Vakarautaka na Nomu Qele Vakayalo

Mai vei Baraca Milton Camargo

Matai ni Daunivakasala ena Mataveiliutaki Raraba ni Matawilivola ni Sigatabu

Na vosa vakatautauvata ni daukakaburaki e rawa ni vukei keda me da vakavakarau ki na noda vuli ni Veiyalayalati Vou ena Lako Mai, Mo Muri Au ena yabaki oqo.

E dua na noqu vosavakatautauvata taleitaki ena Veiyalayalati Vou na vosavakatautauvata ni daukakaburaki, me vaka e kunei ena Maciu 13:3–23 (raica talega na Marika 4:3–20; Luke 8:5–15). Ena vosa vakatautauvata oqo, na sala era ciqoma kina na tamata na vosa (na sorenikau) e vakatauvatani ki na veimataqali qele. Eda vulica ni qele yadua e tiko e dua na kena yaga bibi, se vinaka se ca.

Eda dau wilika wasoma na vosa vakatautauvata oqo ka vakasamataka ni sa lomadra na tamata mera ciqoma ka bulataka na kosipeli. Ni dina oqo, au vakabauta ni vosa vakatautauvata e rawa talega ni vakamacalataka na noda toso yadudua ni da tubu ena vakabauta kei na kilaka vakosipeli. Ena yasana kadua, eda sega ni sogolati tu ena dua bau na mataqali se ivakatagedegede ni vakabauta. Eda rawa, ena vakabauta kei na sasaga, toroya cake na noda qele vakayalo me vuataka na vua vinaka cake.

Au vinakata meda dikeva vata mada na vakasama oqo baleta ni sa vukei au meu kilamatata na vakatautauvata oqo ena dua na sala titobu cake. Au vakabauta ni gauna eda vakavakarau kina ki na noda vuli ena Veiyalayalati Vou ena Lako Mai, Mo Muri Au me baleta na yabaki ka tarava, na railesuvi ni vosa vakatautauvata ni daukakaburaki e rawa ni vukei keda me da vakarautaka na lomada me da ciqoma na dina ni kosipeli.

Ciqomi ni Sorenikau ni Kosipeli

Ena vosa vakatautauvata, eda vulica ni sa kakaburaki tiko na daukakaburaki:

Eso na sorenikau e lutu ena tutu ni sala, ka kani ira na manumanu vuka.
Eso era lutu ena vanua veivatu. Era buroro ia era malai ena kata ni siga.
Eso era lutu ena maliwa ni wa vakavotona, ka vakaruguti ira na wa vakavotona.
Eso era lutu ena vanua vinaka ka ra vua kina

E vakamacalataka na Turaga:

“Ni sa dua e rogoca na vosa ni matanitu, ka lecava tiko, sa qai lako mai na vu ni ca, a sa kovea na ka sa kaburaki ki lomana.” Sai koya oqo sa kaburaki ena tutu ni sala.

“Ia ko koya sa ciqoma na sorenikau ki na veivanua vatu, sai koya oqo sai koya sa rogoca na vosa, ka vakabauta ena marau;

“Ia ni sa sega na wakana e lomana, sa tu dede vakalailai ga: ia ni sa tubu na rarawa, se na veivakacacani ena vuku ni vosa, sa tarabe sara.

“Ia ko koya sa kaburaki ena veiwavakavotona sai koya oqo sa rogoca na vosa: ia na lomaocaoca ena vuku ni vuravura oqo, kei na iyau dauveivakaisini, sa vakaruguta na vosa, a sa sega kina ni vua.

“Ia ko koya sa kaburaki e na vanua vinaka, sai koya oqo sa rogoca na vosa, a sa kila na kena ibalebale; a sa vua, ka vuai drau eso, sa onosagavulu eso, sa tolusagavulu eso.” (Maciu 13:19–23; vakaikuritaki).

Meda digova mada na veimataqali qele yadua ka raica na veika e rawa ni caka me vakavinakataka cake.

