2023
Na Matavuvale kei na Rarama kei Vuravura.
Janueri 2023

“Na Matavuvale kei na Rarama kei Vuravura,” Liahona, Janu. 2023.

Nodra na iTubutubu

Na Matavuvale kei na Rarama kei Vuravura.

soqoni vata ni matavuvale ka matadredredre

Kemuni na iTubutubu Lomani,

Na matavuvale e tiki bibi ni nona ituvatuva ni marau na Tamada Vakalomalagi me baleti ira na Luvena. Na itukutuku e tiko ena ilavelave ni vula oqo ena rawa ni vukei iko mo vakavinakataka na veivosaki ena loma ni matavuvale ka vukea na kena sokoti na bolebole ena veimaliwai vakamatavuvale. E rawa talega ni o vakayagataka na ilavelave oqo me vukei iko mo vakavulica vei ira na gone eso na lesoni bibi mai na Veiyalayalati Vou.

Veivosakitaki ni Kosipeli

O Jisu Karisito Na Noda Rarama Dina

Wasea kei na nomu matavuvale eso na ivakavuvuli mai na itukutuku nei Peresitedi Ballard ena tabana e 4 me baleta na itavi i Jisu Karisito me Rarama kei Vuravura. Vakamatavuvale, cakava e dua na lisi ni veivurevure duidui ni rarama ena nomudou vale ka veivosakitaka na veika duidui e dau cakava vei keda na rarama. Ena sala cava e vukei keda kina o Jisu Karisito, me vaka ni ivurevure cecere duadua ni rarama vakayalo?

Dolava na Veitaratara ena Matavuvale

Sa ka bibi me da vakavakarau vakayalo ki na veibolebole ni bula. Ena tabana e 12, wilika eso na ivakasala mai vua e dua na daunivakasala ni ituvaki ni bula ni vakasama ena ivakarau me tiko kina e dua na veivosaki bibi, vaqaqacotaki ni veivosaki vata kei ira na luvemu. Na vakanananu kei na vakatutu cava soti oqo o rawa ni vakayacora kei na nomu matavuvale?

Vakarautaki ni Yaloda ki na Vosa

Wilika na itukutuku nei Brother Camargo ena tabana e 38 me baleta na italanoa vakaibalebale ni daukakaburaki. Veivosakitaka vata kei na nomu matavuvale na cava e vakatakarakarataki ena veimataqali qele ena vosa vakatautauvata. Sa rawa mera droinitaka na gone lalai na iyaya eso mai na vosa vakatautauvata ka veivosakitaki ira, ka rawa vei ira na gone qase cake mera wilika na italanoa vakaibalebale ena Marika 4:3–20 ka wasea na nodra nanuma se taro.

Lako Mai, Mo Muri Au Lasa Vakamatavuvale

Cakava na Veika Dredre ena Veivuke ni Kalou

Me vakataki Meri kei na tavalena o Ilisapeci ena Veiyalayalati Vou (raica na Luke 1:5–55), ena so na gauna eda na kerei meda cakava na veika dredre ka rawa ni da vakataroga kevaka e rawa.

  1. Biuta e dua na koniteina lala, me vaka e dua na vokete se dua na kateni, ena dua na mua ni rumu.

  2. Solia ki na lewe ni matavuvale yadua e dua na vutika.

  3. Me tekivu ena mua ni rumu veibasai mai na koniteina, mera qai saga na lewe ni matavuvale yadua me ra kauta na vuti ni manumanu ki na loma ni koniteina ena nodra uvuca tiko me takosova na rumu.

  4. Me rawa ni veibolei vakalevu cake, vakatara ga e 30 na sekodi, ka vakayagataka e dua na iuvuuvu me uvuca na vutika. Tomana tiko me vakalutuma na gauna taurivaki me yacova ni sa dredre sara na itaviqaravi.

Veivosaki: Ni nanumi tiko ni so na bolebole ena sega beka ni wali ena bula oqo, wasea e dua na ka a vaqaqacotaka na nomu ivakadinadina ni “veika e sega ni rawa vua na tamata e rawa vua na Kalou” (Luke 18:27) Na ikalawa lalai cava soti e rawa ni o taura e veisiga mo rawata kina na cakacaka eso ena nomu bula ka kena irairai ni na sega ni rawa?