“Kunesala ena Dredre ni Veiwekani,” Liaona, Janu. 2023.
Kunesala ena Dredre ni Veiwekani
Ena rawa ni ulabaleti na dredre ni matavuvale kevaka e lomada me da vakasaqara na veivuke ni Turaga me da veisau ka vinaka cake.
Droini mai vei Ale+Ale
Na noda kunesala ena bolebole ni noda veimaliwai vakamatavuvale ena rawa ni tovolei keda ki na iyalayala ni lomada. Niu daunivakasama, au raica e vuqa na ituvaki vakamosiyalo. Ia au raica talega na veivakalougatataki ena nodra bula era sotava na dredre vakamatavuvale ni ra vakasaqara na veivuke ni Turaga me vinaka kina na nodra veivosaki, vakalevutaka na nodra loloma kei na kilamatata, ka cakacaka vata ena caka ni veisau bibi. Ena veivuke ni Turaga, era a kunea na kaukauwa me ra tubu mai na nodra leqa.
Na veivosaki va-Karisito e rawa ni kauta mai na loloma kei na veiciqomi
Ko Tom kei Joan (sa veisau na yaca) e sa yali ruarua na dui watidrau. Sa takali na wati Tom mai na kenisa, kei na wati Joan, ena vuku ni bulavesuki, sa biubiu kina ki na veiwekani tale eso. Erau a sota o Tom kei Joan ena dua na koniferedi ni dawai ka rau sa nanamaki tiko me rau vakamau.
Oi rau yadua era vakaluveni, yabaki 15 ka gone sobu. Eratou sa sota vata tiko vakavica na nodrau matavuvale, ka rawa ni rau raica ruarua o Tom kei Joan na kena rawa ni sotavi na veileqa ena sema ni matavuvale. Erau lako mai me vakasalataki ena so na vakasama me baleta na sala vinaka ni veitaratara me sokoti kina na iwase vou oqo ni nodrau bula.
Au vakatura me rau railesuva na itukutuku ena matabose ni matavuvale mai vei Peresitedi M. Russell Ballard, Peresitedi Vakatawa ni Kuoramu ni iApositolo Le Tinikarua. “Era gadreva dina na gone na itubutubu era rogoci ira” e vakatavulica, “ka rawa me vakarautaka na matabose ni matavuvale na gauna mera vulica ka kilamatata ka veilomani vakai ira na lewe ni matavuvale.”1, .
Me baleta na nodra matabose ni matavuvale, erau duavata ena lewe ni veivosaki oqo:
-
Kunea na ibalebale ni leqa.
-
Kunea vata na iwali eso.
-
Digitaka e dua na ituvatuva.
-
Gu ni cakacakataka
-
Dikeva na kena rawati na ituvatuva ena macawa tarava ka veivosakitaka tale na ituvatuva ke gadrevi.
Me ikuri ni veivosaki vata vakamatavuvale, a vulica o Tom kei Joan ni gauna e levu kina na yavavala ni veiwekani, sa rawa ni gadrevi me vulici talega na sala me vakavinakataki cake kina na veivosaki yadudua.
Erau vulica o Tom kei Joan e vica na iwalewale a vukea nodrau vakavinakataka na nodrau veitaratara kei na nodrau veimaliwai kei ira na luvedrau.
-
Erau a tucake vata na itubutubu ena kunei ni iwali ni leqa vei ira na gone.
-
Kevaka e dredre vua e dua na gone me vakacavara na nona itavi e veisiga, ena tiko vata kaya e dua na itubutubu, me rau veitalanoataka na siga me cakacaka me vakacavara na itavi.
-
Erau dau tiko ena veimacawa ka vakatitobutaka na nodrau veimaliwai kei ira yadua na gone.
-
Era a tauyavutaka taumada na gauna mera na cegu mada ni “yaloca” na mona (kaikaila) mai na mona “matau,” na kena e raica na iwali (veivosaki).
-
Ena veigauna e dau vakasa kaukauwa kina na itubutubu kei na gone, na itubutubu, ni vakauqeti me cakava, me vakasuka ka lesu malua tale mai me monataki e dua na iwali vou.
Ni ratou sa cakava na matavuvale na nodratou vinaka taucoko me ratou torova na vei dredre ni veiwekani ena veisala yalodina ka bulabula—me veivosakitaka na nodratou bolebole ka cakacaka vata kina—Erau raica rawa o Tom kei Joan na tubu bibi vei ira na luvedrau vakakina vei rau.
Na veiciqomi kei na loloma e vakavolekati keda vata
Ni ra sa qase cake na gone, era sega ni dau cakava na digidigi eda diva mera na cakava. Eda na qarava vakacava na ituvaki vakaoqori? E rawa vakacava ni da maroroya se vaqaqacotaka na noda veimaliwai me rawa ni da tomana tiko na idre veitokoni, ka yalododonu ena nodra bula?
Rau a curu mai ki na noqu valenivolavola o Terry kei Bruce ni oti ga vakalailai na nodrau veivala ena talevoni o Terry kei na luvedrau tagane, o Seci. E a tu yawa tu mai koronivuli o Seci me tolu na yabaki. A tauvi koya e dua na mate bibi ka se bera ni vagalalataki mai na nona veiqaravi na vuniwai. Ena vuku ni nona mate, a sega kina ni laki kaulotu. Erau sega ni kila o Terry kei Bruce e vakacava tu na nona ivakadinadina se kevaka mada ga e lako tiko i lotu. Era a lomaleqataka ni o Jolyn, na itau vou nei Seci, e sega ni mataqali idre erau diva ena bula nei Seci. Erau lomaleqa na itubutubu ruarua ena sala e sa muria tiko.
