“Otan te Maiu,” Riaona, Tianuare 2023.
Ootan te Maiu
Iesu Kristo bon ootara, maiura, ao kawaira—ngkoananoa, ngkai, ao n aki toki.
Kabwarabwara man Boboto iaon te Kimwareirei, iroun Michael T. Malm
Ngke e a bung taai n te Tabati teuana n 1948, I tabe n nakonako irarikin te karaanga ae arana te Trent River i Nottingham, England. Ngkai bon te mitinare ngai ae 20 au ririki, I a tibwa karekea weteakiu bwa te beretitenti n te mwakoro. E bon rangi n abwabwaki, ni kakua kanoan te bong aei n onrake ma bowi ao mwakuri n ibuobuoki, ma I rangi ni kukurei ao man rau nanou n te mwakuri are I karaoia.
Inanon au tai n nakonako irarikin te karaanga, I mwanewea au tataro inanou. Ni kakaean angau bwa N na karekea ana kairiiri te Uea, I titiraki, “I karaoa ngkai te bwai ae Ko Tangiria?”
I kaonaki n namakinan te rau ao te ota are e roko irou. N te tai naba anne, I a ataia bwa e kinaai Iesu Kristo ao e tangirai. Bon akea te kaotioti ae I nooria ke tao n ongo te bwanaa, ma e bon kamatoaaki au koaua iroun Iesu Kristo e ngae ngke bon akea ni kaoti imatau ao n ongo ae wetea arau.
Te taneiai aei ae tamaroa ma n rau e bita aron maiu. E moa man te bong anne, au rinerine ake I karaoi a bon kairaki man au atatai iaon te Tia Kamaiu. Inanon ririki aika nako ao bon ni kabutaa te aonaaba, I a tia ni kaota au koaua bwa Iesu Kristo bon Natin te Atua, Otan te Aonaaba. Bon te tibwanga teuana te nako Nakoina, n Iriiria, ao n namakina Otana inanon maiura.
Otan te Aonaaba
N te tairiki teuana inanon ririki aika mwaiti n nako imwiin te taneiai ae ururingaki anne, kainabau, Barbara, ao Ngai ti tararake nako karawa. Ngke ti tabe ni karaoa anne, I tararake ma te mimii n taian itoi aika mirion mwaitiia, ae a taraa n rangi n takiakia otaia ao ni katamaroa te tairiki anne. E oki au iango ma te mimii nakon ana taeka te Uea nakon Mote: “Ao aonaba ake aki kona ni warekaki I a tia ni kariki; ao I karikiia naba ibukin oin au kaantaninga; ao I karikiia mai iroun te Nati, are bon au Rikitemanna (Mote 1:33).
E roko te mwaaka mai iroun te Tia Kamaiu are e karika ao ni kaotaa taai, namwakaina, itoi, ao te aonaaba (taraa Reirei ao Berita aika Tabu 88:7–10). E kona ni bon taekinna, “Otan te aba Ngai: ane irai ao e na bon aki nakonako n te roo, ma e na karekea te oota ni kamaiu.” (Ioane 8:12; taraa naba Ioane 9:5).
N ana taeka Beretitenti Dallin H. Oaks, te Moan Kauntira n te Moan Beretitentii, “Iesu Kristo bon otan te aonaaba ibukina bwa bon boton te ota are e ‘waaki nako mai imatan te Atua ni kaona annang ae akea tokina’ [Reirei ao Berita aika Tabu 88:12].” Otan te Tia Kamaiu bon te “ota ni koaua are e kaotaia aomata nako ake a roko nakon te aonaaba” (Reirei ao Berita aika Tabu 93:2; taraa naba 84:46). Man te ota aei, ti na kona n ataia bwa ti na kanga n ataa te “raoiroi man te buakaka” (Moronaai 7:16). Te ota ae uamae n tabo nako e ataaki bwa “otan te koaua,” “otan Kristo,” ao “Tamnein Kristo” (Reirei ao Berita aika Tabu 88:6; 88:7; Moronaai 7:16).1
Te Abotoro Bauro e taku, “Ao te Ota arei e ota ibuakon te ro; ao te ro e aki tokanikai iaona” (Ioane 1: 5). N ara bong, Tatan e mwakuri ni katoa tai ni kairiia natin te Atua nakon te ro, ni kanakoa “te ota, ao te maiu, ao koauan te aonaaba” (Ita 4:12).
Ti aki kona n noora—ke ni kaitaua—te Tia Kamaiu ao Ana euangkerio ngkana ti kabuaa Otana ao Ana koaua. Ma ngkana ti rairannano ao n ongeaaba, ni beku, ao n Taromauriia, ti tokanikai iaon te roo. E oki otana ao ni kanakoa nuun te aonaaba mai ibuakora ao ara iango.
Kakabwaiaki man te Ota
Ngkai ea rikirake n roo ao ni minotaki te aonaaba, namakinan otan te Uea inanon maiura e na taraa n riki bwa te kakaewenako. Ma e kauringiira Beretitenti Russell M. Nelson, “Te rootongitong ae rikirake ae raonaki ma te karawawaataki e karakaa riki otan Iesu Kristo bwa e na otamwaaka riki.”2
I a tia ni kunea bwa Otana e uramwaaka inanou ngkana I karekea te tai ibukin bwaai aika bwain te Tamnei, n tain te aki karongoaa n aron te tairiki are ngke ngai ma Barbara. Anne te tai ngke te namakin n tamnei, kairiiri, ao oota a roko nakoira. Anne te tai ngke e reke mataatara bwa ti rangi ni kakabwaiaaki ngkai iai ara Tia Kamaiu.
