“Bibi ena Matavuvale na Veivosaki,” Liaona, Janu. 2023.

Bibi ena Matavuvale na Veivosaki

Mai vei Jay Gowen

Daunivakasala ni Bula ni Vakasama

Na veivosaki bibi ena vukei ira na luveda mera kila na ka era vakabauta kei na vuna era vakabauta kina.

na tama kei na luvena tagane e rau kaba ulunivanua

E dua na gonetagane a kerei tamana me vakavulici koya me kaba ulunivanua. A vakatavulica o tama na veika bibi kece sara, oka kina na tuvaka, itataqomaki, vakavakarau, kei na iyaya. A taroga na luvena erau na veivosakitaka ninaica na ka me caka ena gauna ni leqa tubukoso. A kaya o tamana ni sega ni vinakata me vakarerei luvena tagane ka rawa ni wawa na veivosaki oqo me yacova ni sa gadrevi.

Eratou vakacavara na nodrau vuli ka gole yani ena imatai ni nodrau kaba ena Ulunivanua o Rainier volekati Seattle, Washington. A tekivu cecere sara na veika e sotavi kei na ituvaki me yacova ni sa vuki me ca vakalevu na draki, ka rau sa raica ni rau sa rai tiko ki na mata ni dua na delana waicevatasisi.

Erau sega ni kila na ka me rau cakava baleta ni rau a sega ni veivosakitaka. A tarogi tamana na luvena, “Au sa vakarau beka ki na veivosaki me baleta na ka me caka ena gauna ni leqa tubukoso, Ta?”

Na veivosaki bibi—ena veitaqomaki ni noda itikotiko—e rawa ni vukei keda me da vakavakarau ki na waicevatasisi ni bula.

“Na imatai ni dina levu ena lagirabailevu oqo oya ni Kalou e lomani keda,” e kaya o Elder Jeffrey R. Holland ena Kuoramu ni iApositolo Le Tinikarua.¹ E vakananuma vei keda na nona vosa ni loloma sa yavu ni veigauna tawamudu kei na noda bula e veisiga. Ena lomanibai ni loloma o ya, sa ka bibi kina na veivosaki kei na isema eda cakava vata kei na noda matavuvale.

Niu dua na tagane vakawati, tama, daunivakasala ni koronivuli, ka daunivakasala vakalaiseni ni ituvaki ni bula ni vakasama, au raica ni veivosaki vakamatavuvale e bibi ka sega ni dodonu me lokuyarataki. O Joy D. Jones, na Peresitedi Raraba eliu ni Lalai, a kaya: “Eda na sega ni rawa ni waraka na veivosaki me yaco rawarawa ga vei ira na luveda. Na veivosaki vakamatavuvale baleta na kosipeli i Jisu Karisito, e bibi ka, rawa ni sureta na Yalotabu.”²

Na cava soti mada na veivosaki bibi?

A vakamacalataka o Sisita Jones na veivosaki bibi me “veivosaki rawarawa, veikauwaitaki [oya] e rawa ni liutaki ira na gone [kei keda] meda kakua walega ni kila na veika era vakabauta, ia e bibi sara, na vuna era vakabauta kina.”³ Dua na vosa au taleitaka mai na ivakamacala oqo na rawarawa. Na noda veivosaki e sega ni gadrevi me titobu se vereverea se tuvanaki sara mada ga. E dina, eso na veivosaki talei duadua e dau noda e sega ni rawa ni tuvanaki, ka rawa ga ni vakarautaki ni dau tiko vata voli ga kei keda na Yalo me vukei keda.

E kuria na ivakavuvuli o Sister Jones: “Na saumaki vakacalaka e sega ni dua na ivakavuvuli ni kosipeli i Jisu Karisito. Na noda na vakataka na iVakabula e sega ni dau yaco vakailoa.”⁴ E yaco oqo na vosa ena vosa, ena gauna nakiti kei na sasaga.

Sa dodonu me dau yaco vakavica na veivosaki bibi?

E dodonu me da dau veitalanoa kei ira na luveda ena veisiga. Na levu ga ni noda dau veivosaki bibi, na kena yaco me matau cake, me itovodei, ka veivakararamataki.

