Si Jesucristo ang Lakas ng mga Kabataan
Magtiwala kayo kay Jesucristo. Aakayin Niya kayo sa tamang daan. Siya ang inyong lakas.
Sa paghahanda para sa mensaheng ito ngayon, nadama ko ang malalakas na pahiwatig na magsalita sa mga kabataang babae at lalaki.
Nangungusap din ako sa mga nagdaan sa pagkabata, maging sa mga taong hindi na talaga maalala pa iyon.
At nangungusap ako sa lahat ng nagmamahal sa ating mga kabataan at nagnanais na magtagumpay sila sa buhay.
Para sa lumalaking henerasyon, may mensahe ako lalo na para sa inyo mula sa ating Tagapagligtas na si Jesucristo.
Ang Mensahe ng Tagapagligtas sa Inyo
Mahal kong mga kaibigang kabataan, kung naririto mismo ang Panginoon ngayon, ano kaya ang sasabihin Niya sa inyo?
Naniniwala ako na magsisimula Siya sa pagpapahayag ng Kanyang matinding pagmamahal sa inyo. Maaaring bumigkas lamang Siya ng mga salita, ngunit tatagos din ito nang husto—mula lamang sa Kanyang presensya—kaya hindi iyon maipagkakamali, manunuot ito nang malalim sa inyong puso, pupuspos sa inyong buong kaluluwa!
At magkagayunman, dahil lahat tayo ay mahina at hindi perpekto, may ilang alalahaning maaaring pumasok sa inyong isipan. Maaaring maalala ninyo ang mga pagkakamaling nagawa ninyo, mga pagkakataong nagpatangay kayo sa tukso, mga bagay na hindi sana ninyo ginawa—o sana’y naisagawa ninyo nang mas maayos.
Mahihiwatigan iyan ng Tagapagligtas, at naniniwala ako na bibigyan Niya kayo ng katiyakan sa mga salitang sinabi Niya sa mga banal na kasulatan:
“Huwag matakot.”1
“Huwag mag-alinlangan.”2
“Lakasan ninyo ang inyong loob.”3
“Huwag mabagabag ang inyong puso.”4
Sa palagay ko, hindi Siya gagawa ng mga dahilan para sa inyong mga pagkakamali. Hindi Niya babalewalain ang mga iyon. Hindi, hihilingan Niya kayong magsisi—talikuran ang inyong mga kasalanan, magbago, upang mapatawad Niya kayo. Ipapaalala Niya sa inyo na inako Niya ang mga kasalanang iyon 2,000 taon na ang nakararaan upang kayo ay maaaring magsisi. Bahagi iyan ng plano ng kaligayahang ipinagkaloob sa atin ng ating mapagmahal na Ama sa Langit.
Maaaring sabihin ni Jesus na ang inyong mga tipan sa Kanya—na ginawa ninyo nang kayo ay binyagan at pinaninibago tuwing tumatanggap kayo ng sakramento—ay nagbibigay sa inyo ng espesyal na kaugnayan sa Kanya. Ang uri ng kaugnayang inilalarawan sa mga banal na kasulatan bilang pamatok na magkaugnay upang, sa tulong Niya, makaya ninyong dalhin ang anumang pasanin.5
Naniniwala ako na gugustuhin ng Tagapagligtas na si Jesucristo na makita, madama, at malaman ninyo na Siya ang inyong lakas. Na sa tulong Niya, walang limitasyon sa maaari ninyong maisakatuparan. Na walang hangganan ang inyong potensyal. Nais Niyang tingnan ninyo ang inyong sarili tulad ng pagtingin Niya sa inyo. At ibang-iba iyan sa pagtingin sa inyo ng mundo.
