“Naʻá Ne Fakangingila Homau Suú,” Liahona, ʻOkatopa 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻá Ne Fakangingila Homau Suú
Naʻe akoʻi au ʻe he ngāue tokoni faka-Kalaisi ʻa Pauló fekauʻaki mo e meʻaʻofa ʻo e Fakalelei ʻa e Fakamoʻuí ʻi ha founga ne ongo moʻoni ki hoku laumālié.
Lolotonga ʻeku ngāue fakafaifekau ʻi he Misiona Brazil Salvador South, naʻe faʻa kai fakataha e kau faifekau ʻe toko valu ʻi homau souní ʻi he ʻapi ʻo Pauló, ko ha mēmipa ʻo e Uooti Itapua. Naʻa mau maʻu meʻatokoni fakataha mo e fāmili tatau he uike kotoa pē ʻi ha ʻaho pau.
ʻI ha ʻaho ʻe taha ne mau maʻu meʻatokoni ai ʻi he ʻapi ʻo Pauló mo hono uaifí mo e ʻofefiné. Naʻe ʻuha ʻi he uiké kakato, pea naʻe fonu ʻa e ngaahi halá ʻi he ngaahi vaitafe vaí. Naʻe feʻunga pē e ʻapi ʻo Pauló, pea naʻe ʻi ai ha faliki sima kuo molemole ʻi he ʻalu ʻa e taimí. Naʻe ʻikai maʻu ʻe hono fāmilí ha naunau fale feʻunga maʻá e kau faifekau kotoa ʻe toko valú, ko ia ko e tokolahi taha ʻo kimautolu ne mau tangutu pē he falikí.
Ko Pauló ko ha papi ului ia ki he Siasí ʻa ia naʻe teʻeki ke ne maʻu ha faingamālie ke ngāue fakafaifekau. ʻI he ʻosi ʻemau kaí, naʻá ne ʻeke mai pe ko e fē feituʻu ʻe ʻave kimautolu ki ai ʻi heʻemau ngāue malangá ʻi he hoʻatā efiafi ko iá. Naʻá mau talaange ʻoku mau ʻalu ki he ʻōfisi ʻo e misioná ki heʻemau ʻinitaviu angamaheni mo e palesiteni fakamisioná.
Naʻá ne sio atu ki homau sū pelepelá mo ne pehē, “Kau ʻEletā, he ʻikai ke mou lava ʻo sio ki hoʻomou palesiteni fakamisioná mo e sū peheé!”
Naʻá ne ʻalu ki hono loki mohé ʻo foki mai mo ha meʻa fakangingila sū ne mei maha. Naʻá ne tūʻulutui leva he falikí ʻo kamata ke fakangingila homau suú.
ʻE lava fēfē nai ʻe he tangata ko ʻení ʻa ia naʻá ne ʻosi feilaulau lahi ke fafanga ha kau faifekau fiekaia ʻe toko valu ʻi he uike takitaha pea toe fakangingila mo homau suú? Naʻá ku kau ʻi he fakamuimuitahá, pea naʻá ku fakapapauʻi ke fakafisi ʻi he loto-fakaʻapaʻapa ʻi he taimi ne aʻu mai ai kiate aú. Ka ʻi heʻene aʻu ki hoku suú, ne u ʻilo kapau te u fakasītuʻaʻi ʻene tokoní, te u fakafisingaʻi ha meʻaʻofa toputapu mei ha tangata loto fakatōkilalo moʻoni.
Koeʻuhí ko e ngāue tokoni faka-Kalaisi ʻa Pauló, ʻoku ou ongoʻi ʻoku māfana hoku lotó ʻi he fiefia ʻi he taimi kotoa pē ʻoku ou fakakaukau ai kiate iá. Naʻá ne akoʻi au fekauʻaki mo e meʻaʻofa ʻo e Fakalelei ʻa e Fakamoʻuí ʻi ha founga naʻe ongo moʻoni ki hoku laumālié.
Naʻe fuesia ʻe Sīsū Kalaisi ʻa e mamahi lahi maʻá e tokotaha fakafoʻituitui kotoa pē. ʻI he taimi ʻoku tau tali loto fiemālie ai ʻEne foaki maʻatautolú, fakatomala mei heʻetau ngaahi angahalá mo muimui kiate Iá, ʻoku tupulaki ʻetau ʻofa kiate Iá (vakai, Tokāteline mo e Ngaahi Fuakava 88:33). ʻOku ʻiloʻi kakato ʻEne ʻofa kiate kitautolú ʻi he taimi ʻoku tau tali ai ʻa e meʻa ʻokú Ne foaki tauʻatāina maʻanautolu kotoa pē ʻoku loto mafesifesi mo fakatomalá.