Droini mai vei David Green

Qele e Tutunisala

E kaya o Peresitedi Dallin H. Oaks, na iMatai ni Daunivakasala ena Mataveiliutaki Taumada: “Na sorenikau e ‘lutu ena tutu ni sala’ (Marika 4:4) e se bera ni yacova na qele ni bula oqo ka na rawa ni ra tubu kina. Era sa vaka na ivakavuvuli era lutu ki na yalo e kaukauwa se sega tu ni vakarau.”¹

Kena ikuri, eso na gauna eda sega ni kilamatata na veika eda rogoca se wilika ena ivolanikalou baleta ni se bera ni vakarau na yaloda. Ni yaco oqori, na cava me da cakava?

E rawa ni da kerea e dua na ivakamacala mai vei ira era kila. E rawa ni da tarogi ira na daukaulotu, noda qasenivuli ni Matawilivola ni Sigatabu, noda iliuliu ni matabete se isoqosoqo, noda qasenivuli ni semineri se inisitute, o ira era veiqaravi vei keda, se noda itubutubu yalodina kei na lewe ni matavuvale. E rawa ni da vulica na vosa mai na koniferedi raraba. Na app ni Gospel Library e solia e vuqa na ivurevure ka rawa ni vukea meda vakasaqara vakalevu cake na kilamatata.

E dodonu talega meda masu ka kerea vua na Kalou me levu cake na rarama. Kevaka e dina na yaloda, e tikodina na noda inaki, ka da sa vakabauti Karisito, eda na ciqoma na kila-ka ni dina ni kosipeli (raica na Moronai 10:4–5). E kaya na Turaga:

Mo ni kerekere, ka na soli vei kemuni; dou vakasaqara, ka ko ni na kunea; mo ni tukituki, ka na dolavi vei kemuni.

“Ni sa rawata ko koya yadua sa kerekere; ka sa kunea ko koya sa vakasaqara ka na dolavi vua sa tukituki.”(3 Nifai 14:7–8).

Qele ena Veivanua Veivatu

Eso na tamata era rogoca na kosipeli vakalesui mai vei ira na daukaulotu, vakila na loloma i Karisito, ka dau tiko ka marautaka na veisoqoni ni Lotu. Ia, ni toso na gauna, sa tomani tikoga na dredre ni bula. Era raica ni sega ni veisautaki na bula ki na dua na veivakalougatataki veitaravi tawayalani. E sa lutu sobu na nodra vakabauta ka ra sa ciri tani yani.

Eso talega era raica na “vanua veivatu” ni ra tiko ena dua na soqoni se dua na koniferedi ka vakauqeti me ra cakava na veika dodonu kece sara mai na gauna oya ka lako yani. Ia ena siga Moniti ni ra sa lesu tale ki na nodra itavi tudei. Na bolebole ena cakacaka e se dredre tikoga. E rairai totoka vakasivia na veitemaki. O koya e malumalumu se lutu sobu kina na nodra gagadre me vakavinakataka na nodra bula vakayalo.

Era vulica ena sala kaukauwa ni sega na waka vakayalo titobu me tauri keda ena cagi, vakani keda ni da viakana, se vakabulabulataki keda ni kata na siga, eda rawa ni rusa vakayalo.

Eda na toroya cake vakacava na vanua vatuvatu? Kauta laivi na vatu ka vakatitobutaka na wakada vakayalo.

E rawa ni veibolei na kena kau laivi na vatu. Ena gadrevi beka me buli e dua na draki ka vakauqeti kina na vakabauta. Ena gadrevi beka me tauyavutaka e dua na veitokani vou kei na vakuwai mai na irairai ni veika ca (raica na 1 Cesolonaika 5:22).

Me noda na kaukauwa me da kauta laivi kina na vatu, eda gadreva na veivuke ni iVakabula. E yaco oqori ni da ciqoma na veiyalayalati e solia o Koya. E tekivu oqo ena ciqomi ni veisureti me papitaiso. E kena ibalebale mo vakadeitaki ka ciqoma na isolisoli ni Yalo Tabu. E kena ibalebale me ciqomi e dua na veiyalayalati e sega ni tu vei keda, me vaka na ciqomi ni matabete se lako ki na valetabu. E kena ibalebale na lako ki lotu ka vakavouya na veiyalayalati ena nomu vakayagataka na sakaramede e veimacawa.