Ipapahayag ng Tagapagligtas, nang may katiyakan, na kayo ay anak na babae o lalaki ng Diyos na Makapangyarihan sa lahat. Ang inyong Ama sa Langit ang pinakamaluwalhating nilalang sa sansinukob, puno ng pagmamahal, kagalakan, kadalisayan, kabanalan, liwanag, biyaya, at katotohanan. At balang araw nais Niyang manahin ninyo ang lahat ng mayroon Siya.6
Ito ang dahilan kaya kayo nasa lupa—para matuto, lumago, at umunlad at maging katulad ng lahat ng dahilan kaya kayo nilikha ng inyong Ama sa Langit.
Para maging posible ito, isinugo Niya si Jesucristo para maging Tagapagligtas ninyo. Ito ang layunin sa likod ng Kanyang dakilang plano ng kaligayahan, Kanyang Simbahan, Kanyang priesthood, mga banal na kasulatan—lahat ng iyan.
Iyan ang inyong tadhana. Iyan ang inyong kinabukasan. Iyan ang pinili ninyo!
Katotohanan at mga Pagpili
Nasa sentro ng plano ng Diyos para sa inyong kaligayahan ang kakayahan ninyong pumili.7 Mangyari pa, nais ng inyong Ama sa Langit na piliin ninyo ang walang-hanggang kagalakan sa piling Niya, at tutulungan Niya kayong makamit ito, ngunit hindi Niya ito ipipilit sa inyo kailanman.
Kaya hinahayaan Niya kayong pumili: Liwanag o kadiliman? Mabuti o masama? Kagalakan o kalungkutan? Buhay na walang hanggan o espirituwal na kamatayan?8
Parang madali namang pumili, hindi ba? Ngunit kahit paano, dito sa lupa, tila mas kumplikado iyon kaysa nararapat.
Ang problema, hindi natin palaging nakikita ang mga bagay-bagay nang kasinglinaw ng gusto natin. Ikinumpara iyon ni Apostol Pablo sa “malabo nating nakikita sa isang salamin.”9 Maraming bagay na nakalilito sa mundo tungkol sa kung ano ang tama at mali. Nababaluktot ang katotohanan kaya nagmimistulang mabuti ang masama at masama ang mabuti.10
Ngunit kapag masigasig ninyong sinasaliksik ang katotohanan—ang walang hanggan at di-nagbabagong katotohanan—ay nagiging mas malinaw ang inyong mga pagpipilian. Oo, mayroon pa rin kayong mga tukso at pagsubok. Nangyayari pa rin ang masasamang bagay. Mga bagay na nakapagtataka. Mga bagay na kalunus-lunos. Ngunit makakaya ninyo iyan kapag alam ninyo kung sino kayo, bakit kayo narito, at kapag nagtitiwala kayo sa Diyos.
Kaya saan ninyo matatagpuan ang katotohanan?
Nakapaloob iyon sa ebanghelyo ni Jesucristo. At ang kabuuan ng ebanghelyong iyon ay itinuturo sa Ang Simbahan ni Jesucristo ng mga Banal sa mga Huling Araw.
Sabi ni Jesucristo, “Ako ang daan, at ang katotohanan, at ang buhay: sinuman ay hindi makakarating sa Ama kundi sa pamamagitan ko.”11
Kapag may mahahalagang pagpili kayong gagawin, si Jesucristo at ang Kanyang ipinanumbalik na ebanghelyo ang pinakamainam na piliin. Kapag may mga tanong kayo, si Jesucristo at ang Kanyang ipinanumbalik na ebanghelyo ang pinakamainam na sagot. Kapag nanghihina kayo, si Jesucristo ang inyong lakas.
Nagbibigay Siya ng lakas sa mahihina; at sa mga walang lakas, nagdaragdag Siya ng lakas.
Sila na naghihintay sa Panginoon ay mapapanibago ng Kanyang lakas.12
Para sa Lakas ng mga Kabataan
Para matulungan kayong makita ang Daan at matulungan kayong gawing gumagabay na impluwensya ang doktrina ni Cristo sa inyong buhay, naghanda Ang Simbahan ni Jesucristo ng mga Banal sa mga Huling Araw ng isang bagong resource, isang binagong bersyon ng Para sa Lakas ng mga Kabataan.