Na sala ca duadua me tiko kina na veivosaki bibi o ya me kakua sara ga ni caka! Eda dau nanuma wasoma ni sega ni gauna donu, e rui vereverea, se ra na sega ni ciqoma na luveda. Eda sega ni vinakata me da vakacudrui se cavuta na ka cala se vakavuna me logaloga ca e dua. Ia, na kena tovolei tiko me dua na veivosaki e vinaka cake mai na kena sega ni tukuni e dua na ka.

Eda na veivosaki bibi vakacava kei ira na luveda?

Na iwalewale rawarawa au sa kunea me caka kina na veivosaki bibi o ya na loloma, vakarorogo, ka veisau. E dina ni da na sega beka ni vinaka sara ena dua vei ira, sa rawa ni da segata vagumatua me da muria tikoga na ivakarau oqo.

Loloma: Ni sega na yavu kei na vakayagataki ni loloma, ena sega ni rawa ni mana sara na noda veitalanoa bibi. Na loloma sai koya na ka, na gauna, na vuna, kei na sala ni veika kece eda cakava ena noda matavuvale. E dodonu mera vakila na veitaqomaki na luveda ni ra veisemati kei keda, ka na vakarautaka na loloma na draki bibi oya. E rawa ni da dau vakaraitaka tikoga na loloma. E vakaraitaka vei keda o Jisu Karisito na kena icakacaka.

E kaya o Sister Jones: “Ni da susugi ka vakarautaki ira na luveda, eda na rokova na na nodra galala me ra digidigi, eda lomani ira ena lomada taucoko, eda vakavulica vei ira na ivakaro ni Kalou kei na Nona isolisoli ni veivutuni, ka da na sega sara, vakadua, ni soro ena vukudra. Kena ilutua, e sega li ni koya oqo na ivalavala ni Turaga vei keda yadudua?”⁵

Vakarorogo: Au sa vulica mai na noqu cala vakai au ni vakarorogo vakadua sara e tiki bibi ni veitalanoa bibi. Na vakarorogo e dodonu me liu ka talevi wasoma. Sa ivakaraitaki uasivi duadua o Jisu Karisito ena sala me caka kina na veivosaki bibi ka vakarorogo matua. Eda vulica ena Joni 8 ni gauna era kauta mai kina Vua na Farisi na yalewa sa dautagane, na imatai ni ka e kaya vua na yalewa o ya na taro: “Sa evei o ira oqori? sa sega e dua sa lewai iko mo cudruvi, ne?” (tikina e 10). Me vukea na kena vakayacori na vuli bibi, a taroga o Koya na taro eso ka vakarorogo ni se bera na veivakavulici.

Veisau: Ni da sa lomani, vakarorogo, ka semati, na cava eda cakava me tekivu eke? Eda gadreva beka me da veivutuni, veivakavulici, vakarorogo vakalevu cake, veiqaravi, kere veivosoti, veivosoti? Na veivosaki bibi e dodonu me vakarautaka vei keda e dua na madigi me da veisau. Sa nuitaki ni da sa saga tiko meda vaka, a kaya o Peresitedi Russell M. Nelson,“vinaka cake vakalailai e veisiga.”⁶

E rawa vakacava ni levu cake na noda veivosaki bibi veitaravi?

O na dusimaki ena ivakatakila me baleta na ka e vinaka duadua ki na nomu matavuvale. Vakasamataka mada na veivakatutu oqo mai na veika e sotava na neirau matavuvale:

Vuli ivolanikalou vakamatavuvale: Niu tarogi ira na luvei keirau na cava keitou cakava ka vukei ratou vakalevu me ratou veivosaki vakosipeli, eratou kaya ni kena vulici vata tiko ena veiyakavi yadua na Lako Mai, Mo Muri Au.

Soqoni ni ivakadinadina vakamatavuvale ena vei Sigatabu ni lolo: E sega ni vakavuqa ni dua na soqoni sara ni ivakadinadina ia e dua na gauna ki na tamata yadua ena neitou matavuvale me wasea na veika era vakila, vakabauta, dredre, kei na rawa-ka. Keirau dau segata vakaveiwatini me keirau vakadinadinataki Jisu Karisito. Na soqoni oqo sa yaco me dua na gauna veivakauqeti duadua ena neitou vale.

