Ngaahi Meʻa ke Fakahoko mo ʻOua ʻe Fakahoko ʻi Hono Fakaafeʻi e Ngaahi Kaungāmeʻá ki he Lotú
Ko ha ngaahi founga ʻeni ke tokoniʻi ai e ngaahi kaungāmeʻá ke nau ongoʻi fiemālie ange ʻi he haʻu ki he lotú.
Ko e founga lelei ʻa hono fakaafeʻi ʻo e niʻihi kehé ke lotu mo kitautolu ʻi he houalotu sākalamēnití ke vahevahe ai ʻa e maama mo e ʻofa ʻa e Fakamoʻuí ki he fāmilí mo e ngaahi kaungāmeʻá. Ka ko e taimi ʻe niʻihi ʻoku tau ʻai ia ke faingataʻa ange ʻi he meʻa ʻoku fie maʻu ke tau fakahokó.
Ko ha founga ʻeni ʻe fitu te tau lava ai ʻo tokoniʻi e ngaahi kaungāmeʻá ke nau ongoʻi fiemālie ange ʻi hono tali ʻo e fakaafe ke haʻu ki he lotú:
1. Fakahoko Ia ʻi he ʻOfa
Ko e hā ʻokú ke fakaafeʻi ai kinautolú? ʻOku fakahoko ia koeʻuhí ko koe pe ko kinautolu? Kapau te ke fakakaukau ki he lelei tahá, te nau ongoʻi hoʻo fakamātoató. Kapau te nau lava ʻo sio ʻoku nau mahuʻinga kiate koe, mahalo te nau loto fiemālie ange ke ako fekauʻaki mo ha toe meʻa ʻoku mahuʻinga kiate koe.
2. Fakaafeʻi Kinautolu ke Nau Lotu mo Koe
ʻEke ki ho ngaahi kaungāmeʻá pe ʻoku ʻi ai ha feituʻu ke nau lotu ai ki he Fakamoʻuí pea fakaafeʻi kinautolu ke mou lotu fakataha, tautautefito ʻi he taimi Kilisimasí mo e Toetuʻú. Kapau ʻoku ʻikai ko ha kau Kalisitiane kinautolu, fehuʻi ange pe ʻoku nau fie ako lahi ange fekauʻaki mo Sīsū Kalaisi pea fakaafeʻi kinautolu ke nau aʻusia ha lotu faka-Kalisitiane mo koe. Manatuʻi ke fakahaaʻi ʻa e fakaʻapaʻapa tatau ki heʻenau tuí, ʻo hangē ko ia ʻokú ke ʻamanaki te nau fai atu kiate koé.
3. ʻOua ʻe Loto Mamahi ka Tali “ʻIkai”
Kapau ʻe ʻikai tali ʻe hoʻo kaungāmeʻá, tali e “ʻikaí” ʻi he angaʻofa. Kae ʻoua naʻá ke fakakaukau ʻoku ʻuhinga ʻa e “ʻikai” ke ʻalu ki he lotú ko ha “ʻikai” ia kiate koe. ʻOku lahi ha ngaahi ʻuhinga ne nau pehē ai ʻikaí ka ʻoku ʻikai haʻane kaunga ki he ongo ʻoku nau maʻu kiate koé. Kapau he ʻikai ke ke tuku ha “ʻikai” ke ne liliu homo vā fetuʻutakí, mahalo te ke maʻu ha faingamālie ʻamui ange ke mahino lelei ange kiate koe ʻenau ngaahi ongó.
4. Tokoni ki Ho Ngaahi Kaungāmeʻá ke Nau ʻIloʻi e Meʻa ke ʻAmanaki Ki Aí
Kapau ʻoku tali ʻe hoʻo ngaahi kaungāmeʻá ha fakaafe ke haʻu ki he lotú, tokoni ke mahino kiate kinautolu ʻa e meʻa ke nau ʻamanaki ki aí: te nau teuteu fēfē, taumuʻa mo e lōloa ʻo e houalotu takitaha, pea mo e meʻa ʻe hoko ʻi he ngaahi houalotú—pe ʻikai hokó (hangē ko ʻení, ʻoku ʻikai tānaki ʻa e ngaahi foakí lolotonga ʻetau ngaahi houalotú). ʻOku totonu foki ke ke fakamatalaʻi ange kiate kinautolu ʻa e sākalamēnití pea mo hono ʻuhingá. ʻE ala tokoni ʻeni ke nau ongoʻi faingofua ange ʻi he taimi ʻoku nau omi ai ki he lotú.