Sa loob ng mahigit 50 taon, ang Para sa Lakas ng mga Kabataan ay naging isang gabay sa maraming henerasyon ng mga kabataang Banal sa mga Huling Araw. Lagi akong may kopya niyon sa bulsa ko, at ibinabahagi ko iyon sa mga taong nag-uusisa tungkol sa ating mga pamantayan. Na-update na iyon at pinasigla para mas umangkop sa mga hamon at tukso ng ating panahon. Ang bagong bersyon ng Para sa Lakas ng mga Kabataan ay makukuha online sa 50 iba’t ibang wika at makukuha rin nang nakalimbag. Magiging malaking tulong ito sa paggawa ng mga pagpili sa inyong buhay. Lubos sana ninyo itong tanggapin bilang sariling inyo at ibahagi ito sa inyong mga kaibigan.
Ang bagong bersyon na ito ng Para sa Lakas ng mga Kabataan ay may subtitle na Isang Gabay sa Paggawa ng mga Pagpili.
Para maging napakalinaw, ang pinakamahusay na gabay na posibleng mapasainyo sa paggawa ng mga pagpili ay si Jesucristo. Si Jesucristo ang lakas ng mga kabataan.
Ang layunin ng Para sa Lakas ng mga Kabataan ay ibaling kayo sa Kanya. Itinuturo nito sa inyo ang mga walang-hanggang katotohanan ng Kanyang ipinanumbalik na ebanghelyo—mga katotohanan tungkol sa kung sino kayo, kung sino Siya, at ano ang maisasakatuparan ninyo gamit ang Kanyang lakas. Itinuturo nito sa inyo kung paano gumawa ng mabubuting pasiya batay sa mga walang-hanggang katotohanang iyon.13
Mahalaga ring malaman ninyo kung ano ang hindi ginagawa ng Para sa Lakas ng mga Kabataan. Hindi ito nagpapasiya para sa inyo. Hindi ito nagsasabi sa inyo ng “oo” o “hindi” sa bawat pagpiling kakaharapin ninyo. Ang Para sa Lakas ng mga Kabataan ay nagtutuon sa pundasyon ng inyong mga pagpili. Nagtutuon ito sa mga pinahahalagahan, alituntunin, at doktrina sa halip na sa bawat partikular na pag-uugali.
Ang Panginoon, sa pamamagitan ng Kanyang mga propeta, ay lagi tayong ginagabayan sa direksyong iyon. Nakikiusap Siya sa atin na “dagdagan ang [ating] espirituwal na kakayahang tumanggap ng paghahayag.”14 Inaanyayahan Niya tayong “pakinggan Siya.”15 Nananawagan Siya na sundan natin Siya sa mas dakila at mas banal na mga paraan.16 At natututo tayo sa gayon ding paraan linggu-linggo sa Pumarito Ka, Sumunod Ka sa Akin.
Sa palagay ko ay mabibigyan kayo ng gabay ng mahahabang listahan ng mga damit na hindi ninyo dapat isuot, mga salitang hindi ninyo dapat sambitin, at mga pelikulang hindi ninyo dapat panoorin. Ngunit makakatulong ba talaga iyan sa isang pandaigdigang simbahan? Tunay bang maihahanda kayo ng gayong pamamaraan sa isang panghabambuhay na pamumuhay na tulad ni Cristo?
