“Na Rarama ni Bula,” Liaona, Janu. 2023.
Na Rarama ni Bula
Na iVakabula o Jisu Karisito sa noda rarama, noda bula, kei na noda sala—ena noa, nikua, ka tawamudu.
Vakamatailalai mai na Vakanamata ki na Reki, mai vei Michael T. Malm
Ni sa dromu na matanisiga ena dua tale na Sigatabu ena 1948, au raica niu sa taubale sobu ena yasa ni Uciwai na Trent e Nottingham, Igiladi. Niu se qai yabaki 20, au se qai kacivi wale ga oqo meu peresitedi ni tikina. Sa dua na siga balavu, ka veivakaocai ka vakasinaiti ena soqoni kei na veiqaravi, ia au a marau ka vakacegu ena cakacaka.
Niu taubale tiko e bati ni uciwai, au a cavuta e dua na masu e lomaqu. Niu nuitaka meu vakila eso na veidusimaki mai vua na Turaga, au taroga, “Au sa cakava tiko beka na ka O vinakata?”
A lutuki au e dua na yalo vakacegu veiluvuci kei na kilamatata. Ena gauna sara ga oya, au sa mai kila kina ni o Jisu Karisito e kilai au ka lomani au. Au a sega ni raica e dua na raivotu se rogoca e dua na domo, ia au a kila vakalevu na buladina i Karisito kei na Nona bula vakalou me vaka e a tu e mataqu o Koya ka kaciva na yacaqu.
Na gauna kamica ka malumu oqo e sa bulia na noqu bula. Mai na siga oya ki na siga nikua, sa vakauqeti na vakatulewa bibi kece au a cakava ena noqu kila na iVakabula. Ena veiyabaki kei na vuqa na yasai vuravura, au sa vakadinadinataka ni o Jisu Karisito e Luve ni Kalou, na Rarama kei Vuravura. Sa ka dokai vei keda meda lako yani Vua, meda muri Koya, ka vakila na Nona rarama ena noda bula.
Rarama kei Vuravura
E dua na bogi ni oti e vuqa na yabaki ni veika sotavi vakadaukaulotu tawaguilecavi oya, keirau a saravi lomalagi tiko kei Barbara, na watiqu. Ni keirau sarava tiko, au rai cake ena qoroqoro ena milioni na kalokalo, ka vaka me serau sara ka totoka ena bogi oya. A vuki ena kurabui noqu vakanananu ki na vosa ni Turaga vei Mosese: “Raica au sa bulia e vuqa na vuravura, ka sa sega ni wili rawa; ia sa tu na inaki ni noqu buli ira; a sa buli ira na Luvequ e Duabau Ga” (Moses 1:33).
Mai vua na iVakabula a lako mai kina na kaukauwa ka bulia ka vakararamataka na matanisiga, vula, kalokalo, kei vuravura (raica na Vunau kei na Veiyalayalati 88:7–10). Sa rawa kina vakaidina Vua me cavuta, “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula” (Joni 8:12; raica talega na Joni 9:5).
Ena vosa nei Peresitedi Dallin H. Oaks, iMatai ni Daunivakasala ena Mataveiliutaki Taumada, “O Jisu Karisito na rarama kei vuravura baleta ni sai koya na ivurevure ni rarama sa ‘lako mai na iserau ni Kalou me vakasinaita na maliwa lala’ [Vunau kei na Veiyalayalati 88:12].” Na rarama ni iVakabula sai koya “na rarama dina sa vakararamataka na tamata kecega sa lako mai ki vuravura” (Vunau kei na Veiyalayalati 93:2; raica talega na 84:46). Ena rarama oqo, eda na kila kina na sala meda kina na “vinaka mai na ca” (Moronai 7:16). Na rarama raraba oqo e vakatokai me “rarama ni dina,” “na rarama i Karisito,” kei na “Yalo i Karisito” (Vunau kei na Veiyalayalati 88:6; 88:7; Moronai 7:16).1
A kaya na iApositolo o Joni, “A sa cilava na butobuto na rarama; a sa sega ni kila na butobuto” (Joni 1:5). Ena noda gauna oqo, sa cakacaka tiko o Setani me liutaki ira na luve ni Kalou ki na butobuto, ka sogota “na rarama, kei na vu-ni-bula, kei na dina kei vuravura” (Ica 4:12).
Eda na sega ni rawa ni kila vakataucoko—se vakavinavinakataka—na iVakabula kei na Nona kosipeli ni sa yali vei keda na Nona rarama kei na dina. Ia ni da sa veivutuni ka talairawarawa, veiqaravi, ka qaravi Koya, eda na vakadruka na butobuto. Sa lesu mai na Nona rarama ka kauta laivi na buto ni vuravura mai na keda maliwa kei na noda vakasama.
Vakalougatataki mai na Rarama
Ni sa butobuto cake na noda vuravura ka yavavala, na vakilai ni rarama ni Turaga ena noda bula sa vaka e dua na bolebole. Ia e vakananumi keda o Peresitedi Nelson, “Na butobuto sa tubu cake tiko e lako vata mai kei na veika dredre sa mai ramase cake kina na rarama i Jisu Karisito.”2
Au sa raica ni serau cake na Nona rarama ki yaloqu niu soli gauna ena veika ni Yalotabu ena gauna lo, vakanomodi me vaka na bogi oya vata kei Barbara. Oqori na gauna e lako mai kina vei keda na veivakauqeti vakayalo, veituberi, kei na rarama. Oqori na gauna eda na kilamatata kina na noda kalougata dina ni tiko e dua na noda iVakabula.