Vakayakavi ni matavuvale: Ni keirau kaya, “Sa vica na kaloko?” ena gauna ni vakayakavi, era kila na gone ni sa gauna me ra wasea kina na tamata yadua e dua na ka a lako vinaka ka dua na ka era a diva me vinaka cake baleta na siga o ya. Oqori e dau veimuataki ki na vakaraitaki ni vakavinavinaka, loloma, ena so na gauna na rarawa, ka vakavuqa na veivosaki katoa ena kosipeli ka a sega ni yaco kevaka e sega.

Veivosaki dua‑ki‑na‑dua: Au dau vakamareqeta na gauna ena veivula ena Sigatabu ni lolo meu dabe vata kei ira na luvequ yadudua, masulaki ira ena yacadra, raici ira ena matadra, ka tarogi ira ena taro eso. Au dau tovolea meu vakarorogo ka sema ki na veika era vakila kei na nodra gagadre eso. Ena rairai duatani beka vei ira ni a tekivu, ia oqo era sa calata kevaka keimami sega ni cakava. Au nuitaka ni ra na kila ni noqu gauna vata kei ira e bibi cake mai na veika tale eso kau vinakata meu veivosaki bibi vata kei ira ena veisiga.

Railesuvi ni takete: Keitou bulia na takete yadua, vakaveiwatini, kei na matavuvale ena Janueri yadua. Oti keitou qai dau veivosakitaka na neitou tubu kei na toso e veivula ena gauna ni vuli ivolanikalou se dua na lesoni ni lotu vakamatavuvale. Oqo e veimuataki ki na veitalanoa bibi.

Veitauriliga vakaveiwatini se itubutubu: Ena veibogi ni Sigatabu, ni keirau muria kei na watiqu na neirau ivola vakamacawa, keirau dau veitarogi talega na veika keirau vakila tiko kei na ka e dredre tiko se gadrevi kina na veivuke. Keirau dau veivosaki bibi baleta neirau vakawati kei ira yadua neirau gone kei na ka e gadrevi me caka me dabe dei kina na kosipeli i Jisu Karisito ena yaloi keimami yadua.

E dau vakarorogo vinaka cake na watiqu mai vei au ka vinaka cake sara ena nona vukea me keitou duri dodonu ka vakanamata ki na salatu ni veiyalayalati. Au vulica e levu na ka mai vua kau kalougata vakalevu sara ni a digitaki au o koya me baleta na tawamudu.

Na neitou matavuvale e sega ni taucoko sara ena kena vakayacori na veika kece oqo, ia keitou saga ena neitou igu vinaka duadua ka tovolea tikoga.

Vakavakarau ni se bera ni yaco mai na waicevatasisi

Kakua ni waraka me yaco mai na waicevatasisi ni bula ki na nomu vakamau, luvemu, se so tale na veimaliwai. E sega ni ka ni kevaka ia e ka ninaica. Na kosipeli kei na so tale na veivosaki bibi ena vakarautaki keda vakavinaka duadua kevaka era yaco nakiti ka vakawasoma.

Na neitou bula vata kei watiqu, luvequ, kei na matavuvale me tawamudu sa noqu lalawa cecere duadua kei na inaki ni veika kece au cakava, oka kina na veitalanoa bibi yadua.

Au dau lutu koso, me vakai keda kece, ia ena kaukauwa i Jisu Karisito kei na veivutuni, au sa laveti cake kina. Sa yalataka na iVakabula me vaqaqacotaki keda ena Nona kaukauwa kei na serau taucoko ni inuinui e solia vei keda o Koya mai na Nona Veisorovaki. E sega ni gadrevi meda uasivi sara, ia e gadrevi meda sasaga meda vinaka cake! Sa tu e matada yadua na kaukauwa oqori. O na sega ni druka. Na rawa-ka e dau tu sara ga na kena sasagataki.

Sa yalataka o Peresitedi Nelson “ni ko digitaka mo laiva me qaqa tikoga na Kalou ena nomu bula, o na sotava vakataki iko ni Kalou sa ‘Kalou ni cakamana‘ [Momani 9:11].”⁷ E rawa ni oka kina na qaqa ni Kalou ena noda veivosaki bibi. Sa rawa na ka kecega mai vua na noda iVakabula, o Jisu Karisito, oka kina na veivosaki bibi oqo. Na loloma sai koya na Nona isaunitaro!

Na dauvolaivola e vakaitikotiko mai Wasigitoni, Amerika.