Ni keitou veivosakitaka na veika e rawa ni rau cakava, keitou veitalanoataka na vakatautauvata ni sipi lakosese. E rairai a vakarorogo na ivakatawa ni sipi ena vuku ni nona tagi na lami ni se bera ni kunea, lomana, ka kauta lesu mai ki na lomanibai (raica na Luke 15:6). Erau raica o Terry kei Bruce ni rau sega ni rawa ni veisautaki Seci, ia erau nanuma me rau tovolea me rau vakarorogo vua, lomani koya, ka sureti koya ki vale. Erau sega ni rawa ni digitaka na watina se salatu ni nona bula ena vukuna, ia e rawa ni rau vakananuma vua na loloma ni nodrau matavuvale me baleti koya kei na kosipeli.
A qiriti Seci o Terry ka kere veivosoti ena vuku ni veiba. A vakarorogo toka ga ni tukuna vua ni madualaka baleta ni a sega ni laki kaulotu. A taroga lo se me na veigadivi rawa vakacava kei na dua na goneyalewa mai na lotu. Erau a sureti Seci kei Jolyn ki vale ena gauna ni vakacagicagi ni koronivuli.
Erau a lako mai o Seci kei Jolyn. Erau ovici rau na veiwatini na ganei Seci. Erau taleitaka na itubutubu ruarua na suka i vale nei Seci ka tukuna vua. Erau sa sema wasoma o Terry kei Bruce kei Seci. E vakau itukutuku vakavica o Terry ena dua na macawa. E ratou veitalanoa ena vidio e vei Sigatabu na matavuvale. A taura na gauna o tamai Seci me qito golf ka siwa vata kei koya. A yaco vakamalua mai, ia e a sema tale o Seci ki na matavuvale. Sa qai lewa o Seci ni sega ni donu vua na sala digitaki nei Jolyn. E muri a qai vakawatitaka e dua na marama totoka ka a papitaisotaka.
Erau kunea o Terry kei Bruce na nodrau lami lakosese ena nodrau vakarorogo, dau loloma, ka sureti koya lesu mai ki na lomanibai.
Ni da cakacaka vata ena veisau e rawa ni vaqaqacotaka na veimaliwai ka laveta cake na tubu
O Marie kei na watina, o Tevita, erau sa vakamau oti ena vuqa na yabaki ka rau lewe ni nodrau itikotiko dokai. Ia ena dua na siga a vulica o Marie, tawakilai vei Tevita, ni sa yaco me vakaitavi ena dua na veiwekani kei na dua tale na marama.
A lako mai ki na noqu valenivolavola o Marie, ka vakila e dua na veiwaki ni cudru, yaluma, kei na rarawa. Ni mamakeukeu voli ena nona italanoa, e kila o koya ni gadreva me tukuna vei Tevita na veika a vakila ia sega ena sala cudrucudru, me rawa ni tiko vata kei rau na Yalotabu.
Ni oti na vakavakarau ena masumasu, a tukuna vei Tevita ni lomani koya ia sa rui rarawataka nona sa mai kila na nona veilasami tiko kei na dua tale na marama. Erau na gadreva me rau sota vata kei bisopi ka vakasamataka na itinitini ni nodrau vakamau. E sega ni vinakata o Tevita me biuta na watina se nona matavuvale. Ena veivuke nei bisopi, sa tekivuna na ikalawa ni veivutuni.
E kila tu o Marie ni tiko eso na ka e dodonu me rau cakava yadua me rau kunea kina na veivakabulai yadudua ka vakaveiwatini. A kerei Tevita o Marie me tiko vata kei rau nona itubutubu me vakamaravutaka mada o koya na yalona. A lako tiko ki valetabu, ka kere veivuke vua na Turaga. A qaraviniyalo toka ga, ka vaqaqacotaka na nona maqosa ni veitaratara ka vulica me tuva na nona iyalayala veiganiti.
Tu vata, ko Marie kei Tevita:
-
Wilika na ivolanikalou ena veibogi.
-
Masu.
-
Wasea na veika sa yaco ena veisiga yadua.
-
Dua na bogi ni veigadivi ena dua na macawa.
Erau sa dau veitalanoa vakamatata. A tukuna o Marie na ka e nanuma, ka vakarorogo o Tevita. Rau sa tekivu veitalanoa vakai rau me vaka ga ni rau se qai vakamau.
A tukuna o Marie ni sega walega ni veisau o Tevita; sa veisau talega o koya. A yaloqaqa cake ka yalodei vakalevu cake vakaikoya. A veivutuni tikoga o Tevita ka lesu mai vale.
Ni oka na Turaga ena nodrau bula ni veisiga e kauta mai na veivakabauti kei na loloma levu cake ki na nodrau veimaliwai. Rau a vakila ruarua ni sasaga me ulabaleti na bolebole oqo ena veivuke ni Turaga a vaqaqacotaki rau.
Na vosa i Karisito ena tuberi keda
E dredre ni da veivosaki ena veiwekani vakamatavuvale, me da nanuma kece me da dabe ena bose vata kei na Turaga. Ena so na gauna ena tukuna vei keda o Koya na veika me da cakava. Ena so na gauna eda rawa ni digia. “Sa sega ni ganita meu vakarota na ka kecega”(Vunau kei na Veiyalayalati 58:26). Ia e tiko tale eso na gauna meda na soli keda yani kina vua na Turaga. Kevaka eda taura na rai tawamudu, ena noda na iyau ni gauna tawamudu, “ia sa cakacaka na ka kecega me da vinaka kina” (Vunau kei na Veiyalayalati 90:24).