“Ko a Tiko mai Vei?,” Liaona, Janu. 2023.
Domodra na Yalododonu Edaidai
Ko a Tiko mai Vei?
Au sa na ciqoma na gauna kei na inaki ni Kalou niu vulica meu lomana na buqu me vaka ni rau lomani koya na Tamada Vakalomalagi kei Jisu Karisito.
Dina ga ni a tauvimate o Bubu, na veika kece e cakava vei au oya baleta ni lomani au.
iTaba lolomataki mai vei dauvolaivola
“Ko a tiko mai vei, na luvequ?” a taroga o buqu ni sauma mai na noqu tukituki ena nona katuba. Au se qai lesu ga mai ena kaulotu tudei ki El Salvador. A tonawanawa na matai Bubu ena reki ni raici au tale. E malumu ka katakata na ligana ni ovica wavoki ki domoqu.
Keirau a veivosaki ena veilasamaki niu sauma na nona taro me baleta na noqu kaulotu. A yaco meu luvuci niu tukuna vua me baleti ira na tamata, kakana, cakacaka vakaukauwa, kei na cakamana ni noqu kaulotu. Niu sa oti, a mai vakanomodi vakasauri o koya. A qai taroga o koya, “Ko a tiko mai vei, na luvequ?”
E matata, ni a sega ni vakarorogo tiko. Io, keirau sa mani tekivu veivosaki tale. Ni oti toka ga e 20 na miniti, a taroga tale ena ikatolu ni gauna, “Ko a tiko mai vei, na luvequ?”
E dua na ka e sa cala. Au qai kila sara ni oti toka ga e dua na yabaki na noqu laki kaulotu, sa kunei vakavuniwai vei buqu na mate nei Alzheimer.
Au vakila na gagadre levu meu vukei Bubu. Ena rua na yabaki, au a vunautaka na loloma ni Kalou vei ira na Luvena. Ia oqo sa noqu na madigi meu bulataka na ivakavuvuli oqori. E dina niu kila ni na dredre, au a via toki mai vei koya me rawa niu vukei koya.
Na imatai ni vica na vula a dredre duadua. Me vaka ena buturara ni kaulotu, ni sa yaco me dua na cakacaka tudei na vosota kei na tarovi ni rarawa. Ia me vaka ena kaulotu, au sa ciqoma na gauna kei na inaki ni Kalou niu vulica meu lomana na buqu me vaka ni rau lomani koya na Tamada Vakalomalagi kei Jisu Karisito.
Na bula vata kei Bubu e dau vaka na bula vata kei na tolu na tamata duidui. Ena so na gauna e sega ni dau vinakata me dua tale e tiko e vale. Ena so na gauna e vinakata na noqu veiqaravi kei na kauwai, ka marau ni sega ni tiko duadua. Ena so na gauna na ka ga e rawa ni vakasamataka sai koya me vakania na makubuna tagane se qai lesu ga mai ena kaulotu. “Kakua ni cakava oya!” ena rawa ni yaco totolo me “Vakacava mo cakava na ka o ya?”
Na buqu, io. sa dua na veivakalougatataki cecere vei au. Au kila ni veitalia mada na nona tauvimate, na veika kece e cakava vei au e baleta ni lomani au.
Na nona vosa kamica ka malumu na buqu e dau yaco mai ena veigauna kece au lesu kina i vale mai koronivuli se cakacaka. Ena rai malumu, e mokoti au, reguca na baluqu, ka taroga ena loloma, “Ko a tiko mai vei, na luvequ?”