Domodra na Yalododonu Edaidai

Tiko e Kea ena vukuna na Nomu Gonetagane

Mai vei Ross J. Davidson Jr., Texas, Amerika

Ni oti na nona vosa vei tamaqu na Yalo ena gauna ni noqu tabaki ki na matabete, a veisautaka na nona bula.

Va na iTabatamata, mai vei Kwani Povi Winder

Au a bulabula mai ena Lotu ena gauna a kauti keirau kina kei na taciqu o noqu Momo Bill ki na Lalai. Na noqu qasenivuli ni Lalai, o Jean Richardson, e dua na iyaloyalo ni tina yalovinaka. Au taleitaki koya kei ira na noqu itokani vou ni Lotu, ka ra yalovinaka cake vei au mai vei ira na gone ena noqu itikotiko. Au sa mani nanuma meu lotu tiko ga.

Niu volekata yani na ika12 ni noqu siganisucu, a sureti au o Bisopi Dal Guymon meu ciqoma na Matabete i Eroni ka tabaki meu dikoni. Au sega ni kila na ibalebale ni ka o ya, ia au a kaya io. A qai kaya okoya, “O rawa ni kerei tamamu me kauti iko mai na Sigatabu mai oqo, ka keitou na tabaki iko.”

O Ta kei iratou na nona matavuvale eratou sa sega ni dau lako i lotu ni se qai yabaki 13. Ni sa uabula, a lako ena vei muanimacawa ki na vanua ni gunu se laki siwa. A veiqaravi okoya ena Mataivalu e wai ena iKarua ni iValu levu kei na iValu mai Korea. A vaka sika, gunu, ka vosavosaca, ia e kena irogorogo ena neitou tauni lailai mai Montana me dau dina ka dodonu.

Ni kauti au o Ta ki lotu ena Sigatabu ka tarava, e a dua dina na ka levu. Ni sa yaco mai na gauna, a kacivi au mai o Bisopi Guymon ka kerei au meu dabe ena idabedabe. E vica na turaga—ia e sega kina o tamaqu—a tabaka na buradelaqu ka vakayacora na cakacaka vakalotu.

Au vakila na bibi ni vica na liga lelevu vei au. O Ta, ni dabe toka ena dua na idabedabe yawa, a vakila e dua tale na mataqali bibi—e lomaserena. A vosa vua e dua na domo, ka kaya, “O gadreva mo tiko ekea ena vukuna na nomu gonetagane ena gauna e tarava.”

Ena veimacawa ka tarava, a vukica na nona bula o Ta ka tekivu me laki lotu ena vei-Sigatabu. Sega ni dede, sa yaco na Lotu me itakele ni neitou bula vakamatavuvale.

Sa yaco o Ta me noqu dauvakasala ni kuoramu ni dikoni, ivakavuvuli, kei na bete; noqu qasenivuli ni Matawilivola ni Sigatabu; kei na noqu dauveivakatavulici ni basketbol, ravupolo, viripolo kei na volibol. Ni keirau itokani ni veituberi vakamatavuvale, a vukei ira tale eso na tagane kei na matavuvale o Ta me ra lesu tale mai ki Lotu.

Niu vukei mai vei tamaqu, au sotava kina na noqu saumaki vou vakai au ka veisau. Mai na gauna oya, au saga meu kauwaitaki ira na turaga, era, vakataki tamaqu, e rawa ni ra vakaio ki na dua na veisureti me ra yaco me tama vinaka duadua e rawa ni ra yacova.

Au na dau vakavinavinakataka tu ga na ka a cakava o noqu Momo Bill, e dua na qasenivuli yalovinaka ni Lalai, dua na bisopi vuku, kei na tamaqu ena vukuqu ena 60 na yabaki sa oti.