Ngkai Otan te Aonaaba, otan te Tia Kamaiu e kaotaa kawaira n ara borau n te maiu aei ma Ana banna ni katooto ao Ana reirei (taraa Ioane 8:12). E kabebetei uotara man Ana tangira ao nanoanga (taraa Mataio 11:28–30). E kabebetei nanora ma te kantaninga ao te kamaiuaki rinanon Ana Mwakuri ni Kamaiu (taraa Mataio 7:41). Ao E kabebetei ara iango ma “Tamnein te koaua” (Reirei ao Berita aika Tabu 6:15; taraa naba 11:13).
E taku Unimwaane David A. Bednar man te Kooram n Abotoro n te Tengaun ma Uoman, “Inanon taai nako inanon maiura, inanon kangaanga ni kabaneake ti kaitarai, ao inanon nako kakaewenako ake ti na kaitarai, Iesu Kristo bon te ota are e kamaunanakoa te maaku, katauraoa karauan nanora ao te kairiiri, ao ni karika te rau ae teimatoa ao te kimwareirei.”3
E beku n te mition Unimwaane Ballard i Engiran man 1948 nakon 1950.
Kaoti Ami Ota
Reken te tai n tibwaua otan te Tia Kamaiu nakoia aomata tabeman ao ni kaoiia n roko Nakoina ao n namakina Ana tangira ibukiia e riki n taainako bwa te bwai ae e rangi n onoti irou. I tangira au mwakuri ni mitinare i Engiran. I tangira au mwakuri ngke I riki bwa te beretitenti n te mition i Kanata. Ao I tangira naba te wewete are I mena iai ngkai ae te membwa n te Kooram n Abotoro n Tengaun ma Uoman. Te wewete aei e anganai te tai n taekina koauan Iesu Kristo ao n tibwaua te rongorongo ni Kaokan Bwaai ni kabuta te aonaaba.
Rimoa, te Tia Kamaiu e tuangiia Ana reirei:
“Otan te aba ngkami. E aki konaki ni karabaki te kawa ngkana e mena i aon te maunga. …
“Kam na kaoti ami oota i mataia aomata n ai aron aikai, bwa a na noori ami mwakuri aika raraoi ao a na neboa Tamami are i karawa iai” (Mataio 5:14, 16).
Nakoia taian Nibwaite, E taku, “Nooria Ngai te oota are kam na tauii i eta—are te bwai are kam a tia n noorai bwa I karaoia.” E reitia, “Ao kam atai bwaai ake kam riai ni karaoi inanon au ekaretia; bwa mwakuri ake kam noorai ni karaoi ao anne ae kam riai naba ni karaoi” (3 Nibwaai 18:24; 27:21).
Inanon ara bong, te Tia Kamaiu E kantaningaiia naba Ana reirei bwa a na kabongana Otana ni “kakionakoa te roo mai i [buakora]” (Reirei ao Berita aika Tabu 50:25). E otanako otara ngkai ti tangira n aron Iesu ae tangira. E otanako otara ngkai ti tibwaua ara koaua ni Kaokan Bwai ao ara kantaninga iroun Kristo. E otanako otara ngkai ti kanakoi bwanara ni kamanoa te koaua. Ngkai e otanako otara, ti kairiia riki aomata tabeman nakon boton te ota anne.
Karaoi ibuobuoki n tangira, ao ko na namakina Ana ota i nanom. Tataromwaaka ibukin taai n tibwaua te euangkerio, ao are ko na kairaki nakoia naake a tauraoi ni butimwaea Otana. Tangiriia aomata ni kawai aika a uarereke ao ni bubura, ao ko na karika te aonaaba aei bwa te tabo ae tamaroa ao n oota.
Kabwarabwarana Iesu Kristo,, iroun Harry Anderson
Te Ota Ae Akea Tokina
Au kakaitau ae akea tokina ibukin te taneiai are I rinanona ngke te kairake ni mitinare ngai i Engiran ngke I a ataia raoi i bon irou bwa Iesu bon te Kristo. I a ota riki iai n te bong aei ngkai I a tia n rinanon te maiu ma kaanganga ao kakukurei ake I kaitibo ma ngaai.
Au mwakuri inanon te Ekaretia e a tia ni kakabwaiaai ma taian taneiai aika a tamaroa ao a onoti n te maiu n tamnei ao tabeua a rang tabu ni maroroakinaki. Akea te bwai n tangira ae moan te kakawaki ao ni materaoi are I kona n anganiia natiu, tibu, ao ake au tibu mamanu, ao ngkami, raraou ni kabuta te aonaaba, nakon ae au kakoaua raoi bwa Iesu bon te Kristo, Natin te Tama ae Akea Tokina, te Tia Kamaiu ao te Tia Kabooi maiuia aomata nako.
Kainabau ae kakawaki irou, Barbara, e mate n 2018. I kakatonga ngkai I ataia bwa ibukin kabaeakira n te tembora ao ibukin Iesu Kristo, ti na manga reitaki rimwi, ma ara utu, ibukin te tai ae akea tokina.
N taai tabetai, I namakina te korakai. N taai akanne, I tei ma n taraa tamnein te Tia Kamaiu. I uringnga ngke E mena i Keketemwane, ao imwiina, n te tai ae waekoa, I aki namakina te korakai. I ataia i nanou bwa ibukina E tokanikai iaon te aonaaba, “e kume n nako te ro, ao te oota ni koaua e bon oti ngkai” (1 Ioane 2:8).
I ataia bwa e maiu Iesu Kristo. “Bon ngaia … te oota ae aki totoki, ae aki kona ni karooaki” (Motiaea 16:9). Bon ngaia otara, maiura, ao kawaira—ngkoananoa, ngkai, ao n aki toki. Ti bia teimatoa n ririmwiin Iesu ao ni kaotaa Otana nakon te aonaaba.