Ni yaco mai na veivakatovolei kei na veitemaki, sa rawa ni da tautauri matua ki na veiyalayalati eda sa cakava vua na Turaga. “Eda sa vauci vakamatua vua ka vata kei na iVakabula ni da nanuma ena yalodina ka cakava noda vinaka taucoko meda bulataka na itavi eda sa ciqoma,” e kaya o Elder David A. Bednar ena Kuoramu ni iApositolo Le Tinikarua. “Ia na ivau oqo vei Koya e ivurevure ni kaukauwa ena vei draki taucoko ni noda bula.”²

Qele ena maliwa ni Wavakavotona

Na qele oqo e vakatara na kau me tubu, oka kina na wa vakavotona. Na wavakavotona sai koya na “lomaocaoca kei na iyau kei na marau ni bula oqo” ka rawa ni vakavuna meda “sega ni vua dina” (Luke 8:14).

Na cava ena yaco ni da sa ciqoma na veiyalayalati ia sa sega tale ni lakova na salatu ni veiyalayalati? Se da vakaivotavota ena sakaramede ia eda sega ni kerea na veivosoti, baleta ni da sega mada ga ni vakasamataka tale na noda cala. Se eda na kerea beka na veivosoti ia eda sega ni via vosoti ira na tani. Eda sa ciqoma na veiyalayalati ni valetabu ia eda sega ni qaravi ira era vakaleqai tu. Eda biuta vakatikitiki na madigi me da wasea na kosipeli baleta ni da rerevaka de rairai sega ni kilikili se vakamadua, se baleta ni da sa sega tale ni kila na ka me da kaya.

Na kena iwali me da bulataka na veiyalayalati eda cakava ena gauna eda papitaiso kina, “mo dou tagi vata kei ira sa tagi; [me] vakacegui ira sa rarawa, ka vakadinadinataka na Kalou ena veigauna kecega, ena veika kecega, kei na veivanua kecega [eda] sa tiko kina, me yacova na mate” (Mosaia 18:9).

Eda cavuta tani na co ca ni da veivutuni e veisiga, cakava na veisau lalai se levu, ka lesu ki na salatu dodonu ka rabalailai ni veiyalayalati.

Eda sega ni vinakata me vakaruguti keda na veico ca ni bula oqo. Eda vakayacora oqo ena noda veisautaka na noda itikotiko me ivakaruru ni vakabauta. Eda vakasaqara na cava ga e sureta na veivakauqeti ni Yalotabu. Eda sega ni muria na cava ga e kauta laivi na veivakauqeti oya. Ia ka da veiqaravi ena matanitu ni Kalou—ena noda veikacivi, ena valetabu, ena cakacaka ni kaulotu, ena noda matavuvale.

Na Vanua Vinaka

E vuqa era sa rogoca na vosa, kilamatata, ka laiva me tubu e lomadra. E kaya vei ira na Turaga, “Au sa digitaki kemudou, ka lesi kemudou, mo dou lako ka vua, ka me tiko talega na vuamudou” (Joni 15:16). Vei ira na tamata vakaoqori, na kena isau sai koya me da toso ki liu ena vakabauta ka vosota ena cakacaka vinaka.

E taroga o Peresitedi Oaks, “Na cava meda na cakava ena ivakavuvuli ni iVakabula ni da bula voli tiko?”³ Ena yabaki oqo, ni da vakavakarau meda vulica na Veiyalayalati Vou, meda toro voleka vua na iVakabula ka vakatorocaketaka noda qele vakayalo me rawa ni da ciqoma na vosa. Sa na qai rawa meda vuataka na vua e kerea vei keda o Koya meda kauta mai ena noda ciqoma ka vakavouya na veiyalayalati ka na vauci keda Vua, ena noda qaravi Kalou ka lomani ira na wekada, kei na noda toso tiko ena salatu ni veiyalayalati ka na kauti keda lesu mai ena dua na siga ki na noda itikotiko vakalomalagi.