“Kunea na iTuvatuva Vakalou ena Noda Matavuvale ‘Tawa-uasivi’ ,”Liaona, Janu. 2023.

iTabagone Qase Cake

Kunea na iTuvatuva Vakalou ena Noda Matavuvale “Tawa-uasivi”

Mai vei Jenet Erickson

Parofesa Veitokani, Tabacakacaka ni iTukutuku Makawa ni Lotu kei na iVunau, Brigham Young Univesiti

Ni sega ni noda na matavuvale “uasivi” ena bula oqo e rawa ni ka mosimosi, ia sa rawa meda vakayagataka na noda veika dina meda toro voleka kina vua na iVakabula.

e dua na marama itabagone qase cake ka vakasamataka tiko na matavuvale

E sega ni dua na ka e kauta mai na ibalebale, reki, gagano, kei na mosi me titobu cake mai na veiwekani e bibi duadua ki na veika eda sotava ena bula oqo—na noda veimaliwai vakamatavuvale. Ia baleta ni bibi sara na veimaliwai oqo, era a vakauqeti kina na noda iliuliu ni Lotu me ra bulia “Na Matavuvale: Ai Vakaro ki Vuravura Raraba.”¹ Na kena dina e vakadinadinataka e dua na Tamada dauloloma ka gadreva me da kila na ivakarau vakalou e mua ki na marau tawamudu ena bula ni matavuvale.

E vakavulica o Peresitedi Henry B. Eyring, iKarua ni Daunivakasala ena Mataveiliutaki Taumada: “Baleta ni lomani ira na luvena na Tamada, ena sega kina ni laivi keda o koya meda vakilakila na veika bibi ena bula oqo me baleta na vanua ni da kauwaitaka e rawa ni kau mai kina na marau se na noda sega ni kauwaitaka ena kauta mai na rarawa.”² Oqo e oka kina na vuqa ni itavi tabu vakamatavuvale e rawa ni noda ena bula oqo: luvena yalewa se tagane, ganeda se tacida, tina se tama, nei se momo, bubu se tukada.

Na dina ena ivakaro ni matavuvale e vakararamataka na sala ki na ”tawamudu uasivi” ka vuqa vei keda eda gadreva vakatitobu—na veimaliwai ni matavuvale tawamudu kaukauwa ka marautaki. Na leqa ni da bula tiko ena ”bula dina.” Ia na galala e tadrua ni ”dina” kei na ”uasivi” e rawa ni mosimosi. Ena so na gauna, eda sega ni raica ni rarama me dusimaki keda, e rawa sara mada ga ni da vakila na ivakaro ni matavuvale me ivakananumi mosimosi ni vanua eda ”guce” kina ena sotavi ni ”uasivi.”

Eda na tagica beka na vakawati ia eda sega ni raica ni dua na ka e rawa ni yaco.
Eda sa rairai vakamau beka ka sotava e dua na veisere veivakarusai.
Eda tagica beka na vagone eda sega ni rawa ni vakaluveni.
Eda sa rairai sotava beka na veivakatotogani ena veimaliwai vakamatavuvale eda vakabauta.
Eda sa sotava beka eso na mosi kilaitani baleta na nodra digidigi eso na lewe ni matavuvale daulomani.
Eda na rairai vakila na tawase se cava sara na noda sasaga vinaka duadua meda kauta mai na duavata vei ira na noda daulomani.
Eda na rairai vakila sara na raivakaca mai na tagi sega ni galele sega ni vakacegui kei na yalayala eso.

E ka dina, ni da na kila kece na bolebole eso, mosi, kei na rarawa ena bula vakamatavuvale—eso e levu cake mai vei ira tale eso. Ena dua na itagede, eda na lutu kece ena taudaku ni ivakarau uasivi e tuvai koto ena ivakaro ni matavuvale.

Na ka eda na sega beka ni kila ni sa tiko na inaki vakalou ena ituvakidina oya.

Vakasaqara ka Soli Iko vua na iVakabula

Me vaka niu dua na marama sega ni vakawati ka tagica tu na vakawati kei na vakaluveni ena vuqa na yabaki, au a gadreva ka vakabauta ni dua na inaki bibi ni noqu bula o ya meu rawata na veika uasivi ni bula ni matavuvale sa tuvai koto ena ivakaro ni matavuvale. Ia se cava sara na noqu sasaga ena yalodina, au sega ni rawa ni cakava me yaco me vaka au vakabauta ni dodonu me vakakina. Sa ka mosimosi na sasaga oqori.

Ena gauna o ya, au a sega ni raica rawa na cakacaka mana a vakayacora tiko na Turaga ki yaloqu ena sasaga bula o ya.

