Ngaahi Tefitoʻi Meʻa Mahuʻinga ʻo e Ongoongoleleí

ʻUhinga ʻEtau ʻAukaí

Faitā ʻa Scott Law

ʻOku ʻuhinga ʻa e ʻaukaí ke ʻoua ʻe kai mo inu kae lava ke haʻu ʻo ofi ange ki he ʻOtuá. Kapau ʻe fakaʻatā ia ʻe heʻenau moʻui leleí, ʻoku ʻaukai ʻa e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he Sāpate ʻuluaki ʻo e māhina takitaha. Ka te tau lava foki ʻo ʻaukai ʻi ha ngaahi taimi kehe, hangē ko e taimi ʻoku puke lahi ai ha mēmipa ʻo e fāmilí pe uōtí pe koló.

Ngaahi Akonaki ʻa Kalaisí

ʻI he kuonga ʻo e Fuakava Motuʻá, naʻe ʻaukai ʻa Mōsese mo ʻIlaisiā (vakai, ʻEkesōtosi 34:28; 1 Ngaahi Tuʻi 19:8). ʻI he kuonga ʻo e Fuakava Foʻoú, naʻe ʻaukai ʻa Sīsū Kalaisi ko e teuteu ki Heʻene ngāué (vakai, Mātiu 4:1–4). Naʻá Ne akoʻi ʻEne kau ākongá fekauʻaki mo e mālohi pea mo e mahuʻinga ʻo e ʻaukaí. ʻOku kei hokohoko atu pē he ʻahó ni ʻa e fekau ko ia ke ʻaukaí.

Taumuʻá

Ko e ʻaukaí ko ha founga ia ke tau ofi ange ai ki he ʻOtuá. Mahalo te tau fie ʻaukai ʻi he taimi ʻoku tau fekumi ai ki ha fakahaá pe ko ha tāpuaki pau. Te tau lava ʻo ʻaukai ke fakahaaʻi ʻetau fakafetaʻi ki he ʻOtuá. ʻOku toe ʻomi foki ʻe he ʻaukaí ha founga ke tau tokoniʻi ai e niʻihi kehé ʻo fakafou ʻi he foaki ʻaukaí.

ʻAukaí mo e Lotú

Kuo akoʻi mai ʻe he kau palōfitá ko e ʻaukai taʻe-kau ai ha lotú ko e taʻe-kai pē. Te tau lava ʻo kamata mo fakaʻosi ʻetau ʻaukaí ʻaki ha lotu, pea ʻe lava ke tau lotu loto lolotonga ʻetau ʻaukaí. Te tau lava ʻo lotua ha mālohi mo ha ueʻi fakalaumālie pea ke mahino kiate kitautolu e finangalo ʻo e ʻOtuá. Te tau lava foki ʻo kole ki he ʻOtuá ha ngaahi tāpuaki maʻatautolu pe ko hotau ngaahi ʻofaʻangá.

Sāpate ʻAukaí

Ko e ʻuluaki Sāpate ʻo e māhiná ʻoku meimei ko ha ʻaho ʻaukai. ʻI he ʻaho ko iá, ʻoku tau ʻaukai ai ʻi ha vahaʻataimi houa ʻe 24 kapau ʻoku tau lava. ʻOku tau lotu foki, ʻalu ki heʻetau ngaahi fakatahaʻanga faka-Siasí, pea fai ha foaki ʻaukai ki he Siasí.

Faitaaʻi ʻe Shirlene Stoddard

Ngaahi Foaki ʻAukaí

Ko e foaki ʻaukaí ko ha foaki ia ke tokoniʻi ʻa kinautolu ʻoku faingataʻa‘iá. Ko ha konga ʻeni ʻo e fono ʻo e ʻaukaí. Ko e taimi ʻoku ʻaukai ai e kāingalotú, ʻoku fakaafeʻi kinautolu ke nau fai ha foaki ʻoku tatau mo e mahuʻinga ʻo e ngaahi houa kai naʻe ʻikai fai ai ha maʻu meʻatokoní. ʻOku tau ʻave ʻa e foakí, hangē ko e vahehongofulú, ki ha mēmipa ʻo ʻetau kau pīsopelikí pe kau palesitenisī fakakoló pe fakahū ia ʻi he uepisaiti ʻa e Siasí.

Houalotu ʻAukaí mo e Fakamoʻoní

ʻI he Sāpate ʻaukaí ʻoku hoko ʻa e houalotu sākalamēnití ko ha fakataha ʻo e ʻaukai mo e fakamoʻoni. Lolotonga e fakataha ko ʻení, ʻoku tau hiva, lotu, mo maʻu e sākalamēnití ʻo hangē ko ia ʻoku tau fai he Sāpate kotoa pē. Pea ʻoku fakaafeʻi leva ʻa e haʻofangá ke fai ʻenau ngaahi fakamoʻoni kia Sīsū Kalaisi mo ʻene ongoongoleleí.

Ngaahi Tāpuaki ʻo e ʻAukaí mo e Lotú

ʻI he taimi ʻoku tau ʻaukai mo lotu aí, ʻoku tau ofi ange ai ki he ʻEikí mo fakatupulaki hotau mālohi fakalaumālié. ʻOku tau toe fakamālohia foki ʻetau moʻui fakafalala pē kiate kitautolú, maʻu ha manavaʻofa ʻoku lahi angé, pea hoko ʻo loto fakatōkilalo ange.

Mei he Ngaahi Folofolá

• ʻOku tokoniʻi kitautolu ʻe he ʻaukaí ke tau toe māʻoniʻoni ange mo ofi ange ki he ʻOtuá (vakai, ʻĪsaia 58:6–11).

• ʻE lava ke tokoniʻi kitautolu ʻe he ʻaukaí mo e lotú ke tau maʻu ha fakamoʻoni (vakai, ʻAlamā 5:46).

• Ko e ʻaukaí ko ha fekau (vakai, Tokāteline mo e Ngaahi Fuakava 88:76).

Ngaahi Kupuʻi Lea ke Manatuʻí

• Fakahaá: Ko e fetuʻutaki ia mei he ʻOtuá ki Heʻene fānaú ʻi māmani.

• Fakamoʻoní: Ko ha fakamoʻoni fakalaumālie ki he moʻoní ʻoku fakafou mai ʻi he Laumālie Māʻoniʻoní.

• Moʻui Fakafalala Pē Kiate Kitá: Ko e malava ko ia ke tokonaki maʻa hoʻo ngaahi fiemaʻu fakatuʻasino mo fakalaumālié.

Fekumi ki ha Meʻa Lahi Ange

Kapau ʻoku ʻi ai haʻo ngaahi fehuʻi fekauʻaki mo e ʻaukaí, te ke lava ʻo talanoa ki hoʻo kau tangata pe fefine ngāue fakaetauhí, kau taki fakauōtí pe fakakoló, pe kau faifekaú.