Ko ha ngaahi vitiō ʻeni ʻe niʻihi te ke lava ʻo vahevahe ʻa ia ʻe ala tokoni ke nau ʻiloʻi ʻa e meʻa ke nau ʻamanaki ki aí:
5. Fetongi e Fakamatalá ʻaki ʻa e Fakafeʻiloakí
ʻOku faʻa siʻi ange e tokanga ʻa e kakaí ki heʻetau tokāteliné (ʻi he kamataʻangá) ʻi he tuʻunga ʻoku nau ʻi ai ʻi hotau koló mo e ngaahi ngāue leleí. Tokoniʻi kinautolu ke nau fetuʻutaki mo e kakaí, pea vahevahe e founga ʻoku tau kau ai ʻi he koló, ngāue fakaʻahó, mo fetauhiʻakí.
Ko ha founga lelei ke fakafeʻiloaki ʻaki ha taha ki he ongoongolelei ʻo Sīsū Kalaisi kuo fakafoki maí ke kamata ʻaki hano vahevahe ʻo e ngaahi tāpuaki ʻoku ʻomi ʻe he ongoongoleleí. Hangē ko ʻení, te ke lava ʻo feinga ke fakaʻaliʻali ange kiate kinautolu ʻa e founga ʻe lava ke tokoniʻi ai kinautolu ʻe he Siasí ke nau ʻilo honau tupuʻanga fakafāmilí, fakamālohia honau fāmilí, moʻui fakafalala lahi ange kiate kinautolú, fakahoko ha ngāue tokoni ʻoku ʻaongá, pea ʻoange ki heʻenau fānaú ʻa e ngaahi tuʻunga leleí ke nau moʻui ʻaki. ʻE lava ke toki hoko mai ʻa e fealēleaʻaki ʻi ha ngaahi tokāteline mo e tui pau ʻamui ange ʻi he taimi ʻoku nau mateuteu aí.
Mahalo te ke fie fakafeʻiloaki ange ʻa e pīsopé, palesiteni ʻo e Fineʻofá, faifaleʻi ki he temipalé mo e hisitōlia fakafāmilí, pe faiako Palaimeli maʻá ha fānau ʻi he fāmilí.
6. Talitali Lelei ʻa e Tokotaha Kotoa Pē
Kapau ʻe haʻu ho ngaahi kaungāmeʻá, fakahoko e meʻa te ke lavá ke nau ongoʻi ʻoku talitali lelei kinautolu mo feau ʻenau ngaahi fiemaʻú. Ko e meʻa tatau pē, kapau te ke sio ki ha taha ʻi he lotú ʻoku ʻikai ke ke ʻilo, anga fakakaumeʻa mo talitali lelei ia. ʻAi ke nau ʻiloʻi ʻa e mahuʻinga ke nau ʻi aí. Feinga ke ke sio ʻaki honau matá, fakaafeʻi ha ngaahi fehuʻi, mo tokoni ke mahino kiate kinautolu ʻenau aʻusiá.
7. ʻOua ʻe Fakamālohiʻi; Muimuiʻi
ʻOku manavasiʻi ha niʻihi ʻoku fie kau maí naʻa fakamālohiʻi kinautolu ki ha faʻahinga meʻa. ʻI hoʻo feinga ke ʻoange ha aʻusia lelei ʻe lava ke ongoʻi ai ʻe hoʻo ngaahi kaungāmeʻá ʻa e Laumālie Māʻoniʻoní, vahevahe ha ngaahi fakakaukau mo ha ngaahi ongo, kae ʻoua te ke ongoʻi ʻoku fie maʻu ke ke fakamālohiʻi ha aʻusia fakalaumālie. Falala ki he ʻOtuá pea tuku ke fakahoko ʻe he Laumālié ʻEne ngāué. Pea kapau ʻoku ʻikai maʻu ʻe hoʻo ngaahi kaungāmeʻá ha taimi ke nofo ai ʻi he taimi-tēpile kakato ʻo e houalotú pe nofo ʻi he tuku ʻa e lotú ke talanoa, fakamālō ange ʻi heʻenau haʻú pea fokotuʻu ha faingamālie ke toe vakaiʻi ai.
Ko e Fakaafe Mahuʻinga Tahá
Ko hono fakaafeʻi ʻo e niʻihi kehé ke nau lotu mo kitautolu ki he Fakamoʻuí, ʻoku ʻikai fie maʻu ke fakamafasia kiate kitautolu pe ko kinautolu. ʻI heʻetau fakaafeʻi hotau ngaahi kaungāmeʻá, ʻoku tau ngāueʻi ai e fakaafe ʻa Palesiteni Lāsolo M. Nalesoni ke ngāue fakaetauhi ki he niʻihi kehé ʻi ha “founga foʻou mo māʻoniʻoni ange”1 pea “ke tokoni ki hono tānaki ʻo ʻIsilelí.”2 ʻE muiaki mai ʻa e fiefiá ʻi heʻetau vahevahe ʻa e maama mo e ʻofa ʻa e Fakamoʻuí mo kinautolu ʻoku tau feohí.