Niu railesu, na noqu gagadre sega ni yaco a vakaitavi tabu ena kena vagolei na yaloqu vua na noqu Dauveivueti meu vakasaqara na vakacegu kei na dusimaki ka rawa ni vakarautaka duadua ga o Koya ka vakatitobutaka na noqu vakararavi ki na Nona loloma uasivi kei na mana veivakaukauwataki. Na masumasu e veisiga kei na vulici ni ivolanikalou, vakabibi na vosa ni koniferedi raraba, sa yaco me bula ni inuinui kei na veidusimaki. Au a vakauqeti meu goleva na vosa ni noqu veivakalougatataki vakapeteriaki—kei na veivakalougatataki vakamatabete tale eso—meu kunea na loloma kei na veidusimaki ka a noqu sara ga mai vua na Tamaqu Tawamudu.

Niu sovaraka yani na yaloqu vua na Turaga, ena gauna mada ga au temaki kina meu vuki tani ena yalorarawa, e votu mai noqu vakasama kei na yaloqu na veivakauqeti tabu ka vakadeitaka vei au ni kila o Koya na vanua au tiko kina, ni sa tiko e dua na ituvatuva totoka ni noqu bula, ka rawa niu nuitaki Koya. Sa yaco na kequ isema vakaveiyalayalati³ vua na noqu Dauveivueti me idewadewa ni vakacegu kei na reki e uasivia na ivurevure tale eso ni veivakacegui se marau.

Au sa raica rawa ni dina ga niu sa vakabauta na inaki ni noqu bula o ya meu rawata na noqu tatadra me baleta na matavuvale uasivi, sa vakayacora tiko na Turaga na veika e tukuna o Elder Jeffrey R. Holland ena Kuoramu ni iApositolo Le Tinikarua me inaki bibi ni bula oqo. Ni cavuta na vosa nei Tui Penijamini, a vakamacalataka, “De rairai na inaki bibi o ya meda ‘tamata yalododonu ena vuku ni isoro i Karisito na Turaga,’ ka na gadrevi kina meda ‘vaka na gonelailai, talairawarawa, yalomalua, yalomalumalumu, dauvosota, dauloloma, ka talairawarawa ki na veika kece e raica na Turaga ni yaga me yaco vua me vaka na gone sa talairawarawa vua na tamana.’”⁴

Na noqu gadreva na veivuke kei na kaukauwa ni iVakabula a vakavuna meu vakasaqara ka vakila na Yalona ni talairawarawa, yalomalua, yalomalumalumu, vosota vakadede, kei na loloma. Ena ikalawa oqori au veisautaki kina ena Nona kaukauwa veivukei. Ia na ka dina, oya na ka au vinakata sara vakabibi. Na ka a vaka me sa “sega ni vinaka” sa vakarautaka na sala ki na “uasivi duadua.”

Na noqu itokani ka keirau cakacaka vata o Ty Mansfield e vakamacalataka e dua na dina vakaoqo. Ni dua na turaga ka veivinakati vaka tolo vata, a vakadinadinataka o Ty na tubu vakayalo e rawa ni yaco ni da vakadeitaka na noda bula vei Jisu Karisito ka sorovaka yalorawarawa na yaloda taucoko ki Vua, ka vakatara Vua me cabora na noda dredre kece me vu ni noda tubu. Vei Ty, a tekivu oya ena nona vakavulici koya na Yalotabu “ni kevaka au na mani qai vakawati, au sa lomani ka ciqomi tawayalani mai vua na Kalou. Sa noqu itavi meu na bula tikoga dua na siga ena dua na gauna niu vakasaqara ka muria tiko na veidusimaki ni Yalotabu.”⁵ Kena itinitini, na vakararavi vua na Kalou a vakavuna me curuma o Ty e dua na bula vakawati rekitaki, totoka, ka tawamudu vei watina.

Tarai cake e dua na Veiwekani Titobu Cake kei na iVakabula

Au sa qai laki vakamau talega ni oti noqu veinanuyaka tiko se na rawa beka vei au. Ia na gadrevi meu kelei vakatitobu vei Jisu Karisito a tomani ga, kevaka e sega ni vakalevutaki cake, ena veiyabaki mai na gauna au a vauci kina vei watiqu. Au sa tekivu tale meu vakasaqarai Koya meu kune vakacegu niu kunedredre kei na itutu yava. Au sega ni kila meu na rawata vakacava na reki au a nuitaka tiko ena bula ni matavuvale ke sega na luvequ. Ia ni oti mada ga na neirau vakalougatataki kei watiqu ena rua na luvei keirau, au dau raimatua tu ga ki na noqu malumalumu vakatina. E dina ga ni sa tu vei au na ka au dau vinakata tu, ena so na sala e vaka me sa tubu tiko ga na lala ena tadrua ni “uasivi” kei na “kadina”.

