Na Vosa ni Yalotabu

Mai vei Alison Wood, Mekasini ni Lotu

Au vulica ni rawa ni vukei keda na Yalo me da vakadewataka na loloma ni Tamada Vakalomalagi, kevaka sara mada ga eda vakila ni da sega ni veiganiti.

Au dau gade ena vulai katakata e Iurope kei na dua na timi ni danisi. Era duidui na dausarasara, vakatasuasua, kei na kaukauwa, ia e dua ga na itovonivuli e dau tautauvata: keimami dau sogosogo ena lagati ni “Me sa Tikoga kei Kemuni”¹ ena vosa ni vanua keimami sikova tiko. Baleta ni vuqa na noqu timi ni danisi era lewena Na Lotu i Jisu Karisito ni Yalododonu Edaidai, keimami taleitaka na ivakarau oqo. Sa dua na sala totoka meda sema vei ira na noda dausarasara ka wasea na loloma ni Tamada Vakalomalagi.

Ni voleka ni oti e dua vei ira na ilakolako oqo, keimami se qai kosova ga na iyalayala ki Jamani ka vakatovotovotaka tiko na sere ena vosa vaka Jamani me baleta na veivakalasai e muri. Ia ni keimami yaco yani, keimami qai kila ni yasayasa vakatabakidua oqo e Jamani e vosa vaka-Sorbia, e dua na vosa ka sega ni veivolekati sara kei na vosa keimami sa vulica tiko yani kina vagumatua na sere.

Ena vodo basi ki na neimami vakalasalasa, au sa oca dina kau sa vinakata ga meu moce ena gauna taucoko keimami lako tiko kina. Ia e dua tani na nodra vakasama na neitou dairekita. Era a kerea na neimami dauveituberi me ra vakadewataka na serenilotu ki na vosa vaka-Sorbia. Oqo era sa gadrevi ira na lewe ni basi dauvakalasalasa mata mocemoce me ra vulica na sere ni vo ga e vica na auwa mai na neimami vakalasalasa.

Keimami cakava na neimami vinaka taucoko. Ni sa oti na vakatasuasua, keimami a tucake vata e mata ni tavata ka tekivu lagasere. Au nanuma lesu na noqu kurabui ena vosa tawakilai au a veimamayaka ena vica na auwa sa oti ni lutu rawarawa mai. Au a vakila na noqu vakatitiqa taumada me baleta na neimami tu vakarau ni seyavu yani niu vakararavi vua na Yalotabu me vakananuma vei au na vosa.

danisi na veiwatini — Ni oti na neimami danisi ka tekivu lagasere, a kauta mai ki na noqu vakasama na Yalotabu na qaqa ni sere.

Era kurabui na dausarasara ka ra matalau. Ni sa oti na sere, a lutu e dua na vagagalu vei ira na sarasara. Era qai tucake ka tekivu lagata lesu mai vei keimami e dua na sere, ka ra qai vakamacalataka e muri ni dua na sere ni vakavinavinaka era dau maroroya me baleta na veigauna digitaki.

Au vakila vakaukauwa sara na Yalo ena gauna o ya, dina ga niu sega ni kila na ka era lagata tiko. Au vakavinavinaka vakalevu ni vukei au na Turaga meu tukuna na Nona loloma dina ga niu vakila niu tawayaga. Au vakananumi ni loloma ni Tamada Vakalomalagi e itukutuku raraba. Se cava ga na duidui e tu vei keda, oi keda kece eda rawa ni kila na vosa ni Yalotabu.