Fakakomipiuta Pē: Kakai Lalahi Kei Talavoú
Ko Hono Toe Ongoʻi Hoto Mahuʻingá ʻi he Temipalé
Kuo taʻu lahi ʻa e ʻikai ke u ʻalu ki he temipalé, ka naʻá ku tafoki ki he Fakamoʻuí ke tokoni mai ke u moʻui taau ke toe hū ki ai.
Faitaaʻi ʻe Megan Barnum
Naʻá ku tuʻu ʻi he fakafaletoló mo e kole mai ʻa e tokoni ua ʻi he kau pīsopelikí ke u lea ʻi he houalotu sākalamēnití fekauʻaki mo e mahuʻinga ʻo e temipalé. Ne u punou pē ki lalo pea kula hoku matá, mo kole ange ke ʻomai ha tefito kehe ke u lea ai. Naʻe taʻu lahi ʻa e ʻikai ke u hū he temipalé koeʻuhí ko ʻeku ngaahi fili naʻá ne motuhi ai au mei heʻeku Tamai Hēvaní, pea naʻe ʻikai ke u ongoʻi feʻunga ke lea ʻo kau ki he temipalé.
Hili e aʻusia ko iá, ne u kei fakakaukau pē ki he temipalé, peá u ongoʻi ha holi lahi ke u ʻalu ki ai ka naʻá ku toe faingataʻaʻia foki ʻi heʻeku ngaahi ongoʻi taʻe feʻungá. Naʻá ku ongoʻi manavasiʻi naʻa ʻikai fiemaʻu au ʻe he Tamai Hēvaní ʻi Hono fale toputapú.
Fai ha Ngaahi Meʻa ke Hoko ai ha Liliu
ʻI he fakaofi mai ʻa e konifelenisi lahí, ne u fakafanongo tailiili ki he kau leá, ʻo ʻamanaki te u ongoʻi ha faʻahinga fakaʻilonga ne kei ʻofeina au ʻe he ʻOtuá neongo ʻeku ngaahi fehalaakí. Ko e taimi ia ne pehē mai ai ʻe Palesiteni Tieta F. ʻUkitofa ko e Tokoni Ua ʻi he Kau Palesitenisī ʻUluakí, “ʻOku ʻikai ke mahuʻinga ia pe ko e hā e lahi e maumau kuo hoko ki heʻetau moʻuí. ʻOku ʻikai mahuʻinga pe ko e hā e lahi e kulamūmū ʻetau ngaahi angahalá, ʻa e lahi ʻetau loto ʻitá, ʻetau taʻelatá, liʻekiná, pe ko e mamahi hotau lotó. … ʻOku ʻikai ke taʻe-malava hano fakafoki mai ha moʻui ne fuʻu maumau.”1
Naʻá ku ongoʻi moʻoni naʻe folofola mai e ʻOtuá kiate au. Ne u fifili ʻi ha ngaahi māhina lahi ki ha founga ke u toe foki ai kia Kalaisí, pea ko e pōpoaki konifelenisi ko iá ko ʻEne ui ia kiate au ke u fai ha ngaahi liliu ke toe hū ki Hono falé.
Naʻá ku fakataha mo ʻeku pīsopé ke talanoa ki haʻaku toe hū ki he temipalé. Naʻá ne tokoniʻi au ke mahino e fatongia ʻe lava ʻe Sīsū Kalaisi ʻo fakahoko ʻi heʻeku moʻuí mo e lava ʻe hono tali ʻEne Fakaleleí ʻo tokoniʻi au ke u tuku atu ʻeku kavenga mafasiá mo e angahalá kiate Ia. Naʻe kamata ke u lotu ke maʻu ha mahino, mālohi, mo ha kātaki. ʻI heʻeku falala lahi ange ki he ʻOtuá mo toe fai lelei ange he ʻaho takitaha, ne māmāmile ʻeku toe fehokotaki mo e maama ʻa e Fakamoʻuí.
