Faivelenga ʻi he Fakaʻau ke Motuʻa Angé

ʻOku ʻi ai Nai ha Meʻa ke Folofola Mai ʻAki ʻe he ʻEikí Kiate Au?

Fai ʻe Delbert H. Strasser

Ne faifai pea maʻu ʻe heʻeku faʻeé hono tāpuaki fakapēteliaké ʻi hono taʻu 90.

fefine toulekeleka

Laʻitā ne ngāue ʻaki ai ha kau mōtolo

Naʻe hiki ʻeku faʻē ko Makeletá mei Suisalani ki he ʻIunaiteti Siteití ʻi heʻene kei finemuí. Naʻe ʻikai fuoloa mei ai, kuo ʻi ai haʻane ʻapoinimeni ke maʻu hono tāpuaki fakapēteliaké. Ka ʻi heʻene ʻalu ke feʻiloaki mo e pēteliaké, naʻe ʻikai ke ne ʻi ai. ʻI ha faʻahinga ʻuhinga pē, naʻe ongoʻi pehē ʻe heʻeku faʻeé ko e fakapapauʻi ia naʻe ʻikai ha meʻa ke fakahā ange ʻe he ʻEikí, pea naʻe ʻikai ke ne toe fakataimi-tēpileʻi ʻene ʻapoinimení.

ʻOku ou fokotuʻu ki heʻeku faʻeé ʻi he taimi kotoa pē ʻi he ngaahi taʻu mai ko ʻení, ke ne toe fakakaukau ke maʻu hono tāpuakí. Ko e taha ia ʻo e kakai fefine faivelenga taha kuó u ʻiloʻí. Ka neongo ia, naʻá ne fuʻu loto fakatōkilalo peá ne tali mai ʻoku ʻikai ke ne fie maʻu ha meʻa makehe mei he ʻEikí. Naʻá ne pehē naʻe ʻikai ke ne fie maʻu ʻe ia ha tāpuaki he ko ha kiʻi taʻahine pē ia. Pea naʻá ne saiʻia pē ai.

Ne faifai peá ma fakalotoʻi ia ʻi hono taʻu 90 ke fokotuʻu ha taimi ke talanoa ai mo ʻene pēteliaké. Ko hono moʻoní, naʻe ʻi ai foki ha taʻe-fehinoʻaki mo pēteliake ko ʻení, pea ʻi he taimi naʻe ʻalu atu ai ʻa e Fineʻeikí, naʻe ʻikai ke ʻi he koló ʻa e pēteliaké. Ne pehē mai ia, “Sio?” “Naʻá ku talaatu ʻoku ʻikai ha meʻa makehe ʻa e ʻEikí ke fakahā mai kiate au.”

Ko e meʻa mālié, naʻá ne lava mo e pēteliaké ʻo fakataha ʻi he uike hono hokó. ʻI he taimi naʻe foaki mai ai ʻa e tāpuakí, naʻe fonu ia ʻi he ngaahi meʻafoaki, ngaahi talaʻofa, mo e ngaahi fakaikiiki fekauʻaki mo ʻene moʻuí ʻa ia naʻe fuʻu fakatāutaha pea mahino ko e haʻu fakahangatonu pē mei he ʻilo ʻa e ʻEikí kiate iá.

Naʻá ne pehē, “ʻOku ou tui naʻe ʻi ai pē ha meʻa naʻe folofola mai ʻaki ʻe he ʻEikí kiate au.”

ʻOku mahino kiate au ʻoku ʻafioʻi fakafoʻituitui kitautolu ʻe he ʻEikí. Pea tatau ai pē pe ʻokú ke ʻi he kamataʻanga hoʻo moʻuí pe ko hono ngataʻangá, ʻokú Ne ʻofa lahi ʻiate koe pea ʻokú Ne maʻu ai ha faleʻi mahuʻinga ke ʻoatu kiate koe ʻo fakafou ʻi hoʻo pēteliaké.

ʻOku nofo ʻa e tokotaha naʻá ne faʻu e talanoá ʻi ʻIutā, USA.

Ngaahi Tāpuaki ʻo e Moʻuí Kotoa

Fai ʻe Christy Monson, Ngaahi Makasini ʻa e Siasí

Ko ha niʻihi ʻeni ʻo e ngaahi founga ʻoku ou ʻilo kuo fakamālohia ai au koeʻuhí ko honau ngaahi tāpuaki fakapēteliaké:

• “ʻI heʻeku kei siʻí, naʻá ku fefaʻuhi mo e ngaahi ongo taʻe-feʻunga ʻo hoku mahuʻingá. Ka naʻe fakahā mai ʻe hoku tāpuakí ha ngaahi ʻulungaanga pau naʻe ʻafioʻi ʻe he Tamai Hēvaní ʻiate au. Naʻá ku hiki ha lisi ʻo e ʻulungaanga takitaha. ʻI heʻeku ako ʻa e lisi ko ʻení ʻi he ngaahi taʻu kuo hilí, kuó u vakai kiate au ʻo hangē ko e ʻafio mai ʻa e ʻOtuá kiate aú.”

• “Naʻe talaʻofa mai ʻe hoku tāpuakí te u nofo mo hoku husepānití ʻi he fefakaʻapaʻapaʻaki mo e feʻofaʻaki. Ka naʻe fakamamaʻo hoku husepānití mei he fāmilí mo fakatupulaki ha maʻunimā. Naʻá ku fakahā ki he ʻEikí te u fai ʻa e meʻa kotoa pē ʻi hoku mālohí ke fakahoko ʻa e palōmesi ʻi hoku tāpuakí. Ka naʻá ku talaange kiate Ia kuo pau ke Ne tataki ʻeku fonongá. Kuo taʻu lahi, ka kuó u ikunaʻi mo hoku husepānití ʻa e ngaahi palopalemá, fakaʻau ke vāofi ange, pea kei faivelenga ai pē. ʻOku ou ʻilo naʻe foaki mai ʻe he Tamai Hēvaní ʻa e talaʻofa ko iá ʻi hoku tāpuakí ke tokoniʻi au ke u ikuna.”

• Naʻe kau ki he Siasí ha tangata ʻoku ou ʻiloʻi ʻi hono taʻu 89. Naʻe fokoutua hono sinó ʻi he kanisaá. Ka naʻe palōmesi ange hono tāpuaki fakapēteliaké te ne ʻalu ki he temipalé. Hili ha ngaahi taimi, naʻá ne mālohi feʻunga ke tangutu ʻi ha saliote teketeke. Naʻe maʻu ʻenitaumeni pea silaʻi ia ki hono uaifí ʻi ha taimi nounou pē kimuʻa peá ne pekiá.

ʻOku maʻu ʻa e ngaahi tāpuaki fakapēteliaké mei he ʻOtuá ke fakahinohinoʻi kitautolu mo ʻomi ha fakafiemālie, nonga, mo ha tataki kiate kitautolu. ʻI he fakaʻau ke tau matuʻotuʻa ange mo sio ki he kuohilí, ʻoku tau lava ʻo mamata ki he toʻukupu ʻo e ʻEikí ʻi heʻetau moʻuí ʻo fakafou ʻi hotau ngaahi tāpuaki fakapēteliaké.