Na veituvaki vakaoqo e sureti au meu nanuma lesu na inaki ni bula vakayago kei na iwalewale lesi vakalou eda tubu mai kina. E rairai na inaki ni bula e sega ni o koya me da rawata na matavuvale uasivi duadua. Ena rairai sega beka ni tiko na uasivi sara ena bula oqo. E rairai ga ni matavuvale, e sa dua na madigi ni toso ki liu.

Na dina, e rairai ni buladina ka vakilai na kena mosimosi “ni sega ni yacova na uasivi” e vakayacora sara ga na inaki tabu ka sureta na tubu eda gadreva me da bulataka kina na veiwekani “uasivi.” E rairai na kaukauwa e koto ena kadina ni lala levu ena tadrua ni buladina kei na uasivi e sureti keda tiko ki na veimaliwai titobu sara kei Jisu Karisito na vanua e vueta kina o Koya ka vakasavasavataka na veika e vaka me ramusu, tara cake na vuku, kaukauwa, kei na loloma ni da kalawa tiko. E veivakurabuitaki, mai na Nona loloma soliwale kei na veivueti, ka Nona duadua, me rawa ni da yaco kina me mataqali tamata ena veimataqali veimaliwai eda segata me noda mai lomalagi.

Au sa mai vakabauta ni “vinaka sara” e sega ni rawa ni caka ena veimaliwai vakamatavuvale, vua e dua—ena bula mada oqo. Ia na lomadina, dina e loma, kei na veivolekati dinataki e rawa. Na dina, ni da vakalecalecava se namaka na vinaka sara ena vakataotaka na voleka dinataki vua na Kalou, noda matavuvale, kei ira na tani. E yasa kadua, ni da vakatara me raici keda ko Karisito ena keda ituvaki dina, noda matavuvale, kei ira na tani, oka kina na veika kece e “lailai mai na uasivi,” sa rawa ni da sureta na Nona kaukauwa veivakatabui ki na noda bula. E rawa ni da sotava na Nona kaukauwa cakamana me vakavinakataka na veika sega ni wali rawa, vakasinaiti keda ena Nona loloma, ka veisautaki keda ki na ibulibuli e titobu cake na noda veimaliwai kei Koya kei ira na noda daulomani.

E rairai ni inaki bibi duadua ni ivakaro raraba ni matavuvale oya me dei kina vei keda ni ena vuku i Jisu Karisito, na matavuvale “uasivi” sa rawa ni icavacava tawamudu vei keda yadudua.

Ni da luvena tagane kei na yalewa daulomani na itubutubu vakalomalagi, eda sa lewe taucoko ni dua na matavuvale tawamudu. Na veika duatani eda sotava ena bula oqo e dua na tiki bibi ni nona ituvatuva na Tamada me vukei keda meda toso ki liu ka “kila kina [na noda] icavacava vakalou me da taukena na bula tawamudu”⁶—na bula totoka vata ga a sotava o Koya, se cava ga na duidui mai na uasivi eda sotava vakamatavuvale ena gauna oqo. Me vaka e vakatavulica o Elder D. Todd Christofferson ena Kuoramu ni iApositolo Le Tinikarua: “Ena nuidei eda vakadinadinataka ni Veisorovaki i Jisu Karisito e tavaka ka, ena ivakataotioti, ena sauma lesu na veika taucoko era a vakuwai kina ka yali vei ira ka gole ki Vua. E sega ni navuci taumada kivua e dua me rawata ga vakalailai mai na veika e tiko taucoko vua na Tamada me baleti ira na Luvena.”⁷

Me vaka ga a yalataka na Turaga vei Jekope ena loma ni bolebole ni nona matavuvale “lailai mai na uasivi”, na Nona veiwekani ni veiyalayalati kei keda e vakadeitaka vei keda, “Au na tiko vata kei iko, ka maroroi iko ena veivanua kecega ko lako kina, ka kauti iko tale ki na [itikotiko]; niu na sega ni biuti iko, me yacova niu sa cakava na ka au sa vosataka vei iko” (Na iVakatekivu 28:15). Ni da muri Koya, veitalia na irairai ni noda vei buladina tawauasivi ena sega ni “laivi keda,” o Koya me yacova ni da sa yaco me ka kecega eda gadreva, ka vauci ena isema vakamatavuvale ni reki cecere tawamudu.