2023
Veiqaravi ena KilaKa Cecere Cake
Janueri 2023

“Veiqaravi ena Kila-ka Cecere,” Liaona, Janu. 2023.

iVakavuvuli ni Veiqaravi

Veiqaravi ena KilaKa Cecere Cake

E sega ni gadrevi vei iko na isaunitaro kece sara, ia na nomu mai kilai Koya vakavinaka cake ena vukei keda meda veiqaravi me vaka a vakayacora na iVakabula.

na cauravou o Jisu ena loma ni valetabu

Matalailai mai na Karisito ena Valetabu, mai vei Heinrich Hofmann

Sa Vakaraitaka Vei Keda o Jisu e Dua na iVakarau ni Vuli

Ni tubu tiko na iVakabula, a “sa yalomatua mai, sa sinai ena vuku, sa tu vei koya na loloma ni Kalou” (Luke 2:40). Na vosa yalomatua e kena ibalebale me tubu vakamalua, me vaka na kena tubu cake tiko na vula me taucoko mai ena loma ni dua na vula. E a kuria o Luke “A sa tubu cake tiko ko Jisu ena vuku kei na yagona talega a sa vinakati koya vakalevu cake tikoga na Kalou kei ira talega na tamata.” (Luke 2:52). A sega ni vakasauri ga na taucoko ni nona kila-ka o Jisu —a rawata ena kena gauna (raica na Vunau kei na Veiyalayalati 93:12–14).

Ni yabaki 12 o Jisu, erau a kunei Koya na Nona itubutubu ena valetabu—na itakele ni sokalou e Jerusalemi—“dabe ena kedra maliwa na vuniwai, ka ra sa rogoci koya tiko, ka taroga vua na taro” (iVakadewa i Josefa Simici, Luke 2:46 [ena Luke 2:46, ivakamacala e botona c]). Baleta ni a tiki bibi ni Nona tubu na vuli, ni yaco mai na madigi me vakavulici ira ena valetabu, sa vakarau tu kina o Koya. Na nona veivakavulici sa veivakurabuitaki sara na kena revurevu vei ira kei rau na Nona itubutubu.

Vakayagataki ni Kila-ka ena Veiqaravi

Oqo e tolu na sala e rawa ni vukei keda kina na noda tara cake na ivakarau va-Karisito ni kila-ka ena noda veiqaravi:

  1. Ni yaco me da kila na iVakabula ka vulica me baleta na Nona itovo ni bula, eda na kila vakavinaka cake na veika ena cakava o Koya me veiqaravi kina ena noda vanua.

  2. Ni da tubu cake ena kilaka vakosipeli, eda na tu ena dua na itutu vinaka cake me na vakananuma kina vei keda na Yalo Tabu na veika eda gadreva ena gauna eda gadreva kina (raica na Joni 14:26). Oqo ena rawa ni vukei keda meda kila vinaka na nodra gagadre o ira eda qarava ka sauma na nodra vakatataro se kauwai.

  3. Ni da vakalevutaka na noda rawa ni vuli, eda na rawata vakavinaka cake meda sema se veiqaravi vata kei ira na tani. Eda na vulica beka eso tale na ka me baleta e dua na ulutaga me da semati kina vua na itokani e taleitaka. Se eda rawa ni vulica eso na kila-ka e rawa ni veivuke me sotava e dua na gagadre.

Rawati ni kilaka e rawa ni vukei keda ena vuqa na sala. Kena ikuri “Se cava ga na ivakatagedegede ni vuku eda mai rawata ena bula oqo, ena tucake vata kei keda ni da sa tucake tale” (Vunau kei na Veiyalayalati 130:18).

vulica tiko na ivolanikalou na itabagone qase cake

Vakatorocaketaki ni Kila-ka

E rawa vakacava ni da tara cake na ivakarau va-Karisito ni kila-ka? Oqo e vica na vakasama:

  1. Nanuma tiko ni o Jisu mada ga a vuli tiko vakamalua ni toso na gauna. Mo gugumatua, ia mo yalomalua tiko ga. Na vuli e yaco ena “lvosa ena vosa, na vunau ena vunau” (2 Nifai 28:30).

  2. Vulica mo kila na ivurevure nuitaki ni itukutuku. (Raica na “Kunei ni Dina ena Yabaki ni iTukutuku Cala” ena Okotova 2022 Liaona.)

  3. Dau lomatarotaro. Vuli mai na veika e yaco tiko wavoliti iko ena veisiga. Vakatataro. Wilika na ivola vivinaka ka kila vinaka tu. (Raica na Vunau kei na Veiyalayalati 88:79, 118; 90:15.)

  4. Kilaka ena vuli kei na vakabauta (raica na Vunau kei na Veiyalayalati 88:118). Ena vakatorocaketaki na nomu rawa ni kila na dina ena dua ga na ulutaga ena nomu vakasotara vata na nomu sasaga vinaka duadua ni vakasama kei na nomu sasaga vakayalo vinaka duadua. Bula me rawa ni tiko vei iko na veivuke ni Yalo Tabu.