sa ou gatete ai ma faataute’e, ae sa ia faamalosi’au mai pea ia te a’u ma le onosai ma le alofa.
Na ou a’oa’o mai ai i lena taimi e tali faapenā foi ona galue lo tatou Tama Faalelagi. Na Te silafia o loo tatou i ai iinei i le lalolagi e a’oa’o, ma e tele taimi, e mana’omia ai ona tatou laa ese mai lo tatou sone ua mafanafana. Na Te silafia o le tele o o tatou lu’itau faalelalolagi o le a faigatā ma tigā, ma e tatau ona oo i ai i tatou lava ina ia mafai ai ona alualu i luma, ae e i ai lava o Ia iina e le aunoa i o tatou autafa, e taiala ma faamalosi’au mai ia i tatou, ma fesoasoani mai e liliu o tatou vaivaiga ia avea ma malosi’aga.
Pe a tatou onosaia o tatou tofotofoga ma le lotomaualalo ma le faatuatua, e mafai ona aumaia latalata ai i tatou i lo tatou Tama Faalelagi. E mafai ona a’oa’o ai i tatou e faalagolago i lona alofa paia mo i tatou ma i Lona naunau ia tatou manuia. E faapei ona sa faia e lo’u tama mo a’u i le tele o tausaga ua mavae i Pangaimotu, e mafai foi e le Tama Faalelagi ona moloina i tatou e avea ma fausaga e sili atu o i tatou lava ma fesoasoani ia tatou ausia mea e tele atu nai lo mea tatou te mafaia e i tatou lava.