“Veivakatotogani, Veisusu—kei na Veivakabulai,” Liaona, Janu. 2023.
iTabagone Qase Cake
Veivakatotogani, Veisusu—kei na Veivakabulai
Na noqu matavuvale e a veivakatotogani ka sega ni dei, ia ena vukui Karisito, sa tu vei au oqo na inuinui baleta na noqu matavuvale vou.
iTaba vakarautaka o koya ka tabaki
Au a tubu cake ena dua na draki sega ni dei. Erau a vakatotogani ka vakawaleni au na noqu itubutubu dina, kau sotava kina e levu na bolebole dredre. Au valuta na lomaleqa, beca na yagoqu, na catanakana, kei na yalobibi ni ituvaki ka tauri au tu vakavesu ena vica vata na yabaki.
Erau a vauci ena valetabu na noqu itubutubu dina, ia ni oti ga vakalailai na noqu papitaisotaki ena yabaki walu, rau sa tekivu kuitaki tani mai na Lotu. Ia ni yawa tani ga na nodrau kuitaki mai na nodrau veiyalayalati, na kena ca sobu mai na neitou ituvaki.
Ena yabaki 14, au a dauveikaroni vei taciqu vakasama bera kei tinaqu. Au a lecaika ka sega ni lewai rawa. Au a cati au kei na kequ ituvaki ka vakabauta ni na sega ni veisau na noqu bula.
Ia a qai yaco e dua na cakamana. A qai kila na tinaqu dina ni na sega ni rawa me qaravi au ka qiriti ganena e Singapore me taroga ke rawa ni susugi au o koya. Au vakasosolo ena mata tagitagi, kau vodo ena waqavuka me tekivu e dua na bula vou—e dua ka galala mai na veivakatotogani. Ia e dredre na veisau ki na noqu matavuvale veisusu kei na dua na itovonivanua vou, kau saga dredre meu toso ki liu.
Erau cakava na nodrau igu taucoko na noqu itubutubu veisusu me rau vukei au. Au raici ira na daunivakasama kei na vuniwai. Au sa tekivu lako tale ki lotu, ia na vulici ni dua na Tamada Vakalomalagi ka lomani au ka tiko nona inaki baleti au e dredre vei au, baleta niu sega ni vakabauta rawa ni oti na veika kece au a vosota.
Au sega ni marau sara ga. Au sega ni kila na sala meu vakabulai kina mai na gauna sa oti ka se nuiqawaqawa tikoga me baleta na veisiga ni mataka.
Vinakati na Veivakabulai
Dua na siga, au a vakasamataka tiko na lekaleka ni bula oqo. Au a sega ni vinakata meu tosoya noqu bula ena tawamarau. Au gadreva meu vuli mai na noqu dredre, bulataka na ivakavuvuli ni kosipeli au sa vakavulici kina, ka sureti Karisito ki na noqu bula.
Au a taura e dua na lade ni vakabauta ka tekivu tekiduru ka kerea vua na Tamada Vakalomalagi na kaukauwa e veisiga meu vosoti rau na noqu itubutubu dina, me vukica na noqu rere ki na vakabauta, meu kunea na veivakabulai kei na marau, ka raica na loloma ena noqu bula. Au a gole ki inisitute ka tekivu vulica na ivolanikalou ka bulataka na dina ni kosipeli ena noqu bula.
Au a vakasaqara dina na kaukauwa ni veivakabulai i Jisu Karisito kei na Nona Veisorovaki. Ni toso tiko na gauna, sa tekivu me veisau na noqu bula. Niu a dau vosota, ciqoma na veiqaravi ni vakasama kei na wainimate, ka vakasinaita noqu bula ena Yalo ena veisiga yadua, au sa tekivu vakabulai: au vakila ni lailai sobu na noqu matavunivuni ka vakataki au vakalevu cake. Au a vakila na taqomaki. Au a qaravi ira na tani. Au a loloma, veivosoti, kau ciqomi au. Au tara cake na veimaliwai bulabula, veilomani. Au rawa ni vakila na loloma nei Tamada Vakalomalagi vei au. Ia ena imatai ni gauna ena noqu bula, au sa vakila na reki dina.
Sa Solia na Karisito na iNuinui ki na Noda Gaunasaberamai
Au na sega ni veisautaka rawa na noqu gaunasaoti, ia me vaka e kaya na Vunau kei na Veiyalayalati 122:7 , “Na veika kece oqo [meu] na yalomatua kina ka vinaka cake.” Au sa qai kila oqo ni a tokoni au voli na iVakabula ena noqu dredre. E dina ni ra tu, au sa tubu vakalevu sara ena vuku ni noqu gagadre meu veisau ka baleta niu tomana tiko noqu gole Vua.
Kevaka o sotava tiko e dua na ituvaki dredre vakamatavuvale, mo kila tiko ni tiko e dua na Tamamu mai Lomalagi e kilai iko ka lomani iko ka na dolava na katuba ki na dua na veigaunasaberamai ramase. Ni bera na susugi, au tukuna vei au ni na sega sara ni veisau na noqu ituvaki, kau na sega ni vakawati se vakaluveni baleta niu rerevaka ni ra na kunerarawa me vakataki au. Ia au sa vulica ni veitalia na dredre cava soti eda sotava ena noda matavuvale, ni da vakasaqarai Karisito, e rawa ni da tara cake na noda itikotiko ena gaunasaberamai kei na matavuvale tawamudu ena inuinui, dina ni kosipeli, kei na loloma.
Me vaka a vakavulica o Elder Clark G. Gilbert ena Vitusagavulu: “O keda kece eda tekivu ena veivanua duidui kei na edaumeni duidui ni bula. Eso era sucu vatakaya na tadrua cecere, sinai tu ena madigi. Eso era sotava na ituvaki era bolei tiko kina Eda sa qai toso ki liu ena noda dui baba ni rawaka. Na veisigasaberamai ena lewai sega soti mai na noda itekitekivu ia ka vakalevu cake mai na noda baba. Sa raica o Jisu Karisito na gunirawaka vakalou veitalia na vanua eda tekivu kina. Ena cakava o Koya na ka kece e rawata me vukei keda meda vukica noda baba vaka ki lomalagi.”1
Se cava ga o sotava tiko, e tiko na inuinui kei na veivakabulai e kune vei Jisu Karisito! E tiko vata kei iko o Koya, ka na tuberi iko o Koya ki na vakacegu kei na reki ni ko vakasaqarai Koya—e veigauna.