Sa Tawamudu na Matavuvale

Na matavuvale sa isoqosoqo taumada ni itikotiko raraba. Era vakabauta na Lewe ni Lotu i Jisu Karisito ni Yalododonu Edaidai ni rawa ni tawamudu na matavuvale. Eda cakacaka me vaqaqacotaki na noda matavuvale e vuravura. Eda vakabauta talega ni rawa ni da ciqoma na veivakalougatataki ni dua na matavuvale tawamudu.

Na Matavuvale ni Kalou

Na tamata kece era luvena tagane se yalewa vakayalo na itubutubu vakalomalagi. Eda tiki kecega ni matavuvale ni Kalou. Eda sa taukena taucoko e dua na ituvaki vakalou kei na icavacava. Kevaka eda bula dodonu, e rawa ni da lesu ka laki bula vata kei na Tamada Vakalomalagi me tiki ni Nona matavuvale me tawamudu.

Itaba ni vakawati mai vei Joseph Kaluba

Matavuvale Tawamudu

Ni rau sa vakamau e dua na tagane kei na dua na yalewa ena valetabu ka maroroya na nodrau veiyalayalati, ena tawamudu na nodrau vakamau. Na cakacaka vakalotu ni valetabu oqo e vakatokai me veivauci. O ira na gone era sucu ni oti na nodra vauci na nodra itubutubu era sa sucu ena veiyalayalati oya. O ira na gone era sucu ni bera ni ra vauci na nodra itubutubu e rawa ni ra vauci vei ira ena valetabu me rawa ni ra dua na matavuvale tawamudu. Era dau cakava na lewe ni Lotu na tuva kawa kei na cakacaka ni valetabu me rawa ni ra vauci ira vata na nodra matavuvale ena veitabatamata kecega. Na veivakalougatataki ni dua na matavuvale tawamudu e rawa ena vuku i Jisu Karisito kei na Nona Veisorovaki.

Vakamau

Na nodrau vakamau e dua na tagane kei na dua na yalewa sa ilesilesi ni Kalou. Na kosipeli i Jisu Karisito e vakatavulici ira na veiwatini me ra dau veidokai vakai ira ka yalodina ena nodra veiyalayalati ni vakamau. E dodonu me ra dau dina ena vakasama, vosa, kei na ivalavala. Na vakamau e dua na veitokani tautauvata, ka dodonu me ra veivakayaloqaqataki, veivakacegui, ka veivukei vakai ira na veiwatini.

iTubutubu kei na Gonelalai

Sa vakaroti Atama kei Ivi na Kalou me rau vakaluveni. Era sa vakavulica na iliuliu ni Lotu ni se dei tikoga na ivunau oqo. Era cakacaka vata na tina kei na tama me susugi ira cake na luvedra ena loloma kei na buladodonu (raica na Vunau kei na Veiyalayalati 68:25–28). Era vakavulici na gone mera rokova ka talairawarawa vei ira na nodra itubutubu (raica na Lako Yani 20:12).

Veivakavulici kei na Vuli

Era vakavulici ira na luvedra na itubutubu me ra lomana na Kalou ka talairawarawa ki na Nona ivunau. Na bula vakamatavuvale e solia vei keda na madigi me da vakila na reki ka vulica na vosota kei na sega ni nanumi koya ga. Na ivakarau oqo ena vukei keda meda vakataka cake na Kalou ka vakarautaki keda meda bula marau vakamatavuvale me tawamudu.

Vaqaqacotaki ni Matavuvale

E taura na cakacaka, gugumatua, kei na vosota me tarai cake kina e dua na matavuvale qaqa. Na ivakavuvuli ni kosipeli me vaka na vakabauta, masu, veivosoti, loloma, cakacaka, kei na marau e taucoko ena rawa ni vukei keda meda kune reki ena bula vakamatavuvale. E rawa talega ni da ciqoma na ivakatakila me da kila na sala me vaqaqacotaki kina na noda matavuvale.

Na iRairai kei Karisito, mai vei Heinrich Hofmann

Sa Vakarautaki Tu na Veivakalougatataki Vei Keda Kece Sara

E sega ni o keda kece e rawa ni tiki ni dua na matavuvale uasivi ena vuravura oqo. Ia sa yalataka na Kalou ni o ira kece era talairawarawa ki na Nona ivakaro era na ciqoma na veivakalougatataki kece sara ni dua na matavuvale tawamudu. E rawa ni da vakararavi Vua ka vakabauta na Nona gauna.