iYaloyalo ni Vakabauta

Na Kaukauwa ni iVakaraitaki

Mai vei Agim Deda, e Tiranë, Albania

Au kila ni sala duadua ga au rawa ni kauta mai kina na watiqu ki na Lotu sai koya na noqu ivakaraitaki. Niu veisautaka na noqu itovo, sa tekivu me vakila na Yalo ni Kalou.

iTaba mai vei Cody Bell

E dua na siga niu lako tiko ki cakacaka au a raica e rua na cauravou ni rau vunautaka tiko na vosa ni Kalou e gaunisala. Rau a tarovi au ka taroga kevaka au vinakata meu kila eso na ka me baleta Na Lotu i Jisu Karisito ni Yalododonu Edaidai. Ena gauna o ya, au a sega ni kila e sa mua tiko i vei na noqu matavuvale. E sega vei keirau na kabasi vakayalo me keirau kunea kina na neirau sala.

Au a gunu alakaolo tiko ena mataka oya, kau sega ni nanuma rawa na veika erau tukuna vei au na daukaulotu. Ia erau solia vei au e dua na iVola i Momani kei na dua na tikidua me baleta na Parofita o Josefa Simici, vata kei na nodrau naba ni talevoni. Ena mua ni siga oya, au sa tekivu wiliwili. E dua na ka e tara na yaloqu niu wilika na iVola i Momani, kau kurabui ni rawa vua e dua na gonetagane yabaki 14 me raica e dua na raivotu cecere vakaoya.

Au a vakasaqara tiko na dina, kau sa tekivu sota kei rau na daukaulotu. Niu sa taura oti e vuqa na lesoni, au kila ni dodonu meu papitaiso. Ia ni sa roro mai na siga ni noqu papitaiso, keitou a taura e dua na lesoni ka dredre meu ciqoma. Na lesoni a baleta tiko na Vosa ni Vuku.

A dredre sara vei au na lesoni oya baleta niu dau gunu. E dredre na noqu vanua ni cakacaka. Era gunu kece keimami cakacaka vata, kau sa mani cakava talega. Au dau laki gunu ni oti na cakacaka ka lesu mai ki vale ena loma ni bogi.

Ia a cecere na nodrau cakacaka na daukaulotu. Au se lomani rau tikoga kina. Erau vakavulica vei au ni vinakata na Kalou me da kaukauwa ka solia vei keda o Koya na Vosa ni Vuku me vakalougatataki keda. E dau dredre sara vei au na talairawarawa ki na lawa oqo, ia vakamalua, sa tekivu meu maroroya. Au nanuma na noqu dau qiriti rau na daukaulotu ena veisiga, ka vakaraitaka vei rau na noqu toso, ka tukuna vei rau niu a sega ni gunu ena siga oya. Erau a marautaka vakalevu na noqu toso.

Ena nodrau veivuke, au a papitaiso ka curu ki na lomanibai i Jisu Karisito. Au a vakila na Yalotabu ena siga totoka o ya! Ia au a tiko duadua ena gauna au lewena kina na Lotu. Au a vinakata me tiko vata kei au na noqu matavuvale.

Niu vosa vei watiqu, o Clirime, baleta na Lotu, e sega ni dau vakarorogo taumada o koya. E lewena o tukana e dua tale na matalotu, ka vakataroga se cava na vuna e a lako mada ga mai kina Na Lotu i Jisu Karisito ni Yalododonu Edaidai ki Albania. Au kila ni sala duadua ga au rawa ni kauti koya mai kina ki na kosipeli sai koya na noqu ivakaraitaki. Mai na noda ivalavala, e rawa ni ra raica na tamata o cei dina o keda.

A raica vei au o Clirime na veisau niu sa biuta na alakaolo ka tekivu lesu totolo mai vale ena cakacaka. Ena vuku ni veisau au sa cakava tiko, sa tekivu me vakila na Yalo ni Kalou niu tukuna vua me baleta na Lotu. Au sega ni rawa ni vakamacalataka na yalo marau au a vakila ena nona tukuna vei au ni dua na siga ena papitaiso talega o koya. Sega ni dede sa tekivu tauri lesoni ni kaulotu, kau a vukei rau kina na daukaulotu me rau veivakavulici. Au a marau vakabibi ni a loku siga ni nona papitaiso, ni oti e ono na vula na noqu papitaiso.

Ena nona papitaiso, kei na nodrau papitaiso na luvei keirau e rua ena nodrau dui yabaki walu, au vakila ni rawa ni keitou yaco me dua na matavuvale tawamudu. Ia na papitaiso sa kena itekivu ga. Me vakavakarau ena gole ki valetabu, keitou kila ni dodonu me keitou muria na Kalou me yacova na icavacava ni neitou bula, muria na ivakaro, lako ki lotu, votai ena sakaramede, veiqaravi ena veikacivi, wiliki ni ivolanikalou, kei na vulici vakalevu cake ni veiyalayalati kei na ituvatuva ni veivakabulai.

Na siga keitou a vauci vata kina vakamatavuvale ena Valetabu e Frankfurt Jamani e dua tale na siga totoka. Ena valetabu, au sa mai kila vakavinaka cake kina na ituvatuva ni bula marau sa vakarautaka vei keda na noda Kalou, kau vakila na Nona loloma.

Au se nanuma tikoga na yalayala keirau a cakava kei Clirime ena valetabu. Ni dua na ka e cala se da sotava tiko e dua na gauna dredre, au vakasamataka lesu na yalayala oya.

Keitou saga vakamatavuvale me keitou bula veilomani vakai keitou baleta ni oqori na ka keitou vakila ena valetabu. Ena veigauna kece au vakasamataka kina na valetabu, au dau marau ka vakalougatataki. Au kila ni sa ka dina na Kalou ka sa lomani keda o Koya ka vinakata meda bula marau.