Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

Loʻimata ʻo e Mamahi, Loʻimata ʻo e Fiefia

Fai ʻe Celmer Charles Villareal, Sēpū, Filipaini

Naʻe fakamamahi e mālōlō ʻeku faʻeé, ka kuo “folo hifo hoku mamahí ʻe he fiefia ʻa Kalaisí.”

ʻI ha hoʻatā Sāpate ʻe taha, naʻá ku kamata fakakaukau ai kia Sīsū Kalaisi mo ʻEne feilaulau fakaleleí. Naʻe tokoni e ngaahi fakakaukau ko iá ke u ongoʻi malu mo nonga ai.

Ka neongo ia, naʻe fakafokifā pē ʻeku manatuʻi ʻa e ngaahi tūkunga fakautuutu ʻo e COVID-19 ʻi hoku fonuá. Naʻá ku ongoʻi loto mamahi he taimi pē ko iá koeʻuhí ko e kakai naʻe faingataʻaʻia fakamāmani lahí. Naʻá ku pehē loto pē, “ʻOku ʻikai ke nau ongoʻi ʻa e malu mo e nonga tatau ʻoku ou maʻú.” ʻI he ngaahi ongo ko iá, naʻá ku tūʻulutui ai pea kamata ke u lotu.

Naʻá ku lotua ʻa kinautolu kuo pekiá, pea pehē kiate kinautolu kuo mole honau ngaahi ʻofaʻangá. Naʻá ku tangi koeʻuhí ʻoku ou ʻiloʻi ʻa e mamahi ʻoku hoko ʻi he mole ha taha ʻokú ke ʻofa aí. Lolotonga e mahaki fakaʻauha fakamāmani lahi ʻo e COVID-19, kuo fuesia fakafoʻituitui ʻe ha tokolahi ʻa e kavenga ʻo e mole ha taha ʻoku nau ʻofa aí.

Naʻe haʻu leva ʻeku fakakaukaú ki heʻeku faʻeé, ʻa ia naʻá ne mālōlō ʻi hoku taʻu nimá. ʻI he hokohoko atu e tafe ʻa e loʻimatá ʻi hoku fofongá, naʻá ku lotu ki he Tamai Hēvaní fekauʻaki mo ʻeku ʻofa lahi ki aí. Pea naʻá ku manatuʻi leva naʻe tangi ʻa Sīsū mo Mele mo Maʻata hili e pekia ʻa Lasalosi, hona tuongaʻané mo Hono kaungāmeʻá (vakai, Sione 11:19–35). Naʻe fakafiemālieʻi au ʻe heʻene manavaʻofá, ka naʻá ku kei tangi pē ʻi heʻeku fakakaukau ki he lahi ʻo ʻeku ʻofa ki heʻeku faʻeé.

ʻI he hokohoko atu ʻeku lotú, ne u fakakau ʻeku fineʻeikí ʻi heʻeku lotú. Naʻá ku fakakaukau kiate ia peá u fakakaukauloto ki ai ʻokú ne ʻi muʻa ʻiate au. Naʻá ku fakahā ki he Tamai Hēvaní ʻeku ʻofa mo e ongoʻi taʻelata heʻene molé. Naʻá ku fakamālō kiate Ia ʻi he taimi ne u feohi ai mo ʻeku faʻeé ʻi he māmani ko ʻení. ʻOku ou ʻofa kiate ia, ka ʻoku ou tui ʻe ʻi ai ha ʻaho te mau toe fakataha ai ko ha fāmili ʻo taʻengata.

Naʻá ku kiʻi tuʻu, pea fonu hoku lotó ʻi he ʻamanaki lelei. Naʻá ku lotu ki he Tamai Hēvaní ke tāpuakiʻi au mo ʻeku tamaí ke ma kātaki kae ʻoua kuó ma toe fetaulaki mo ʻeku faʻeé. Naʻá ku tangi leva ʻi he fiefia mo e ʻamanaki lelei ki he fakataha nāunauʻia ko ia ʻoku fakafaingamālieʻi ʻi he Toetuʻu ʻa e Fakamoʻuí.

ʻOku ou ongoʻi houngaʻia lahi ki he Tamai Hēvaní ko e palani ʻo e fakamoʻuí. Naʻe fakamamahi e mālōlō ʻeku faʻeé, ka kuo “folo hifo hoku mamahí ʻi he fiefia ʻa Kalaisí” (ʻAlamā 31:38). ʻOku ou houngaʻia kiate Ia. ʻOkú ne fakafoʻou ʻeku ʻamanaki lelei ʻi he moʻui ka hoko maí. ʻOku mahuʻinga lahi ange ʻEne Toetuʻú kiate au he taimí ni ʻi ha toe taimi kimuʻa. Te u toe sio ki heʻeku faʻeé koeʻuhí ko hoku Fakamoʻuí.