“Ngāue Fakafaifekau ʻi he Ngaahi ʻAho Fakaʻosí,” Liahona, ʻOkatopa 2022.
Maʻá e Ngaahi Mātuʻá
Ngāue Fakafaifekau ʻi he Ngaahi ʻAho Fakaʻosí
Siʻi Ngaahi Mātuʻa,
Neongo e ngaahi moveuveu ʻo e māmaní, ka ʻoku kei hokohoko atu pē ʻa e laka ki muʻa ʻa e ngāue ʻa e ʻEikí. ʻOku tau mātā tonu e ngāue ʻa e ʻEikí ʻi hono fanongonongo mo langa ʻo e ngaahi temipalé, ʻi he ngāue faivelenga ʻa e kāingalotú ʻi he funga ʻo e māmaní, pea ʻi he foaki ʻe he kau faifekaú honau taimí ke vahevahe ʻa e ongoongolelei ʻo Sīsū Kalaisí. Kuo kole mai foki ʻe he ʻEikí ke tau ngāue fakaetauhi ki he fakafoʻituituí. Tatau ai pē pe ko ha mēmipa lolotonga ʻo e Siasí pe ko ha kaungāmeʻa foʻou kuó ne fakahaaʻi ʻokú ne mahuʻingaʻia ʻi he ngaahi meʻa ʻoku tau tui ki aí, ʻoku ʻafioʻi kinautolu ʻe he ʻEikí, pea ʻokú Ne ʻafioʻi koe.
Fealēleaʻaki ʻi he Ongoongoleleí
Ngaahi Fuakavá mo hono Tānaki ʻo ʻIsilelí
Vahevahe mo ho fāmilí ha ngaahi kupuʻi lea mei he fakamatala fakalaumālie ʻa Palesiteni Lāsolo M. Nalesoni ʻi he peesi 4 pea aleaʻi e founga ʻoku tokoniʻi ai kitautolu ʻi hono tauhi ʻetau ngaahi fuakavá ke tau “maʻu ʻa e mālohi ke tekeʻi ʻa e ivi tākiekina taʻe-tuku ʻo e māmaní.” Kapau ʻoku ʻi ai haʻo fānau ʻoku teuteu ke ngāue fakafaifekau, vahevahe ʻene ngaahi akonaki fekauʻaki mo hono fakahoko ʻe he kau faifekaú “ʻa e ngāue maʻongoʻonga taha ʻi māmani he ʻaho ní.”
ʻOku ʻAfioʻi Kitautolu Takitaha ʻe he ʻOtuá
Ko ‘Ene fānau moʻoni ‘a kitautolu pea ‘okú Ne ‘ofa ‘iate kitautolu. Koeʻuhí ko e meʻá ni, ʻokú Ne tokanga foki ki heʻetau ului fakatāutahá. Lau e pōpoaki ʻa ʻEletā Hohe T. Pesela ʻi he peesi 40 fekauʻaki mo e aʻusia ʻene kuitangatá ʻi he ului fakatāutahá pea aleaʻi e founga ʻokú ke ʻilo ai ʻoku ʻafioʻi mo ʻofaʻi koe ʻe he ʻEikí.
Tokanga Taha ki hono Moʻui ʻAki ʻo e Ongoongoleleí
Ke tokoni ke mahino lelei ange ki hoʻo fānaú ʻa e meʻa ke tokanga taha ki ai ʻi heʻenau feinga ke moʻui ʻaki ʻa e ongoongoleleí, lau ʻa e fakamatala ʻi he peesi 30 ke ako ki he founga naʻe liliu ai ʻe ha tokotaha lahi kei talavou ʻene fakakaukaú ke vakai ki he taumuʻa ʻo e fekau takitaha mo e tefitoʻi moʻoni ʻo e ongoongoleleí.
Fiefia Fakafāmili ʻi he Haʻu, ʻo Muimui ʻIate Aú
Fehokotakiʻanga ʻo e ʻOfá
ʻOku talamai ʻe he palōfitá ʻi he ʻĪsaia 52:7, ʻe ʻomi ʻe Kalaisi ʻa e melinó, ongoongoleleí, mo e fakamoʻuí kiate kitautolu.
-
Aleaʻi ha ngaahi founga te mou lava ai ʻo vahevahe ʻa e ngaahi tāpuaki maʻongoʻonga ko ʻení ʻo fakafou ʻi he ngāue fakafaifekaú. Lisi ki he lahi taha ʻe lava ke fakakaukau ki ai ho fāmilí. (Ngaahi sīpingá: vahevahe e ongoongoleleí mo ho ngaahi kaungāmeʻá; ʻave e hingoa hoʻo ngaahi kuí ki he temipalé ke fakakakato honau ngaahi ouaú.)
-
Fokotuʻu ha Tohi ʻa Molomona ʻi he tafaʻaki ʻe taha ʻo e lokí. ʻAi ha tokotaha ke tuʻu ʻi he tafaʻaki ʻe tahá, ʻo ʻikai ngaue hono vaʻé, ke kakapa ki he tohí. (Fakapapauʻi ʻoku ʻikai lava ke kakapa ʻo aʻu ki he tohí.)
-
ʻAi ke tuʻu laine e mēmipa takitaha ho fāmilí ʻi he vahaʻa ʻo e tokotaha ʻi he tafaʻaki ʻo e lokí mo e Tohi ʻa Molomoná. Fakafehokotaki e nima, faʻu ha seini ʻo ha kakai, pea ʻoange e tohi ʻa Molomoná ki he tokotaha ʻuluakí. (ʻI hoʻo ʻiloʻi ko ia pe ko e kakai ʻe toko fiha ʻi hoʻo kulupú, te ke lava ʻo fakafuofuaʻi e mamaʻo ke kamata ai ʻa e tokotaha ʻuluakí.)
Fealēleaʻakí: Ko e hā ha faʻahinga ngāue ʻi heʻetau moʻuí te ne ala fakatupu ha “fehokotakiʻanga” ke tokoniʻi e niʻihi kehé ke nau fakatokangaʻi e ngaahi tāpuaki ʻo e ongoongoleleí?