“Naʻe ʻAfioʻi Au ʻe he ʻOtuá Kimuʻa Pea Toki Fanauʻi Aú,” Liahona, ʻOkatopa 2022.
Haʻu, ʻo Muimui ʻIate Au
Naʻe ʻAfioʻi Au ʻe he ʻOtuá Kimuʻa pea Toki Fanauʻi Aú
Ne tau nofo fakataha mo e Tamai Hēvaní kimuʻa pea toki fanauʻi mai kitautolú. “Naʻe ʻikai kamata ʻetau fononga fakatāutahá ʻi hono fanauʻi mai pē kitautolú. Kimuʻa pea fanauʻi mai kitautolú, ne tau fakataha ʻi ha maama ʻo e teuteu ʻa ia ne tau maʻu ai ‘ʻa [ʻetau] ngaahi ʻuluaki lēsoní ʻi he maama ʻo e ngaahi laumālié’ [Tokāteline mo e Ngaahi Fuakava 138:56]”1 Naʻe folofola ʻa e ʻEikí kia Selemaia ʻo pehē, “Naʻá ku ʻilo koe ʻi he heʻeki ai te u fakatupu koe ʻi he fatú; … pea tuʻutuʻuni koe ko e palōfita ki he ngaahi puleʻangá” (Selemaia 1:5).
Naʻe foaki mai nai ʻe he ʻEikí ha ngaahi ngāue ke tau fakahoko?
Naʻe pehē ʻe Sisitā Uenitī W. Nalesoni:
“Naʻe ʻomi hota tufakangá ʻi he maama fakalaumālié ko ha misiona fakaʻofoʻofa ke ta fakahoko lolotonga ʻeta ʻi he māmaní. …
“Ko e filí ʻoku ʻataua ia ke fai. Te ta fili nai ke fai ʻa e meʻa kotoa pē ke fakahoko ai e misiona fisifisimuʻa ko ia naʻe ʻuhinga ai hono ʻomi kitaua ki he māmaní?”2
ʻI he founga tatau ko ʻení, naʻe akoʻi ʻe ʻEletā Pulusi R. Makongikī (1915–85) ʻo e Kōlomu ʻo e Kau ʻAposetolo ʻe Toko Hongofulu Mā Uá, “ [ʻOku pehē foki [ʻe he ʻAposetolo ko Paulá] fekauʻaki mo e kāingalotu ʻo e Siasí ‘kuo fili ʻa kitautolu ʻe he ʻOtuá ʻi he teʻeki ai ʻai ʻa e tuʻunga ʻo e māmaní, ʻoku totonu ke tau māʻoniʻoni pea ʻikai tukuakiʻi ʻi hono ʻaó ʻi he ʻofa,’ pea kuo tomuʻa fakanofo kitautolu ke hoko ko e fānau ʻa Sīsū Kalaisi ʻaki hono ohí, pea maʻu ai ha ʻfakamolemole mei he ngaahi angahalá’ ʻi he moʻuí ni pea mo ha tofiʻa ʻo e nāunau taʻengatá ʻi he moʻui ka hoko maí [ ʻEfesō 1:7].”3