Ni sa Rarama kei Vuravura, sa vakararamataka na iVakabula na sala ni noda ilakolako vakayago ena Nona ivakaraitaki kei na ivakavuvuli (raica na Joni 8:12). E vakamamadataka o Koya na noda icolacola ena Nona loloma kei na yalololoma (raica na Maciu 11:28–30). Ena vakamamadataka o Koya na yaloda ena inuinui kei na veivakabulai ena vuku ni Nona Veisorovaki (raica na Moronai 7:41). Ka vakararamataka o Koya na noda vakasama ena “Yalo ni ka dina” (Vunau kei na Veiyalayalati 6:15; raica talega na 11:13).
E kaya o Elder David A. Bednar ena Kuoramu ni iApositolo Le Tinikarua, “Ena veigauna kece ni noda bula, ena veituvaki kece sara eda na sotava, ia ena veibolebole yadua eda na sotava, sai Jisu Karisito na rarama ena kauta laivi na rere, e vakarautaka na veivakadeitaki kei na veidusimaki, kei na vakacegu tudei kei na reki.”3
E a laki kaulotu ki Igiladi o Elder Ballard mai na 1948 ki na 1950.
Dulaka Cake Na Nomu Rarama
Na dokai ni kena wasei na rarama ni iVakabula vei ira na tani ka sureti ira me ra lako mai Vua ka vakila na Nona loloma vei ira e sa dau ka talei tu ga vei au. Au taleitaka meu daukaulotu e Igiladi. Au taleitaka niu peresitedi ni kaulotu mai Kenada. Kau taleitaka na noqu veikacivi ena gauna oqo vaka lewe ni Kuoramu ni iApositolo Le Tinikarua. Na noqu veikacivi e solia vei au na madigi meu vakadinadinataki Jisu Karisito ka wasea na itukutuku ni Veivakalesuimai ki vuravura raraba.
Ena gauna makawa, a tukuna na iVakabula vei ira na Nona tisaipeli:
“Oi kemudou na rarama kei vuravura. Na koro sa tara toka e ulunivanua sa sega ni tabonaki rawa.
“Me caudre vakakina na nomudou rarama e matadra na tamata, me ra raica na nomudou ivalavala vinaka ka vakarokorokotaka na tamamudou sa tiko mai lomalagi” (Maciu 5:14–16).
Kivei ira na tamata i Nifai, a kaya o Koya, “Raica sai Au ga na rarama mo dou dulaka cake—me vaka dou sa raica niu sa kitaka.” A kuria o Koya, “Ia dou sa kila na ka sa dodonu mo dou kitaka ena noqu lotu; ia na ka kecega dou sa raica niu sa kitaka, mo dou kitaka talega” (3 Nifai 18:24; 27:21).
Ena noda gauna, sa namaka vakakina na iVakabula vei ira na Nona tisaipeli me ra taurivaka na Nona rarama me ra “vakasava tani na butobuto mai na keda maliwa]” (Vunau kei na Veiyalayalati 50:25). Sa cila na noda rarama ni da sa loloma me vaka na loloma i Jisu. Sa cila na noda rarama ni da wasea na noda ivakadinadina ni Veivakalesuimai kei na noda inuinui vei Karisito. Ena caudre na noda rarama ni da laveta na domoda ena taqomaki ni dina. Ia ni sa cila tiko na noda rarama, eda na dreti ira na tani ki na ivurevure ni rarama koya.
Soli veiqaravi yalosavu, ko na vakila kina na Nona rarama e yalomu. Masulaka ena yalomalumalumu na madigi mo wasea na kosipeli, ka o na dusimaki vei ira era sa vakarau tu me ra ciqoma na Nona rarama. Lomani ira na tani ena veisala lalai ka lelevu eso, ko na cakava me vinaka ka ramase cake na vuravura oqo.
Matailalai mai vei Jisu Karisito, mai vei Harry Anderson
Na Rarama sa Tawacava
Au vakavinavinaka tawamudu ena vuku ni ka au a sotava niu se daukaulotu gone mai Igiladi ena noqu sa mai kila vakataki au ni o Jisu na Karisito. Au sa kila vakaidina oqo nikua niu sa sotava na bula ena kena veivakatovolei kei na reki.
Na noqu veiqaravi ena Lotu e sa vakalougatataki au ena veikasotavi vakasakiti ka vakayalo talei e vuqa ka so era sa rui ka tabu me veivosakitaki. E sega tale ni dua na isolisoli e bibi cake ka talei cake au rawa ni solia vei iratou na luvequ, makubuqu, makubuqu vakarua, kei kemuni, na noqu itokani e vuravura taucoko, mai na noqu ivakadinadina dei ni o Jisu na Karisito, na Luvei Tamada Tawamudu, na iVakabula ka Dauveivueti ni kawatamata kecega.
Na watiqu vakamareqeti, o Barbara, a takali yani ena 2018. Au vakavinavinaka dina niu kila ni ena vuku ni neirau vauci ena valetabu ka ena vuku i Jisu Karisito, keirau na tiko vata tale, kei na neirau matavuvale, ki na tawamudu taucoko.
Ena so na gauna, au sa wawale sara ga. Ena veigauna oqori, au dau tu vakadua ka sarava na iyaloyalo ni iVakabula. Au vakasamataki Koya e Kecisemani, ka vakasauri, au sa sega tale ni oca. Au kila e yaloqu baleta ni vakadruka o Koya na vuravura, “sa oti na butobuto, ka sa cilava na rarama dina ena gauna oqo” (1 Joni 2:8).
Au kila ni bula tiko o Jisu Karisito. “Sai Koya na rarama sa tawacava, ka sega ni vakabutobutotaki rawa” (Mosaia 16:9). Sai Koya na noda rarama, noda bula, kei na noda sala—e nanoa, nikua, ka tawamudu. Me da tudei ena noda muri Koya ka dulaka na Nona rarama e matai vuravura.