“Lotua Kinautolu,” Liahona, ʻOkatopa 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Lotua Kinautolu
Naʻe fakaʻatā au ʻe he tāpuni ʻo e temipalé ke u faʻu ha ngaahi founga foʻou ke u kau ai ʻi he ngāue ʻa e ʻOtuá ʻaki ʻeku tokoniʻi e niʻihi kehé ʻi he tafaʻaki ko ʻeni ʻo e veilí.
ʻI he ngaahi taʻu siʻi kuo hilí, naʻá ku fakakaukau ai ke u ʻalu fakauike ki he temipalé. ʻI he taimi ko iá, naʻá ma nofo ofi ki ha temipale. Naʻe hoko ʻa e tōʻonga ko ʻení ko ha maʻuʻanga tokoni falalaʻanga ʻo e māmá mo e mālohi naʻá ku falala ki aí.
Hili ha taʻu ʻe taha mei ai, ʻi he hiki homau fāmilí, ne ʻikai ke mau toe nofo ofi ki ha temipale. Naʻe ʻikai taʻe-malava ha ʻalu ki he temipalé, ka naʻá ku ʻalu tuʻo ua pē ki ai ʻi he māhina, he naʻá ku fehangahangai mo e lōloa ange ʻo e taimi fefonongaʻakí mo e ngaahi fiemaʻu ʻa hoku fāmili kei īkí.
ʻI he kamata pē ʻa e mahaki fakaʻauha COVID-19, naʻe ʻikai ke u lava ʻo ʻalu ki he temipalé, ʻa ia naʻe hangē ha tautea hili hono toe fokotuʻutuʻu foʻou ʻeku moʻuí ke u ʻalu maʻu pē ki aí. Naʻá ku fifili pe ʻe founga fēfē nai haʻaku hokohoko atu ke tupulaki fakalaumālié, pea naʻá ku ongoʻi mafasia ʻi he ngali taʻe-totonu ʻa e ngaahi meʻá.
Lolotonga ha fufulu nifo angamaheni, naʻá ku fāinga ke fakanonga hoku ʻatamaí. ʻI he taimi naʻe ʻeke mai ai ʻe he mataotao haisiní pe ko e hā ʻoku ou fie fanongo ki ai lolotonga hono fufulu hoku nifó, naʻá ku tali ange, “Te u saiʻia ʻaupito ʻi ha fasi ongo fakalaulauloto ʻoku fakanongá.”
Naʻá ne pehē mai naʻe ʻikai teitei kole ia ʻe ha taha, ka naʻe pau ke ne fai ia. ʻI ha miniti ʻe hongofulu mā nima ki heʻema ʻapoinimení, naʻá ne fakamatalaʻi ʻa e lahi ʻo ʻene fiefia ʻi heʻema “fufulu nifo mo fakalaulaulotó.” Naʻá ne fakamatala mai leva fekauʻaki mo e loto-hohaʻa ʻi heʻene moʻuí, ʻa ia naʻe kau ai e lavea ne toki hoko ki hono foha taʻu 13. ʻI hono ʻākilotoa kimaua ʻe he longolongoaʻa ʻo ha ʻōfisi femoʻuekiná, naʻá ne vahevahe mai ʻene kavengá, pea naʻá ma maʻu fakataha ha nonga.
ʻI hoku tuʻunga nonga fakaʻatamaí, naʻá ku fakakaukau ai ki he temipalé. Naʻá ku fakatokangaʻi ʻoku ou fakalakalaka ʻi ha sēsini ʻinisitoli, ʻi heʻeku fakakaukau ki he fakalea ʻo ʻeku ngaahi fuakava ʻi he temipalé. Naʻe hoko mai ai ha ueʻi makehe ʻe tolu mei he Laumālié:
-
ʻEke ki he mataotao haisiní ʻa e hingoa ʻo hono fohá.
-
Talaange te ke lotua ia.
-
Lotua kinaua ʻaki hona hingoá.
Ne u ongoʻi hono liliu ʻeku kavengá ʻo hoko ko ha tāpuaki, tuʻunga ʻi he kiʻi feliliuʻaki faingofua ko ʻení. Naʻá ku fakatokangaʻi e founga hono tokoniʻi au ʻe heʻeku ngaahi fuakavá ke u ʻofa ki he Tamai Hēvaní mo hoku kaungāʻapí. Naʻe akoʻi au ʻe he Laumālié ʻoku tatau pē ʻa e ʻalu ki he temipalé mo hono tokoniʻi ʻo e niʻihi kehé ʻi he tafaʻaki ko ʻeni ʻo e veilí ʻa ia ʻoku fekauʻaki mo hono fakaivia fakalaumālie au mo ʻeku ngaahi kuí.
Naʻe ʻikai taʻofi ʻe he tāpuni ʻo e temipalé ʻeku tupulaki fakalaumālié. Ka naʻa nau fakaʻatā au ke u faʻu ha ngaahi founga foʻou ke u kau ai ʻi he ngāue ʻa e ʻOtuá mo maʻu ʻa e ʻofa, maama, mo e ʻilo fakalangí.