Ni Sa Dau Yaco Mai na Tauvimate Veitaravi

Mai vei Norman C. Hill

Na sotavi ni dredre ni veisiga e rawa ni vukei keda meda tubu ena yalololoma, kilakila, kei na sorodredre.

na ligai dua na tamata e taura tiko na ligana e dua tale

Ni bera ni mate ena tauvimate vunimalumu, e dau matadredredre o tinaqu ka kaya, “E sega ni dua vei keda e dro bula mai eke, o koya meda cakava sara na kena levu e tu vei keda.”

O ya ena nona veisiga vinaka. Ia ena nona bula, a levu na nona veisiga vinaka.

Ia e tu talega vua na veisiga e sega soti ni malaude. Ena veisiga oqori ena kaya o koya, “Taura na ka e yaco mai vei iko ka raica ke rawa tikoga ni o cakava eso na ka vinaka e vuravura.”

E vuravura, era bula balavu cake sara na tamata mai na veigauna sa oti.¹ Ia e dina ni da sa bula balavu tiko, eda na rawa talega ni da tauvimate veitaravi: matenisuka, na Parkinson, kenisa, lomabibi, Alzheimer, ka toso tiko na lisi. Ia, ena gauna e yaco mai kina vei iko na mate veitaravi, mo na sotava vakacava?

Cavuikalawa ena Vakabauta

“Sotava na ivakatagi, ke sega ni rawa mada ni o ni qirita na rorogo,” e kaya e dua na turaga e a voraki me cegu ka lesu o watina me cakacaka me tokona na nodrau matavuvale. E vakabauta o koya ni vakavuqa ni da dau daramaka na mata mamarau ka tarova noda dikeva na lomada se vakavinakataka na noda rai. “Ni da sega ni toso ki liu ena vakabauta, eda tu vakadua ni da waraka e dua na cakamana se vakudrukudru ni dua e sega ni lako mai,” e kaya o koya. E walia o koya ni vakarorogo ki na ivolanikalou kei na vosa ni koniferedi raraba ka veisiko vei ira na itokani kei na matavuvale ena talevoni.

“Na tautauvata ni veisiga yadua e rawa ni kauti au sobu,” e kaya e dua na marama ka tauvimate veitaravi o watina. “Ena sega ni vinaka cake na bula nei watiqu. Au sa ciqoma oya. Ia na yara ni bulatuvai kece sara, na itavi ni bula e vu ni wawale ni vakasama, ni yago, kei na yalo.” E dau taleitaka o koya na veisiko mai vei ira na marama dauveiqaravi. “Ni ra sa yaco mai e serauna vakaidina na noqu siga.”

“Ena so na gauna, keirau dau guiguileca vakaveiwatini ka veicudruvi,” e kaya e dua tale na turaga qase. “Keirau dau tuburirarawa ni yaco na guiguileca, ka veivutuni dina emuri ena vosa ni cudru keirau dui cavuta.” Erau sa vulica me rau dau volavola me vukea me rau dau nanuma. Erau veivakatarai vakai rau me dau taura na gauna me ruru sobu ni bera ni rau vosa. “Ia,” e kaya o koya, “keirau sa vulica vakalevu cake na bibi ni kena tukuni, ‘Vinaka vakalevu,’ kei na ‘Au lomani iko.’”

E dua tale na veiwatini qase e rau bula tiko ena dua na ilavo tudei me yacova ni sa vakaruataki na medrau isau ni wainimate. E vakavinavinakataki na lewe ni matavuvale kei na nodrau tabanalevu, a sotavi na nodrau gagadre. “Taumada keirau a madua ni kere veivuke, vakabibi mai vei iratou na luvei keirau,” a kaya o baraca. “Ia era sa maqusa kece na tamata mera veivuke.”

Matailalai mai na A Vakabula o Koya e Vuqa mai na Veimataqali Mate, mai vei J. Kirk Richards, me kakua ni lavetaki

Vakatutu kei na Vakadidike

Oqo eso na vakatutu kei na vakadidike mai vei ira era sotava tiko na tauvimate veitaravi:

O ira era gole vua na iVakabula era na kunea na inuinui. “Au nanuma ni sega ni dua e rawa ni kila na veika au sa lako curuma tiko,” e kaya e dua na turaga tauvi mate ni wawale wasoma, (chronic fatique syndrome [CFS]). “E qai yaco ena dua na Sigatabu niu votai tiko ena sakaramede, au qai kila ni kilamatata na iVakabula na noqu rarawa. Au kila niu rawa ni vosota ena noqu toro voleka yani Vua.” (Raica na Alama 7:11–12; Vunau kei na Veiyalayalati 121:8; 122:8.)
Ena levu cake na yalololoma vei ira era “vosota vakavinaka” (Vunau kei na Veiyalayalati 121:8). “O cei eda dau rai kina, ena gauna ni rarawa kei na tavuki ni vanua, me da vukei ka vakacegui? Era turaga kei na marama era sa sotava na dredre, ia mai na veika era sotava ena nodra vakararawataki, era kauta mai na iyau ni nodra daulomani kei na lolosi me veivakalougatataki vei ira era gadreva tu ena gauna oqo. E rawa beka ni ra cakava oqo ke ra a sega ni vakararawataki vakaira?”²
Taura yadudua na veisiga. “Ena vica na yabaki sa oti, sa rui bibi sara na mosi au sega ni raica rawa na sala meu vosota rawa tiko kina. Au sa tekivu vakila na via kunati au,” e kaya e dua na marama ni voraki tiko mai na dua na malumalumu ni ua, (multiple sclerosis [MS]). A curu vakai koya ki na tabana ni bula ni vakasama ena dua na valenibula. Ena gauna ni veivakasalataki, a yaco me sega walega ni “vosota me yacova na ivakataotioti” (1 Nifai 22:31) ia me “vosota me yacova ni sa cava na siga.”
Taracake na veika talei vovou ka vaqara na sala vovou mo veiqaravi kina. Mo kakua ni yalorarawa ena veika o sega ni cakava rawa, mo kunea na katalei vovou. A raica e dua na sisita malumu ni ua ni sega ni rawa ni cakava na veika a taleitaka e liu, me vaka na vodo ose se ravupolo. Ia, a vulica o koya na volavosa. Ena gauna oqo sa taurivaka o koya na taledi taracake vou me bulia kina na veivola serau ni iVola i Momani me baleta na nona matavuvale.

Ni yaco na tauvimate vaitaravi me ka dina ni bula, sa dua dina na bolebole. Ia ena vakabauta, na vakanuinui vei Karisito, kei na gagadre me da tomana tiko na veiqaravi, na sotavi ni dredre ena veisiga e rawa ni vukei keda me da tubu cake ena yalololoma, veikauwaitaki, kei na yavavala.

E vakaitikotiko na dauvolaivola e Utah, Amerika.