Sabi ni Joseph Smith, “Tinuturuan ko sila ng mga wastong alituntunin, at pinamamahalaan nila ang kanilang sarili.”17
At sinabi ni Haring Benjamin sa kanyang mga tao sa Aklat ni Mormon, “Hindi ko masasabi sa inyo ang lahat ng bagay kung saan kayo ay maaaring magkasala; sapagkat maraming magkakaibang daan at mga paraan, na lubhang napakarami kung kaya’t hindi ko na yaon magagawang bilangin.”18
Nagpatuloy si Haring Benjamin sa pagsasabing, “Ngunit ito lamang ang masasabi ko sa inyo, … [bantayan] ang inyong sarili, ang inyong mga isipan, at ang inyong mga salita, at ang inyong mga gawa, at [sumunod] sa mga kautusan ng Diyos, at [magpatuloy] sa pananampalataya … sa ating Panginoon, maging hanggang sa katapusan ng inyong buhay.”19
Mali bang magkaroon ng mga panuntunan? Siyempre hindi. Kailangan nating lahat ang mga iyon araw-araw. Ngunit maling magtuon lamang sa mga panuntunan sa halip na magtuon sa Tagapagligtas. Kailangan ninyong malaman kung bakit at kung paano at pagkatapos ay pag-isipan ang mga kahihinatnan ng inyong mga pagpili. Kailangan ninyong magtiwala kay Jesucristo. Aakayin Niya kayo sa tamang daan. Siya ang inyong lakas.20
Ang Kapangyarihan ng Tunay na Doktrina
Ang Para sa Lakas ng mga Kabataan ay matapang sa pagpapahayag ng doktrina ni Jesucristo. Matapang ito sa pag-anyaya sa inyo na pumili batay sa doktrina ni Cristo. At matapang ito sa paglalarawan ng mga pagpapalang ipinapangako ni Jesucristo sa mga sumusunod sa Kanyang Daan.21
Itinuro ni Pangulong Russell M. Nelson: “Kapag ang pinakahangarin ninyo ay hayaang manaig ang Diyos [sa inyong buhay], … maraming desisyon ang nagiging mas madali. … Maraming isyu ang nagiging hindi na mahalaga! Alam ninyo kung paano magiging [kaaya-aya]. Alam ninyo ang dapat panoorin at basahin, kung saan dapat mag-ukol ng oras, at sino ang dapat makasama. Alam ninyo kung ano ang gusto ninyong maisakatuparan. Alam ninyo ang uri ng taong talagang nais ninyong kahinatnan.”22
Isang Mas Mataas na Pamantayan
Napakataas ng mga pamantayan ni Jesucristo para sa Kanyang mga tagasunod. At ang paanyaya na masigasig na hangarin ang Kanyang kalooban at mamuhay ayon sa Kanyang mga katotohanan ang posibleng pinakamataas na pamantayan!
Ang mahahalagang temporal at espirituwal na pagpili ay hindi lamang dapat na nakabatay sa personal na kagustuhan o kung ano ang mas madali o popular.23 Hindi sinasabi ng Panginoon na, “Gawin ninyo ang anumang gusto ninyo.”
Ang sinasabi Niya ay, “Hayaang manaig ang Diyos.”
Ang sinasabi Niya ay, “Pumarito ka, sumunod ka sa akin.”24
Ang sinasabi Niya ay, “Mamuhay sa mas banal, mas mataas, mas ganap na paraan.”
Ang sinasabi Niya ay, “Sundin ang aking mga kautusan.”
Si Jesucristo ang ating perpektong halimbawa, at nagsisikap tayo nang buong lakas ng ating kaluluwa na sundan Siya.
Mahal kong mga kaibigan, hayaan ninyong ulitin ko, kung nakatayo ang Tagapagligtas ngayon dito, ipapahayag Niya ang Kanyang walang-hanggang pagmamahal sa inyo, ang Kanyang lubos na tiwala sa inyo. Sasabihin Niya sa inyo na kaya ninyong gawin ito. Kaya ninyong bumuo ng isang kalugud-lugod at masayang buhay dahil si Jesucristo ang inyong lakas. Makakahanap kayo ng tiwala, kapayapaan, kaligtasan, kaligayahan, at pagiging kabahagi ngayon at magpakailanman, dahil matatagpuan ninyo ang lahat ng ito kay Jesucristo, sa Kanyang ebanghelyo, at sa Kanyang Simbahan.
Taimtim kong pinatototohanan ito bilang isang Apostol ng Panginoong Jesucristo at iniiwan ko sa inyo ang aking taos-pusong basbas nang may malaking pasasalamat at pagmamahal sa inyo, sa pangalan ni Jesucristo, amen.