Naʻe mālohi ange ʻeku fakamoʻoni ki hoku tuʻunga ko e ʻofefine ʻo e Tamai Hēvaní ʻi heʻeku ngāue mo ʻeku pīsopé mo ako lahi ange ki hoku Fakamoʻuí. Naʻe mahino kiate au he ʻikai teitei kole mai hoku Huhuʻi ʻofá ke u mavahe meiate Ia, ka ʻe feinga ʻa Sētane ke u ongoʻi ʻoku ʻikai totonu ke u ʻi he temipalé. ʻI he ʻilo ko ʻení, ne faifai peá u ongoʻi mateuteu ke toe hū ki he fale ʻo e ʻOtuá.
Toe Foki ki he Temipalé
Ne u hū atu ki he temipalé hili ha ngaahi taʻu lahi, mo ha lekomeni manusinusi ne tā pelupelu, mo loto hohaʻa ke u ʻilo ki hoku tuʻungá ʻi he fale ʻo e ʻOtuá. Ko ʻeku ofi ange ki he matapā ʻo e temipalé ko e lahi ange ia ʻeku ongoʻi veiveiuá. Te u hangē nai ha valé ʻi he ʻikai ke u ʻiloʻi e feituʻu ke u ʻalu ki aí pe ko e meʻa ke faí? Ne u fuʻu motuʻa nai ke u ʻalu ki he temipalé ke [ fakahoko ha] papitaiso?
Naʻe malimali mai e tangata ʻi he tesi talitali kakaí ʻi heʻeku hū atú, ʻo ne talitali lelei au ki he temipalé. Naʻe fakafoʻou hoku laumālié ʻi he pongipongi ko iá ʻi hono fakapapauʻi mai ʻe he kau ngāue temipalé ʻa hoku tuʻunga ʻi he fale ʻo e ʻOtuá.
ʻI heʻeku mavahe mei he temipalé, naʻe taʻalo mai ha taha ʻo e kau ngāué kiate au ʻi heʻeku lue atu he holó ke hū ki tuʻa mei he faiʻanga papitaisó. Naʻá ne fanafana fiefia ʻo pehē mai, “Fakamālō atu ʻi hoʻo haʻu ki he temipalé he ʻaho ní—ne mau fiemaʻu koe ʻi heni!” Naʻá ku palōmesi ange te u toe foki mai he uike hono hokó ʻi heʻeku hanganaki atu ke toe ongoʻi e māfana ʻo e temipalé.
Koeʻuhí ko hotau tuʻunga fakalangi ko e ngaahi ʻofefine mo e ngaahi foha ʻo ha mātuʻa fakalangí, te tau lava kotoa ʻo ʻiloʻi ʻoku ʻi ai hotau mahuʻinga ʻi he temipalé. ʻOku ʻikai ha meʻa te ne lava ʻo taʻofi kitautolu mei he tokoni ʻofa ʻa e ʻOtuá kapau ʻoku tau fie nofo ʻi Hono ʻaó. ʻOkú Ne finangalo ke tau ʻi ai, pea ʻi heʻetau fai ha kiʻi ngāue ke hoko ʻo hangē ko hotau Fakamoʻuí he ʻaho takitaha, te tau lava ʻo fakafenāpasi ʻetau moʻuí mo ʻEne moʻuí pea moʻui taau maʻu pē mo e temipalé. ʻOku ou ʻilo te tau lava ʻo hū ki he fale māʻoniʻoni ʻo e ʻOtuá koeʻuhi ko e Fakalelei ʻa Kalaisí pea maʻu ʻa e ngaahi tāpuaki ʻoku fakatatali mai maʻatautolu ʻi lotó, pea hangē ko ia kuó u aʻusiá, ʻoku feʻunga ʻānoa pē ʻa e ngaahi tāpuaki ko iá.