Domodra na Yalododonu Edaidai

Cava na Vuna Au Sega ni Veivosoti Rawa Kina?

Mai vei Samuel Kuosmanen, North Ostrobothnia, Finiladi

Au masuta me na vukei au na Tamada Vakalomalagi meu ulabaleta na noqu yaloca ka veivosoti.

Droini mai vei Allen Garns

Au a duavata kei na vica tale na taciqu ena noqu tabanalevu me vukea e dua na marama me toki. Ia ni keitou yaco yani ki na nona vale, e dua na lori ka a kele cala tu ka tarova na neitou yaco ki na nona vale ena neitou lori.

Au qirita na naba ni talevoni ena yasa ni lori meu kerea me dua e lako mai ka tosoya na lori. A sauma mai e dua na turaga ka yalataka ni na yaco totolo mai.

Ni oti e 15 na miniti, au a qiri tale, ia a sega ni sauma. Ni oti e dua tale na qiri, a qai basika mai vata kei na rua na gone. A cudru sara o koya ka kaya e dua na ka e vakatubu rarawa vei au. Au tovolea meu guilecava ni keitou toki iyaya tiko.

Ena yakavi oya au a vakasamataka na veika au a sotava. Au masuta me na vukei au na Tamada Vakalomalagi meu guilecava na veika au a vakila ka vosota na tamata oya. A sauma na noqu masu.

Ni oti toka vakalailai, au a wilika tiko e dua na niusiveva ni vanua ka raica e dua na itukutuku me baleta na tamata oqo. E oka kina na kena itaba. A lesu tale mai na noqu yalo ca vua. Ia, au a baci lakova tale na ikalawa vata ga oya. Au a kerea vua na Turaga meu kakua ni kauwaitaka tiko na ka oqo ka me vukei au o Koya meu vosota na tamata oya. A yaco mai e dua na yalo vinaka.

E sega ni dede e a yaco meu sota kei na turaga vata ga oqo ena dua na sitoa. Sa lesu tale mai na noqu yalo ca. Au a kurabui dina. Au a taroga vua na Turaga na cava na vuna au a sega ni rawa kina ni guilecava na veika au sotava oqo. Ni oti e vica na siga, a vakavulici au o Koya ena dua na lesoni.

Au a draiva tani tiko mai na lomanibai ni Valetabu e Helsinki Finland ena gauna au raica kina na turaga vata ga oqo ni cakacaka tiko ena iteitei ni valetabu. Au sega ni vakabauta rawa na mataqu. E tadola na noqu vakasama kau qai kila ni okoya, me vakataki au, a veiqaravi tiko vua na Turaga ka ni o koya, me vakataki au, e tu nona siga ni rarawa ni cala na veika kece. Sa qai rawa vei au meu raici koya na turaga oqo me vaka na tuakaqu. Ena mata vou, au doka ka lomani koya. Ni oti oya, sa biubiu kece na veika au a vakila eliu, ka sega ni lesu mai.

Ni da raici ira na tani me vaka e raici keda na Turaga, e rawa ni da muria na Nona ivakaro me da veivosoti taucoko (raica na Maciu 6:14–15; Vunau kei na Veiyalayalati 64:9–10). Na ka sotavi oqo e dua na loloma veivueti daunanumi ka malumu ni Turaga, kau se vakasamataka tikoga e yaloqu.